CNLD Party Hruaitu Pu Zozam Cu SAC Ralhrang NCA Meeting Ah A Kai!
===========
2023 Kahdaih hnatlaknak minthu, NCA kum 8 tlin camtuak ah Chin National League For Democracy (CNLD) Chairman hlun Pu Zo Zam a kai ve tiah theih a si. 2021 kum CNLD Party thimnak ah party ruahnak petu ah Pu No Than Kap, Pu Zozam le Party Chairman ah Pu Ngai Sak hna thim an rak si.
Tlangcung hriamtlai phu hna le SAC karlak ah 2015 lio an rak tuah mi remdaih hnatlaknak minthut NCA kum (tlin camtuak cu 2023 October 15 ah SAC nih a tuah i cu puai ahcun Chin National League For Democracy (CLND) chairman hlun Pu Zo Zam a kai ve.
Amah hi 2015 kum NCA min rak thut hram thawk lio CNF nih min an rak thut lio ah a rak i tel ve mi a si. Asinain CNF nih cun rammi a thattu le rammi cung ah sualnak ṭha lo a tuahtu SAC ruang ah NCA hnatlaknak le cahren vialte cu a rawk cang ti in October 12 ah KNU le ABSDF he phungning tein an rak langhter cang nain Min Aung Hlaing nih NCA kum 8 tlin camtuak ah ceihmai ding in a kawh tiah Zalen nih a ṭial.
2015 lio NCA ah CNF nih min a rak thut lio zong ah Pu Zo Zam cu a rak i tel ve. 2021 in SAC nih hramhram in uknak a laak sin in ram pumpi remdaihnak minthut cu a rawk cang i SAC nih mipi cung ah a tuah cuahmah mi thiltha lo a ngol hlan lo chung poah cu hi minthutnak ah le ceihhmainak ah kan i tel lai lo tiah CNF, ABSDF le KNU hna nih October 12 ah cathanh an rak chuah cang.
Communist Party nih miphun zalennak ca ah ti in an aupi ruang tu ah tlangcung hriamtlai a thawhkehnak a si. CNLD Chairman hlun Pu Zo Zam cu NCA kum 8 tlin camtuak a kainak kong he pehtlai in CNLD party nih cathanh an chuah mi le an langhter mi a um rih lo.
NCA Kum 8 Tlinnak Ah Aa Tel Mi ABSDF Chungtel 3 A Zizut An Si. October 15 ah SAC Min Aung Hlaing nih NCA tonpumhnak a tuah mi ah aa tel mi ABSDF Vice Chairman Myo Win telh in minung 3 cu All Burma Students’ Democratic Front (ABSDF) nih a zizutnak an tuah hna tiah theih a si.
Sianhngakchia min pu ABSDF Vice Chairman Myo Win, Saw Maung Maung Oo le Min Zaw hna cu an bu nih ralkhel le ralkap kong lei tuanvo an pek an rak si nain October 16 ni ah ABSDF bu rianpek mi in hnom than an si cang tiah thawngzamhnak an tuah colh.
Mah minung 3 hi Nay Pi Taw ah NCA kum 8 tlinnak tonpumhnak ah an kai ruang ah atu bantuk in a zizutnsk an tuah hna hi a si. NCA tonpumhnak ah Karen National Union Chairman hlun General Saw Mutu Say Poe, ALP in Khaine Soe Moe Aung, Pa’O National Libration Organization (PNLO) in Colonel Khun Okka, Restoration Council for Shan State (RCSS/SSA) General Yawd Serk hruaitu hna an i tel.
NCA minthut le hnatlaknak vialte a rawk dih cang ti in CNF, ABSDF le KNU nih phungning tein an thanh. SAC ralkap nih rammi cung ah ngol lo in thahnawnnak an tuah caah rampi remdaih hnatlaknak minthut le biahren vialte a rawk dih cang, tiah All Burma Students’ Democratic Front (ABSDF), KNU le CNF nih October 12 ah phungning tein cathanh an chuah. NCA minthut pehzulh in dirkamhnak le ceihmainak le a ra lai mi 2024 thimnak tuah timhmi zong hi anmah nawlngeihnak caan saupi hmunhter an duh ruang ah a si tiah an langhter.
ABSDF, KNU le CNF nih ramkhel kong ah an hmuitinh an langhter mi cu SAC ralkap ramkhel ah i teltum ti lo ding, SAC ralkap cu sersiam ṭhan in mi zapi nih thimmi cozah uknak tang ah chiah ding, mi zapi nih cohlan khawh mi Federal Democracy ah hram a bunh mi phunghrampi serchuah ding, ram buai lio chung ah namneh mi hna nih tlukruannak an hmuh ding, dohthlennak chung ah tlukruannak rian ser chuah ding le rianṭuanchuah khawh nak caah ramkip nih telpinak, IT lei bawmhchanhnak, ramdang mi nih hlathlainak tuah le tangka in bawmhnak pek ding hna an si.