SAC Ralkap Nih Tualchung Mi Hna Sin I Kahdohnak An Tuahmi Kong Ah CNF/A Nih Cathanh An Chuah!
=========
Chin ramkulh, Falam khuapi um Khah Lah Yah 268 SAC ralkap headquarters cu CNA, CDF-KKG le CDF-Hualngoram nih August 12 zinglei suimilam 1:30 in 4:00 tiang kan kah caah CDF-KKG in ralkap pakhat nunnak a liam. SAC ralkap 6 an thi i 9 hliamhma an tuar. Hramngan telh in hriamnam zun 11 kan laak khawh i meithal kuan tampi kan laakpiak hna, tiah CNA nih August 13 ah cathanh an chuah.
August 12 zinglei suimilam 10:00 hrawngah SAC ralkap nih Ramthlo le Sunthla khua cu Jet Fighter le hriamngan in an kah ruangah Ramthlo khuami 7 hliamhma an pu i Biakinn le tualchung mi inn a tlawm bik 2 an rawk. Sunthla khuami a tlawm bik 7 zong hliamhma an pu, tiah an langhter.
SAC ralkap nih sualnak ngei lo tualchung mi umnak ah bomb thlaknak le hriamngan kahdohnak an tuahmi hi sualtuahnak ṭha lo ngaimi a si pinah milu tlawm bik Chinmi hna cung ah a bubu in thahnawnnak an tuahmi bantuk a si caah kan cohlang hrimhrim lo, tiah CNF/CNA nih cun an langhter. SAC ralkap tuahsernak ruangah hartongmi tualchung mi hna le chungkhar hna ca ah Pathian sin thlacampiak cio dingin CNF/A nih nawlnak an tuah.
SAC Ralkap Nih Hriamngan Kah Ruangah Loklung Khua Inn Thum A Rawk. Chin ramkulh, Hakha khuapi um SAC ralkap nih hriamngan duh poh in an kah ruangah Loklung khua inn thum a rawk i, tualchung mi pakhat hliam a tuar, tiah theih a si.
“Zahan August 13 zan suimilam 11:00 hrawngah SAC ralkap nih Hakha peng, Loklung khua cu hriamngan in an kah. Hriamngan kahnak in inn 3 a rawh pinah tualchung mi pakhat zong a lu ah hliamhma a pu,” tiah min langhter a duh lomi pakhat nih The Chin Post ah a chim.
A ruang um loin SAC ralkap nih hriamngan an kahmi hi cihmih an kan timh caah a si. Sualnak ngei lo tualchung mi umnak ah hriamngan an kahmi a tlawm ti lo. Naite zong ah Falam peng Ramthlo le Sunthla khua ah Fighter le hriamngan in an kah cang. Fihnung tukmi sualnak a tuahtu ralkap hna hi zeitik hmanh ah kan ngaithiam kho hna lai lo, tiah a chim chap.
“A luancia ni tlawmpal ah palik sakhan in palik pakhat le rungtlang um SAC ralkap pakhat cu CDM kan tuah lai tiin an chuak i Loklung khua ah an kal. Cu hnuah CDM tuah loin an kir ṭhan hnu, zahan August 13 zan suimilam 11:00 hrawngah SAC ralkap nih hriamngan in voithum tiang Loklung khua cu an kah,” tiah tualchung mi pakhat nih The Chin Post ah a chim ve.
SAC ralkap nih hriamngan an kah ruangah a rawkmi Loklung khua inn thum cu khuami hna nih an zuanhnawh hna i nihin August 14 ah an remhpiak ṭhan hna, tiah theih a si. SAC ralkap nih Loklung khua hriamngan kahnak kong he pehtlai in SAC ralkap nih thanhnak zeihmanh an tuah lo bantukin CDF-Hakha nih thanhnak an tuahmi a um rih lo, tiah theih a si.
Chin ramkulh khuapi Hakha Khusilobo tlangpar in SAC ralkap nih hriamngan voi tam ngai an kah, tiah theih a si. Tuzing hriamngan an kahmi lakah a thawng a thang ngaimi Jet Fighter thawng bantukin a zuangmi zong a um, tiah min langhter a duh lomi pakhat nih The Chin Post ah a chim.
“Nihin August 14 deika in SAC ralkap nih hriamngan voi tam tuk an kah caah inn zuat saṭil hna zong nidang bantuk kel in an um lo. Hriamngan thawng voi tam tuk a than caah an lau ve. Inn zuat saṭil cu chim lo, cheukhat ngakchia tete zong hriamngan thawng an theih paoh ah an ṭap,” tiah tualchung mi pakhat nih The Chin Post ah a chim ve.
Khusilobo tlang um SAC ralkap nih hriamngan an kahmi hi khoika lei ah dah an kah ti cu fiang in hngalh a si lo. Falam peng, Ramthlo khua lei kap a ummi hna zong nih hriamngan zuan thawng le tlak thawng kan thei lo an ti i, Thantlang lei kap ah an kah, tiah zumh a si. August 12 ah SAC ralkap Jet Fighter nih Ramthlo khua cu bomb in a thlak ruangah khuami pa 2 le nu 5 hliamhma an tuar. Nufa hna cu an hliamhma an fah ngai caah sii-inn an phan, tiah theih a si. Credit: The Chin Post