CDF Vialte nih Chin tuanbia dawh kan tial piak uh!
=========
Keimah hi CNF Regional Committee (Japan) a rak dirh pi tu hna ka rak si. MAH nih uknak a lak in CDF an rak dirh cang ka bak ah kai lawm tuk i R2P Van hai lo CDF timi ka rak dirh pi nak ca ka rak tial colh. CJDC bawmhnak caah Sport tuah in Fund zong kan rak kawl. Zophei CDF ca zongah ti khawh tiang cu kai tel peng rih.
Nain kum 2-3 chung ral tuknak zoh tikah tuk khel in tuk peng nakin kan chambaunak kha cawnnak (Lesson) ah hman i khua khan thiam kan hau cang. CNA le CDF an i khahnak le an i dannak a tlangpi in kan zoh si ahcun-
An I Khahnak: CNA le CDF cu kan ralkap ve ve an si. SAC ralhrang an do ve ve. Miphun ralkap ve ve an si. Nunnak zong an pek ve ve. A bikin ramleng um mi nih phaisa thazang in dirkamh mi an si ve ve..
An I Dannak:CNA cu chin huap in ral a tu mi an si. Chin ramri lawnh tiang zong an i tel. CDF cu pengtlang huap in ral a tu mi an si. CNA cu ralkap training tlamtling tein a kai mi an si caah professional army ti khawh an si. CDF tam pi cu ralkap basic training kai mi an si deuh caah professional army ti khawh an si lo.
An i khahnak le an i dannak zoh in KAN DIRHMUN nih “CDF vialte CNA ah i fonh uh”tiah “DIRHMUN” nih a kan fial cang.Future Chinland Government dirhnak ding caah timhtuah chung a hau mi tamtuk a um. Dothlennak chan ah kan um bantukin cu a timh tuah tu dingah hriamtlai buu nih hma lak a herh. Hi hma la tu dingah CNF/CNA dah lo cu a dang buu kan ngei lo.Cucaah CDF vialte CNF/CNA ah an i fonh ahcun professional army an si lawng siloin Chinland tuanbia dawh tak mi a kan tial piak tu an si lai.
Zei ruang dah CNF/CNA cu san an tlai lo tiah hnu lei tuanbia kan khoih lengmang? A ruang tampi le an chambaunak tampi zong a um ko lai. Nain hi pakhat te hi kan ruah tuah lai. Ralkap a thawn le thawn lo tahnak fung cu hriamnam a si i hriamnam cu phaisa in cawk a si. CNF/CNA nih peace talk a tuah lio kum (10) chung a hman mi budget khi CDF pengtlang pakhat nih kum (2) chung a hman mi budget tluk ceo lawng khi dawh si cuh! Cu nak hmanh in a tlawm deuh lai tiah kei nih cun ka ruah.
Cucaah kan i fun ahcun—Kan thawng chin chin lai. Kan lung aa rual chin chin lai.Phaisa aa fun chin chin lai. Ram dangin phaisa petu le khua nu khua pa zong an zang dam deuh lai. Ral kan tei chin chin lai i Chinland cozah dirhnak tiang lam a awng lai.
Cu vialte thil tha tuah ding le tuanbia dawh tial dingah CDF vialte nih caan tha nan ngei mi hi caan rem cang ah hman thiam ding le unau rual hmun khat teah ral tuk ti dingin CNF/CNA nih an in sawm mi hna hi kan miphun dawtnak lungthin taktak in a si. Dawtnak nakin a sang deuh mi a um ti lo. Tuanbia dawh le tuanbia thar kan tial piak hram ko uh!
Note: Fonh timi hi ONE command and control chim duhnak si. Credit: Salai Tin Maung Win
Laimi cu kanmah le kanmah aa uk kho phun kan si rih rua lo. Kan nih Laimi cu kan lungput, kan ziaza le kan sining nih a langhter tawnmi cu kan mah le kan mah aa uk kho phun kan si rih lo. Thil pakhat khat tuahnak ah siseh, riantuannak ah siseh kan mah le kan mah kan i hrihruainak ahcun zei ah kan i rel hna lo: tihzahnak, upatnak, nawlngeihnak vialte kan kal taak dih. Miphun dang nih hrihruainak tu ahcun kan hei fel khawh ning.
Malaysia Laimi kan sining in ka chim lai: Bawlung puai kan tuah tikah kan mah le kan mah nih Referee (dailukyi) le Linemen kan tuan ahcun buai zungzal. Referee maw Linemen maw zuan hnawh lengmang. Ramdangmi (Malay mi) nih Referee le Linemen an tuan ahcun an bia zong kan el ngam hna lo. Buai kan i timh hmanh ah kaa khat te an kan hro ahcun daidap tein kan um. Miphun dang le ramdangmi nih dailukyi (referee) an tuannak bawlung puai poh ahcun buainak a um bal lo.
Voikhat cu Kuala Lumpur Imbi sang ah Lai pa pawl minung 10 hrawng a bu bu in zaantim ah an rak i vel. Laimi a ho upa hmanh nih then khawh le daihter khawh an si lo. Tuluk putar pa te aa tuar ti lo i voikhat a van hro an van au hnawh hna cu chikhap an ti lo daidap khoika an zaamnak zong theih manh an si lo.
Khrihfabu, Fellowship le Community tibantuk nih meeting kan tuah tikah suimilam 10 ah thok dingmi ah 10 ah a hohmanh kan phaan kho bal lo. Kan mah le kan mah sin ahcun meeting chuah tlai khi style pakhat (zoh dawh) ah kan ruah. A rian tam/ aa manh lo ka ti hna seh ti khi asi. Riantuanak zong ah mah thiamthiam. Kan mah le kan mah hrihruainak ahcun mah le rian upatnak a um kho lo.
UNHCR nih meeting an kan auh i suimilam 10 ah thok ding an ti ahcun a hohmanh 10 hnu ah a kal ngammi kan um lo, 10 hlan ah kan phan dih.
Cun ahohmanh meeting a dih hlan zong ah a chuak ngammi kan um lo. Kan mah Laimi le Laimi hrihruinak Khrifabu le Community meeting tu ahcun kan duh caan poh ah kan rak i thawh, kan duh caan poh ah kan lawi than. Mah bantuk lungput le ziaza nih a langhtermi cu kan mah le kan mah aa hrihruai kho ding le aa uk kho ding kan si rih lo ti khi asi. Miphun dang nih uk le hruai lawng ah a tlamtling ding phun in kan um peng rih.
Khrifabu, Fellowship le Community zong ah minung kan tam deuh le karh deuh ah thazaang thawnnak ah le thanchonak ah si loin bu then le cheunak tu ah kan hman theo. Dothlen zong ah ah cu thiamthiam. Zeitik khin dak ruahnak tha lo le ziaza tha lo vialte khi kan kaal taak khawh dih te hnga mu. Credit: Ceumi Lian