Chinram ah a ṭhawng bakmi ralkap buu kan ngeih lo ahcun,zeidah a chuak te kho!
===========
A tu hi, kawlrawn ah siseh, tlangcung hriamtlai phu hna hmun ram ah siseh ralhrang an hun tei ziahmah cio cang hna. Kan I lomh rualrual in a hnu a hung zul colh dingmi thil hna cu,Karen le Shan ram hrawng ah hriamnam cawk a hun fawi deuhdeuh lai.
A tli tein hriamnam a zuar mi an karh deuh lai caah a hnu ahcun ngapih le cite cawk tluk tein hriamnam cawk a hun fawi te kho. Cu tikah Chinram chung hriamtlai phu cheukhat a bikin CNF/A a zuamcawh mi hna phu nih, heh tiah hriamnam thaazang an hun I ser lai tikah mi zei phu hmanh kha zei te ah an rel ti hna lai lo.
Cu vialte cawlcang kho loin a hip kho tu hna ding ralkap phu kan I ser khawh manh lo sual ahcun,kan I ruah loning piin kan ramah thisen chuahnak le I thah nawnnak tamtuk a chuak kho ti cu a hrut bik zong nih ruah cio a si ko lai tiah ka zumh.
Chinram Le Chinmi Aiawhtu Chinland Cozah Hi Dirkamh A Hau. KIA an țhawnnak cu an miphun ningin Kachin an si dih caah a si ko. AA an țhawnnak zong an zapi tein Rakhine/Arakan an si dih caah a si ve. AA hoi hna cu an khelmi le an i tinhmi khi Independence lei deuh a si ko khi mu.
Karen le Karenni an țhawnnak zong mah cu țhiamțhiam; an zapi in Karen le Karenni an si dih caah a si. Karenni cu an khualipi Loikaw hmanh an lak khawh deng cang! Kannih Chin cu catlap cung lawng ah Chin kan i ti. Kan lungput le kan tuahsernak cu khua le pengtlang ca lawngte a si. Hruaitu tam deuh cu Chinram luatnak ca a țuanmi nakin hmunhma le sinak/țhutden hmuh duh ah a țuanmi kan si tiah ka hmuh.
Atu ningte in kan kal rih ko ahcun tuhnu kum 2/3 ah cun aa naihniam bik a simi Hakha CDF le Thlantlang CDF hmanh hi kan i kap, kan i that te lai tiah ruahdamh khawh a si. CDF pakhat chung lila hmanh ah kan i țhen len rih lai, buainak le thahnawnnak a chuak len rih lai. Mindat hrawngah a cang cuahmah cang ko.
Kan i țhek tuk, phu kan tam tuk tikah fonh kan i zuamnak le bia kan i ruahnak ah caan tam tuk a dih. Ralteinak ca khuakhannak caan kan ngei ti lo. Kan thazaang a karh kho lo. CNA ralkap duhning in kan karh kho lo. Ram pakhat ven dingah kan ralkap thazaang a chambau tuk rih. Atu i kan buai ding tiah ka ruahmi cu Airforce le Navy tibantuk Department/Branch thar kong tu khi an si ding a si nain pengtlang hriamtlaiphu sawhsawh men ah kan caan a dih.
Kan ral nih hin Hakha le Thlantlang lawng an kan tu lo. Zophei lawng an kan doh lo. Mindat lawng an kan hrem lo. Falam lawng an kan uk lo. Zomi lawng an kan namneh lo. Daai lawng an kan nihsawh lo. Matu, Paletwa, Tedim, Tonzaang, Kanpetlet lawng an kan hrawk lo.
Kalay-Kabaw-Gangaw le Chindwin nitlaklei ram vialte zong an siangpahrang hna chan in atu tiang an kan chuh, ramri an rak kan en peng. Kan Chin miphun ningin hrawh le tlauter an kan timhmi hi i fian cu a hau. “CHIN” min in an kan tukmi a si. Chin hi an kuttang le an empire chungah um peng seh ti an kan duh.
Union of Burma chung i a ummi a dang miphun (ethnic groups) pawl zong Kawl nih hin mah ti cun uk peng an duh hna. Atu ah Chinland Cozah zong ser a si cang. Kan rianhmi le thazaang kan chuahmi hi Chinland caah a si ding a si ko. Kan khua, kan pengtlang ca fangfangte lawng kan ruah peng rih ahcun Chinland timi hi kan ngei kho lai lo. Chinland hi Chin State lawng a si lo cu kan theih cio ko lai dah.
Kalay-Kabaw-Gangaw aa tel ve ti hi kan philh lo a hau. Aiawhtu Chinland Cozah hi kan dirkamh lo i kan fehter lo ahcun SAC a tlak zongah, a tlak lo zongah kan ram kan veng kho lai lo tiah ka ruah. Kan pale nih Independence lei an kan kalpi zongah i lawmh chinchin ding a si ko. Credit: Salai Tial Thawng, Sai Cung Lian