Paletwa Peng Ah SAC Kuttang Um Khuabawi Pakhat Tlaih A Tong
==========
Chin ramkulh, Paletwa peng, Shinlatwa khua ah SAC ralkap kuttang um khuabawi pakhat cu aho si theih lo mi hriamtlai nih July 25, zaan ah an tlaih, tiah tualchung mi nih an chim. “Tlaih a tongmi khuabawi pa hi a hlan ah palik a rak ṭuan bal mi a si i, culio ah cun rithaisii ruangah kum saupi thong ah a rak tla mi a si.
Shinlatwa khuabawi a ṭuanlio mi pa cu a nunnak a liam caah amah aiawh in khuabawi an ṭuanter i, a ṭuannak zong a sau rih lo,” tiah tualchung mi hna sin in theih a si. SAC ralkap le palik phu hna nih hmunkip ah runvennak an tuah ko nain khuabawi pa cu a umnak inn cia ah tlaih a si, tiah an chim.
“Khuabawi pa tlaih a ton hnu ah, umkalnak lam an phih dih i, lo zongah kal khawh a si lo. SAC ralkap nih hmunkip ah khuabawi pa cu an kawl,” tiah tualchung mi hna nih an chim. Shinlatwa khua cu a luancia July thla zarh khatnak ah CNA le SAC ralkap an rak i kahnak khua pakhat a si.
Mindat Ah SAC nih Tlaih mi Ralzaam Pathum An Konglam Theih A Si Ti Lo. Chin ramkulh, Mindat khuachung Khrihfa biakinn pakhat ah aa dor mi ralzaam minung 4 cu July 16 ah SAC ralkap nih an tlaih hna hnuah pathum cu an konglam hngalh a si ti lo tiah Mindat Zapi Ukhruainak in tuanvo ngei pakhat nih a chim.
Hi minung 4 tlaitu hna hi SAC ralkap LIB 274 battalion an si i, an tlaih mi hna hi ralram ah an thah theo hna lai ti zumh a si tiah a chim. Tlaih an si hnuah an konglam hngalh ti lo mi hna cu Pu Hung Ki, Pu Cho Ki, Pu Hung Choi hna an si, a luat mi pakhat hi sii-ai in thlop cuahmah lio a si tiah Mindat Peng Zapi Ukhruainak in tuanvo ngei pakhat nih a chim.
“A luatmi hi khuaruahhar ngai a si, anih zong hi fak ngai in an hrem. Lungfim lo tiang in an hrem. A thi cang ti i an ruah hnuah SAC nih an hlonh. A lung a hun fim hnuah a zaam i a luat mi a si” tiah a chim.
Tlaihkhih mi hna hi Mindat khua kiangkap mi hna an si i, kahdohnak ruangah Mindat khuachung Biakinn ah a luancia kum hnih hrawng khan aa dor mi an si tiah kan theih.
Mindat Ah SAC Ralhrang Nih Ralzaam Mi 3 An Thah, An Ruak Umnak Theih A Si Lo. Chin ramkulh, Mindat khuachung PCM biakinn ah a dormi ralzaam 4 cu SAC ralkap nih an tlaih hna. An tlaihmi hna mi 3 lak ah mi 3 cu thah an ton. An ruak cu chungkhar sin pe duh lo in khuazei an chiah ti theih a si lo.
July 16 ah Mindat khua hnu le sang um PCM biakinn ah aa dor mi ralzaam 4 cu Mindat hrambunh keralkap battalion 273 nih tlaih in an battalion camp ah an kal pi hna. Mi pakhat cu an hrem hna lio ah a tli/a luat manh. Midang 3 belte an thah hna tiah theih a si.
SAC ralhrawng nih an thah mi 3 hna cu, U Hong Ki, U Chiang Ki, U Hone Chuai an si. Thah a tonmi an ruak cu an chungkhar sin ah an pe duh hna lo. Tlaihnak in a luat mi tu hi sii in aa zohkhenh lio a si tiah khuami pakhat nih Yangon Khet Tit media ah a chim.
Ralhrang nih an thah mi 3 cu, Mindat khuachung khuasa mi an si i, khuachung kahdohnak a um hnu khuate lei ah an tli/zaam. Mindat khuachung ah an cim ta mi thlai tawre ba dum thiangh ding an ra `han i, PCM biakinn camp ah an um lio ah a tu bantuk in SAC ralhrang nih tlaih in thah an tonnak cu a si.