Matupi Peng Ah SAC Ralhrang Nih Vanlawng 2 In Bomb A Thlak, Tualchung Mi 9 Le AA Ralkap 2 Nunnak A Liam
==========
Chin ramlulh, Matupi peng, Weilu khua cu SAC ralhrang nih raltuknak vanlawng 2 in bomb a thlak caah tualchung mi 9 le Arakan Army(AA) ralkap 2 an nunnak a liam, tiah theih a si. November 15, zan suimilam 7:00 hrawng ah raltuknak vanlawng 2 in bomb a thlak.
Vanlawng pakhat nih biakinn le sianginn hna cu tinh chih in bomb a thlak hnawh caah sianginn 2 le Pres biakinn 1 hna an rawk. Pahnihnak vanlawng nih tualchung mi hna inn pawl cu tinh chih in bomb a thlak ṭhan caah inn 6 a rawk i, CDM a tuahmi Saya Ha Long le a chungkhar hna an dihlak minung 5 cu pakhat hmanh tang lo in an nunnak a liam, tiah theih a si.
“Nu he pa he nunnak liammi minung 11 an si. Cu chung ah cozah rianṭuantu telh in tualchung mi 9 an si i, Arakan Army(AA) ralkap 2 zong an i tel tiin kan theih. Cu pinah hliamhma tuarmi zong an tam i an dirhmun a chia ngaingai. Cucaah nunnak liammi zong an um chap kho men” tiah tualchung mi pakhat nih a chim.
“Kan khua ah kahdohnak zong a um lo. Kan khua pawng ah Arakan Army(AA) ralkap sakhan a um ruang ah atu bantuk in cunglei kahdohnak an tuah hi a si lai. Ka chungkhar zong an him le him lo ka thei kho lo. Phone line an phihpiak dih hna” tiah ramdang ummi Weilu khuami pakhat zong nih a chim ve.
Arakan Army(AA) ralkap nih Chin ramkulh, Paletwa peng chung ah umhmun an khuar caah Paletwa-Matupi ramri um Weilu khua cu AA ralkap an lutchuak lengmang i SAC ralhrang nih tinh chih in bomb a rak thlak hi a si, tiah Zalen nih a ṭial.
Theinni Peng Pyithuhsit Sakhan Cu TNLA Nih An Laak, Kyaukme Peng Ah Pehtlai In Kahdohnak A Chuak. Shan ramkulh, Theinni peng chung um Manlwin pyithuhsit ralhrang sakhan cu Ta’ang National Liberation Army(TNLA) nih an kahdoh i an laak khawh, tiah PSLF/TNLA nih nihin November 16 ah thawng an thanh.
November 15, zan suimilam 8:20 tluk ah Theinni peng chung ah umhmun khuarmi SAC ralhrang kuttang pyithuhsit sakhan cu PSLF/TNLA nih an kahdoh i an laak khawh, tiah an langhter. Cu pinah nihin November 16, zing suimilam 8:25 tluk ah Kyaukme peng, Nawng-ping khua lamṭhen ah umhmun khuarmi SAC ralhrang le PSLF/TNLA karlak ah kahdohnak a chuak, tiah theih a si. November 16, zing ah SAC ralhrang nih Nampheka le Nawnghkio peng um Homaw khua le Sin-hpyu-ye khua lei cu duhpaoh in hriamngan an kah hna, tiah Khit Thit nih ṭial.
Kokang Hmunram Chung Um SAC Ralhrang Sakhan 3 An Laak Chap, SAC Sakhan 147 An Laak Cang. Shan ramkulh chaklei, Kokang hmunram chung ah ummi SAC ralhrang sakhan 3 cu November 15 ah an laak chap i SAC sakhan 147 kan laak khawh cang. Kahdohnak ah SAC ralhrang 20 leng an thi, tiah Myanmar National Democratic Alliance Army(MNDAA) nih phungningte in thawng an thanh.
November 15, zing suimilam 6:30 tluk ah Kokang hmunram um Shinhpain-kine, Saikyauk-shan le Mawhtite-tarlainkal tlangcung hna ah ummi SAC ralhrang sakhan pawl cu luhhnawh in kan kahdoh hna i tlamtlingte in kan laak khawh pin ah hriamnam tamngai zong kan laak chih khawh. SAC ralhrang sakhan dihlak fonh 147 kan laak khawh cang, tiah an langhter.
“Kahdohnak ahcun SAC ralhrang chungtel 20 leng an thi i hliampu mi zong an tam pinah hriamnam tam ngai zong kan laak. A thimi ralhrang ruak cheukhat cu kan phum ta hna i, ruak cheukhat cu kan kaltak hna” tiah MNDAA ralhmai um Officer pakhat nih a chim.
Pauktaw Khuapi Cu AA Ralkap Nih An Humhak Dih Cang, SAC Nih Raltuknak Helicopter 3 In An Kah. Rakhine ramkulh, Pauktaw khuapi um palik sakhan telh in SAC ralhrang nih umhmun an khuarnak zung vialtel cu Arakan Army(AA) nih an laak khawh dih cang i November 16 ah Pauktaw khuapi cu an humhak cang, tiah theih a si.
November 15, zan ah Pauktaw khuapi palik sakhan cu AA ralkap nih an laak khawh i nihin November 16 zing ah SAC ralhrang nih umhmun an khuarnak zung vialte zong an laak khawh caah Pauktaw khuapi cu AA ralkap nih an humhak cang, tiah theih a si.
“Palik sakhan telh in zung vialte cu AA ralkap nih an laak khawh dih caah an humhak dih cang i sakhan uktu palik bawi telh in palik vialte zong AA ralkap nih an kalpi hna. SAC kuttang cozah ruanṭuan pawl cu zung chung ah an hren hna i zeitin an tuah hna lai timi kan thei fiang rih lo” tiah tualchung mi pakhat nih a chim.
Pauktaw khuapi palik sakhan cu November 15 zan ah AA ralkap nih meithal voi 10 leng an puah hnu ah biahalnak an tuah hna i an hriamnam chiah dih in an i pek hi a si, tiah tualchung thawngzamhnak Western News nih a langhter.
“Arakan Army(AA) nih atu bantuk in Pauktaw khuapi an humhak caah SAC ralhrang nih zing suimilam 10:00 hrawng ah raltuknak helicopter 3 in khuapi an hel i seh meithal pawl in an kah pinah bomb pawl zong an thlak. Tualchung mi hna cu a himnak hmun ah kan zaam hna i kum upa le a zaam kho lomi hna lawng khuapi chung ah an taang” tiah a dang tualchung mi pakhat nih a chim chap. Credit: Lungmili Post