Chin Ramkulh Telh In Sagaing Ramṭhen Le Rakhine Ramkulh Hna Ah Mi Vengtu Phu An Ser Hna – Zaw Min Thun
===========
Myanmar ram chung a him deuh lonak hmunram cheukhat hna ah cun cozah zung rianṭuan pawl nih mi vengtu phu an ser ko, tiah SAC chimnak nawl a ngeitu Zaw Min Thun nih fianghlang ngai in a chim.
Sagaing ramṭhen, Rakhine ramkulh le Chin ramkulh chung peng cheukhat ah atu bantukin phu an sernak, tiah Zaw Min Thun nih November 16 ah a chim.
SAC chimphuannak nawlngei Zaw Min Thun nih cun, “Naypyidaw um Minister zung ah mi vengtu phu an ser tibantuk le mi vengtu ralkap phu an ser tibantuk thawngpang a chuakmi kong he pehtlai in kahdohnak a daih rih lonak Sagaing ramṭhen chung peng cheukhat, Rakhine ramṭhen peng cheukhat, Chin ramkulh chung peng cheukhat hna an him khawh deuh nakhnga ca ah tiin mi vengtu phu an ser ko”, tiah a chim.
Reuters Media phu nih an langhter ning ah, cozah rianṭuan hna le ralkap hlun pawl cu lakhruak dirhmun ah timhciate um peng ding in SAC nih thanhnak an tuah hna. Myanmar ram chung cozah rianṭuan pawl cu ralkap cawnnak aa telmi cawnnak pawl cu Mandalay ramṭhen Zipingyi sianghleirun le Yangon ramṭhen Phaunggyi sianghleirun hna ah an rak cawng tawn nain SAC cozah tang ah cun an kaiter ti hna lo.
Cheukhat Hmunhma Ah Ralkap Council Nih Himnak Phu An Dirh. Daihnak a um lo nak hmunhma cheukhat hna ah ralkap kuttang zung rianṭuantu pawl hmang in himnak phu kan dirh tiah ralkap council chimphuannak nawl a ngeitu Zaw Min Htun nih a chim. Sagaing ramṭhen, Rakhine ram le Chin ramkulh chung peng cheukhat hna ah atu bantuk in himnak phu an dirh hi a si tiah November 16 ah ralkap lei nih thawng an thanh.
“Naypyitaw ah a um mi Vanci zung pawl ah himnak phu kan dirh, daihnak a um lo mi Sagaing ramṭhen khua cheukhat, Rakhine ram khua cheukhat le Chin ramkulh chung khua cheukhat hna zong ah dirh a si” tiah a chim. Reuters nih a ṭial mi thawng pakhat ahcun ralkap kuttang cozah rianṭuantu pawl le ralkap hlun pawl zong kha timh cia tein um zungzal ding tiah ralkap council nih an fial hna tiah RFA nih a langhter.
Pakokku Peng, Pandai Ah Hmunhma A Khuar Mi Ralkap An Kah Hna. Magway ramthen, Pakokku peng, Pandaichung ah hmunhma a khuar mi ralkap gate sakhaan cu November 15 zinglei ah dothlennnak phu nih a naih tein an va kah hna i ralkap 1 a thi, 3 an i hliam tiah Young Force – UG nih a thanh. Kahdohnak chung ah bawmhnak pek ding in Pakokku khua in a rak chuak mi ralkap pawl cu Young Force-UG nih backup phu nih an va kah hna tiah an thanh.
Salingyi Peng, Kya-tet Khua Palek Sakhaan An Lak. Sagaing ramṭhen, Salingyi peng, Kya-tet khua palek sakhaan cu an lak khawh i palek le ralkap tampi zong an zaam tiah theih a si.
November 15 chun sml 1:00pm hrawng ah Salingyi peng, Kya-tet khua palek sakhaan cu PDF phu pawl nih an kah hna caah palek le ralkap tampi cu Pale khuapi chung ah an zaam dih tiah theih a si.
Cu Kya-tet khua palek sakhaan cu PDF phu pawl nih an uk khawh dih cang tiah NUG Ministry of Defense nih a thanh.
Ta-Hlian Tlang Sakhaan MNDAA Nih An Lak Chap. A luancia November 15 ah unau hawikom phu hna nih Kokang pengkomh, Maw-Hteik pawng ah a um mi ralkap sakhaan pawl an lak chap i Hung-ai le Maw-Hteik karlak pehtlaihnak lam cu an awn ṭhan cang tiah MNDAA nih an thanh.
November 15 thawk in cuka hmunhma ah a um mi ralkap sakhaan le byuha sakhaan pawl cu pakhat hnu pakhat in an an lak thluahmah i, Maw-Hteik hmunhma kahdohnak chung ah M56A1 hriamngan telh in hriam tampi an lak khawh tiah an langhter.
Maw-Hteik hmunhma ah a um mi ralkap sakhaan zapi an fim khawh dih cang i Kokang, Ton-shan hmunhma le Lauk-hmu-kyo tlang ah a um mi ralkap caah a biapi tak mi sakhaan pawl zong an lak tiah theih a si. November 16, Operation 1027 a ni 21 nak tiang ah MNDAA nih ralkap sakhaan 150 leng an lak khawh cang tiah phungning tein an thanh.
Kunlong Khua Ah Ralkap Sin In An Hmuh Mi Tank An Mawngh. Shan ram chaklei, Kunlong khua ah ralkap sin in an lak khawh mi tank cu BPLA nih an mawngh tiah theih a si. November 12 Kunlong khua Byuha sakhaan an lak lio ah tank 4 cu nikhat chung ah an lak khawh.
Tamu le Khampat Ah A Um Mi Ralkap LIB-228 Sakhaan An Lak. Sagaing ramṭhen, Tamu pengkomh, Tamu peng le Khampat khua ah a um mi ralkap LIB 228 sakhaan cu an lak i hriam cheukhat zong an lak khawh tiah NUG Ministry of Defense nih a thanh. November 3 zinglei sml 7:00am ah Khampat khua ah a um mi Captain Win Naing Soe nih hruai mi LIB 228 ah palek, ralkap le pyusawthi 48 nih hmunhma an khuarnak Khampat sakhaan, palek sakhaan le sizung hna cu RCDF, CNDF, WZ-1 hna nih an kah i sakhaan an lak beh tiah theih a si.
Kahdohnak chung ah ralkap lei 1 a thi i 20 hrawng hliam an tuar, ralkap lei nih vanlei kahdohnak voi 10 leng a tuah caah dothlennak phu lei 2 an nunnak a liam. Ralkap lei hriamhme phun 12, kuan 9800 leng, bom 30 leng le kahdohnak thilri pawl an lak khawh tiah theih a si.
November 3 zong ah Tamu peng, Wi-toh khuate ah ah a um mi Captain Tin Htoo Aung hruai mi LIB 228 cu palek le pyusawthi 30 hrawng nih hmunhma an khuarnak sakhaan cu KNAB, ABSDF hna nih an kah i an lak beh tiah theih a si. Kahdohnak chung ah ralkap lei 2 an thi i 3 an i hliam i dothlennak phu lei 3 (KNAB lei 2) le (ABSDF lei 1) an nunnak a liam. Ralkap lei kuttuah meithal zuun 14, kuan 3,400 leng, bom 1, bomrap 2 hna an lak tiah theih a si.