Paletwa Peng Ah AA Nih Tualchung Mi An Phone Sim Card An Laakpiak Hna
========
Chin ramkulh, Paletwa peng ah AA nih tualchung mi hna cu an phone sim card an laakpiak hna, tiah theih a si. December 23 zinglei ah AA nih MPT sim card cu inn khat hnu inn khat lut in an chuh hna i zei ruang ah dah an laakpiak hna i an chuh hna ti cu hngalh a si lo.
AA nih nihin December 23 ah Sami ralhrial telh in Michaung thluan ah a ummi khuate tampi ah MPT sim card cu an chuh hna. A luancia November 15 lio zong ah Pichaung hmunram um khuate 10 leng ah tualchung mi hna hman mi MPT sim card cu AA nih an rak chuh cang hna i an pe ṭhan ti hna lo, tiah theih a si. Paletwa peng ah SAC ralkap nih ti lam le tlang lam vialte cu an kham dih leng ah AA nih i pehtlaihnak phone sim card an phih ve, tiah tualchung mi hna sinin theih a si.
Gangaw Peng Myint Thar Dam SAC Ralkap Sakhan Cu Chin Hriamtlai Phu Nih An Laak. Magway ramṭhen, Gangaw peng um Myint Thar Dam SAC ralkap sakhan cu nizan December 22 zinglei ah Chin hriamtlai phu nih an laak, tiah theih a si.
Myin Thar Dam um SAC ralkap pawl cu Gangaw hrambunh Khah Lah Yah 50 an si i an sakhan cu ZZLMS; CDF-Mindat, CNDF, CDF-KKG le PDF hna i bawm in an kah i an laak. Sakhan in a zaammi SAC ralkap pawl zong an dawi hna, tiah theih a si.
Myint Thar Dam SAC ralkap sakhan kahdohnak ah SAC ralkap Fighter pathum nih bomb an thlak pinah sakhan chung um ralkap nih hriamngan an kah i, Chin hriamtlai phu lei in hliamhma pumi an umnak kong CDF – KKG he naihniam in a ummi pakhat nih The Chin Post ah a chim.
Myint Thar Dam kahdohnak ah CDF Mindat in rallam hruaitu pakhat a nunnak a liam, tiah theih a si. Myint Thar Dam um SAC ralkap hi kum khat leng chung umhmun an khuar cang i Gangaw khua chung ah motor in ral an va ven tawnnak kong tualchung mi hna nih an chim.
Laukkai Khuapi Chung Ah SAC Ralkap Nih Vanlawng In Bomb An Thlak. Shan ramkulh chaklei, Laukkai khuachung ah kahdohnak a chuak i, SAC ralkap nih vanlawng in bomb an thlak pinah ralkap thazaang an chap caah kahdohnak a zual, tiah Tuluk-Myanmar rammi ummi hna nih an chim. December 19 thawk in Laukkai peng kip ah kahdohnak a zual i SAC ralkap nih sakhan an sungh lonak ding ah ralkap thazaang tampi an chap, tiah theih a si.
SAC ralkap nih Laukkai Dah Kah Sah sakhan pi ah ralkap thazaang tampi an chap i Parachute in ralkap an thlak hna. A bik in MNDAA nih an laakmi hmunram cheukhat ah raltuknak vanlawng an hman i bomb an thlaknak kong ramri ummi hna nih an chim. Kahdohnak a daih khawhnak ding ah Tuluk palai hna zong nih kaphnih remdaihnak tuah an timh tawn i nawlnak zong an tuah tawn, tiah Naypyitaw um SAC ralkap chung ummi hna nih an chim.
Malaysia Ah Myanmar Rammi 500 Hrawng Nawlngeitu Nih An Tlaih Hna. Malaysia ram, Kuala Lumpur khua lai ah nizan December 21 ah Myanmar rammi telh in ramdang mi 500-1000 kar cu nawlngeitu nih an tlaih hna, tiah Malaysia hrambunh Myanmar rammi bawmchantu San Win nih a chim.
Tlaih a tongmi hna chung ah Bangladesh rammi an tam bik i a changtu ah Myanmar rammi an si lai ti an zumh. Myanmar mi hna hi Myanmar restaurant i rawl an ei lioah tlaih an sinak kong Myanmar rammi bawmchantu hruaitu San Win nih cun a chim.
Myanmar rammi telh in ramdang mi tam deuh hi R2K tiin auhmi phungning tein rianṭuan khawhnak permit an ngeih lo ca ah le permit a deu in a ummi an tam caah palik le immigration minung 1000 hrawng nih an kawl hna i an tlaih hna, tiah theih a si.
Malaysia cozah sinah ngunkhuai a pe lomi Myanmar restaurant hna, permit a ngei lomi le passport deu aa tlaihmi pawl cu dantat an si lai i phungning tein a ummi le permit a ngeimi hna cu thlah an si te lai, tiah an chim.
Malaysia ram ah phung loin a lutmi le a umi Myanmar, Indonesia le Bangladesh rammi hna cu Malaysia nawlngeitu nih an tlaih tawn hna. Myanmar rammi nih licence loin motor khalh lo le Christmas, Kum thar karah umkal i ralrin a herh kong Myanmar mi bawmchantu phu hruaitu San Win nih cun a chim.