Chin ramkulh, Mindat peng ah SAC ralhrang nih tualchung mi hna tlaihkhihnak an tuah i nitlak thlanglei hmun um Ruitui khua ah ralhrang thazaang 100 tluk nih kumtling lo ngakchia telh in tualchung mi 4 an tlaih hna i an kalpi hna, tiah tualchung mi hna nih an chim.
“2024, February 25, zing suimilam 10:00 tluk ah Meng 5 hmun in a rak ṭummi SAC ralhrang pawl nih kumtling lo ngakchia telh in tualchung mi pa 4 an tlaih hna i SAC Khah-lah-yiah 274 Battalion hmun ah an kalpi hna. Zeiruang ah an tlaih hna timi cu kan thei kho rih lo” tiah tualchung mi pakhat nih a chim.
Tlaihkhih tongmi tualchung mi 4 lak ah kumtling lomi 1 cu nizan Februar 25 chun ah SAC ralhrang nih an thlah ṭhan nain a dang 3 tu cu an konglam theih khawh an si rih lo, tiah kan theih.
Cu pinah Mindat khuapi in meng 3 aa hlatnak hmun Paanoat khua kalnak thluangthluan ah a kalmi hna tualchung mi paoh cu ralhrang pawl nih an tlaih hna i an kalpi hna pinah an Cycle pawl zong an chuh hna, tiah theih chih a si.Lungmili Post
Thawngpang dang: Chin ramkulh, Hakha khuapi chung ummi SAC ralhrang chungtel Dr.Hmuh Thang inn cu Chinland Defense Force – Hakha Central Council nih February 25, ah mizapi caah an chuh, tiah theih a si.
Dr. Hmuh Thang hi Chin ramkulh, Thantlang khuami a si i SAC ralhrang nih nawlngeihnak an laak hlan ah Chin ramkulh USDP chairman a rak ṭuanmi a si. SAC ralhrang nih nawlngeihnak an laak hnu zong ah mizapi lei ṭang loin SAC ralhrang hna he pehtlai in rian an ṭuanṭi rih.
Cu pinah September 15, 2023 ah SAC ralhrang nih tuah ding in timhlamhnak an ngeihmi thimnak zong ah mizapi hna i tel ding in a lemsoi hna caah a tubantuk in Hakha, Sakta lam ummi a inn cu nawlpeknak No. 1/2024 in mizapi ngeihmi si dingin kan chuh cang. Khuapau dothlennak kan tuah chung vialte CDF-Hakha nih a herh ning in kan hman lai, tiah an thanh.
February 1, 2021 ah SAC ralhrang nih nawlngeihnak an rak laak i Thantlang peng chung kahdohnak cu April, 2021 in an rak thok. Kahdohnak aa thok tlawmpal a rauh ah Thantlang khua um Dr. Hmuh Thang inn cu mizapi ralkap hna nih kut cheh bomb in an puahhnawh i ralrin an rak pek bel cang, tiah theih a si.