CNDF Nih Ram Le Miphun Ca Nunnak Petu Chin Pasalṭha Salai Thawng Hu Lian Thlahnak Le Upat Peknak Cathanh Chuah
==========
Chin National Defense Force(CNDF) nih ram le miphun ca ah nunnak a petu Salai Thawng Hu Lian (kum 18) thlahnak le upat peknak cathanh cu nihin December 15 ah an chuah.
CNDF pasalṭha Salai Thawng Hu Lian cu amah biakam bantuk tein ram le miphun ca ah tiin dohthlen cawlcanghnak ah hriam tlai in Khampat khuapi kiangkap kahdohnak ah SAC ralkap nih December 5 ni ah an rak tlaih i ramlak ah an rak thah.
Cu kong he pehtlai in CNDF nih ram le miphun ca ah tiin dohthlennak ah pumpek in rian a ṭuan i a nunnak tiang a petu Salai Sang Hu Lian, nangmah cu na ṭuanṭi hawi CNO/CNDF nih upatnak sang bik kan in pek i, na kaltakmi na chungkhar hna he kan tuarṭi i kan tuar ning aa khat, tiah an thanh.
Chin pasalṭha miphun ralkap Salai Thawng Hu Lian, ram le miphun ca na rak i pumpeknak cung ah upatnak sang bik kan in pek i miphun ca ah chungmang na rak manhmi vialte a tlam a tlin nakhnga na kaltakmi na ṭuanṭi hawi CNO/CNDF ni philh hin lo in hramhram in nawlngeihnak a latu SAC ralkap an hram bongh tiang kan rak doh lai, ram le miphun ca nunnak rak liammi na ṭuanpi pasalṭha hna le na min chal in bia kan in kamh hna, tiah CNDF nih cun cathanh an chuah.
Sagaing Ramṭhen Le Magwe Ramṭhen In SAC Minung 1,000 Tluk Nih CDM An Tuah Tiah NUG Nih An Chim.Sagaing ramṭhen le Magwe ramṭhen in SAC kuttang zung rianṭuan liomi minung 890 nih NUG sin ah CDM an tuah, tiah NUG in chimnak nawlngei Nay Bone Lat nih December 14 ni ah RFA ah a chim.
Sagaing ramṭhen Kawlin, Wangthu, Htichaingh, Katha, Indaw, Kyunhla, Monywa, Butalin, Myinmu, Myaung, Tanhsi khuapi in minung 558 nih CDM an tuah i Magwe ramṭhen Htilin khuapi in minung 522 nih CDM an tuah, tiah Nay Bone Lat nih a chim.
NUG sin ah CDM a tuahmi 1,000 tluk chung ah a tam deuh cu zung rianṭuan an si i hriamnam aa tlaihmi palik le ralkap an i tel lo. CDM a tuahmi chung in SAC nih nuhrin covo an buarnak kong ah pehtlaihnak a ngeimi zung rianṭuan hna cu phunglam he aa tlak ning in dantat an si ṭhiamṭhiam lai, tiah NUG chimnak nawlngeitu nih cun a chim.
Non-CDM hna kong he pehtlai in December 12 ni ah SAC chimnak nawlngei Zaw Min Thun nih cun, “Cozah rianṭuantu hna le humhimnak latu palik, ralkap hna cu tualchung hriamtlai phu nih hramhram in an rian chuahtak ding in an fial hnanak le an tlerhkhonh hnanak hmuh tik ah hihi phunglam he aa kalhmi a si i mizapi nih an cohlan ṭhiam ko ahcun atu bantukin cozah rianṭuantu hna ṭhihpheih le tlerhkhonh a herh lonak kong mipi dihlak nih ruah caan a cu cang,” tiah SAC tlaihmi Media ah a chim ve.
Shan ramkulh chaklei ah October 27 ni thawk in 1027 Operation kalpi a si hnu ah Sagaing ramṭhen chung Kawlin, Khampat, Shwepyiaye le Mawluu khuapi hna cu tualchung hriamtlai phu nih an uk khawh i SAC kuttang ah rian a ṭuan rihmi Non-CDM vialte cu mipi sin ah i fonh ding in ralrin peknak he sawmnak an tuah.Credit: The Chin Post