Kalaymyo Peng Ah Chin Mino Biakmuana Cu SAC Ralhrang Nih An Thah, Nu 2 Telh In Minung 5 An Tlaih Hna
=========
Sagaing ramṭhen, Kalay peng, Khawpuichhip khuami Salai Biakmuana (Kum 27) cu nizan 2024, January 24 zanlei ah SAC ralhrang nih an thah i, tualchung mi nu 2 telh in minung 5 zong an tlaih hna, tiah theih a si.
Kalaymyo chaklei hmun um Khawpuichhit khua le Pyinkhonlay karlak ah nizan January 24 chun ah tualchung hriamtlai phu hna le SAC ralhrang kar kahdohnak a chuak hnu ah ralhrial ding in khuachung i thilri a laak lio ah Salai Biakmuana cu SAC ralhrang nih an tlaih i an thah, tiah thah a tongmi Salai Biakmuana he naihniam pakhat nih a chim, “Ralhrial dingin Aih-suat khuapawng a phak hnu ah inn lei ah thilri ka fim ta lai a ti i, a kir lio ah SAC ralhrang nih an rak tlaih i an thah.
A ruak cu puan in an zual i an kaltaak. A hngawng ah meithal kahnak hma maw a si, namte sawhnak hma dek, hma faak ngai hmuh a si” tiah a chim chap. Cu pinah SAC ralhrang pawl nih Khawpuichhip khua a laifang ah tualchung mi pa 3 le nu 2 (An dihlak minung 5) an tlaih hna i Kalaymyo khuapi Dah-kah-sah ah an kalpi hna hnu, chunlai ah an 5 in an thlah ṭhan hna.
“An 5 ningin an thlah ṭhan hna. Lakphakti man ah tiin tangka tlawmpal cu an pek hna. An phone cu SAC ralhrang pawl nih an pe ti hna lo nain hremnak zeihmanh an pe hraw hna lo” tiah tlaihkhih a tong mi hna he naihniam pakhat nih Khonumthung Burmese ah a chim ve. Khawpuichhip khua cu Tahan he meng 2 tluk aa hlatnak hmun ah a ummi khua a si i, tualchung mi hna cu Aih-suat khua le Tahan ah ralhrial in an i dor hna, tiah theih a si.
Kalaymyo Ah SAC Ralkap Nih Chinmi Pakhat An Thah. Sagaing ramṭhen, Kalaymyo peng Khawpuichhip khua mi Biakmuana(kum 27) cu SAC ralkap nih January 24 zanlei ah an thah, tiah theih a si. Khawpuichhip le Pinkhonelay khua karlak ah January 24 ah SAC ralkap le PDF kar kahdohnak a chuah hnu in ralhrial dingin a kal lioah SAC ralkap nih an tlaih i an thah, tiah Biakmuana he naihniam in a ummi pakhat nih a chim.
Biakmuana hi ralhrial dingin a kal cang ko nain inn chung thilri va fim dingah a kir ṭhan i cu lioah cun SAC ralkap he i tong in an thah. SAC ralkap nih a ruak cu puan in an tom. An hngawng ah meithal kuan hma a si lo cun nam sawhnak hma zong a um, tiah a chim chap.
Cu pinah SAC ralkap nih Khawpuichhip khua center pakhat ah pa 5 an tlaih hna i, Kalaymyo Dah Kah Sah ah an chiah hna, nihin January 25 ah an thlah ṭhan hna nain an phone an chuh hna i an pe ti hna lo, tiah theih a si.
Hsihseng Khuapi Um Palik Sakhan Cu PNLA Nih An Laak. Shan ramkulh thlanglei, Hsihseng khuapi um palik sakhan cu nizan January 24 zan ah Pa-O National Liberation Army(PNLA) nih an laak, tiah tualchung mi hna sinin theih a si.
2024, January 24, zanlei sang ah Hsihseng khuapi thlanglei, Ponglawng hmunram cu kahdohnak um lo bu ah SAC ralhrang nih cunglei in bomb a thlak hnu in Hsihseng khuapi ah kahdohnak a chuak i zan suimilam 7:00 tluk ah palik sakhan cu PNLA nih an laak khawh, tiah tualchung mi hna nih an chim.
“Palik sakhan cu an laak khawh cang i, atu cu kahdohnak a dai cang. SAC ralhrang nih pehtlai in hriamngan an kah len. Palik thazaang an um rua lo i kap 2 kahdohnak a fah hlan ah sakhan cu an laak. Kahdohnak a chuah hlan in palik pawl nih an sakhan cu an chuahtak i an zaam” tiah Hsihseng khuapi tualchung mi pakhat nih Tachileik News Agency ah a chim.
Kahdohnak a chuah lio ah SAC ralhrang Battalion pawl simi (425) le (426) nih palik pawl cu bawmh ding in Hsihseng khuapi hrambunh SAC ralhrang Khah-mah-yiah 424 Battalion sinah an rak phan hna, tiah tualchung mi hna nihcun an chim.