CDF – Hualngoram Nih Non-CDM Vialte Cu November 30 Hlanah CDM Tuah Dih Ding In Thawng An thanh Hna
===========
Chinland Defence Force – Hualngoram le Hualngoram CDM Department nih November 10 ah Non CDM hna kong ah biachahnak an ngeihmi kong he pehtlai in thawngthanhnak an tuah i Non-CDM vialte cu November 30 tiang CDM tuah dingin caan an pek hna.
“CDM a tuah rih lomi Non-CDM aho paoh nih kan phanh laimi November 30 tiang ah an rianṭuan liomi an chuahtaknak ca cu CDF – Hualngoram le Hualngoram CDM Department sin ah an rak pek khawh. Caan onhmi chung ah a pe duh lomi cu Hualngoram chung ah um le luh kham an si lai.
Rian tlaih liomi chuahtak ṭung lo in Hualngoram chung ah khuasa in a lutchuakmi cu CDF – Hualngoram le HCD nih dantatnak a pek hna lai,” tiah CDF – Hualngoram le HCD nih an biachahmi cu an langhter. A luancia October thla hramthawk lio zong ah ṭha tein CDM tuahmi hna kong he pehtlai in Mizoram, Champhai um CDM a tuahmi hna sin ah thawngthanhnak an rak tuah bal cang.
Mindat Khuapi Pawng Khuate Hna Cu SAC Ralhrang Nih Duhpaoh In Hriamngan An Kah. 2023, November 11 ah Chin ramkulh, Mindat khuapi pawng, Khuate hna le Mindat-Matupi lampi lei cu SAC ralhrang nih 274 battalion SAC nu pawl cu 120 MM hriamngan kah training an pek hna i voi 10 renglo duhpaoh in an kah, tiah theih a si.
“Mindat khua pawngkam khuate pawl cu duhpaoh in an kah hna. Zeiruang ah an kah hna timi cu theih a si lo. Cu hlan zong ah atu bantuk in an kah leng mang. Thinlung lei damlonak a ngeimi hna le mizaw pawl caah cun a ṭha lo ngaingai. Zan ah hriamngan puak thawng kan theih ahcun kan i hngilh kho ti lo” tiah Mindat khuapi tualchung mi pakhat nih a chim.
SAC ralhrang nih atu bantuk in duhpaoh in an kahmi hriamngan ruang ah nunnak liammi, hliamhma tuarmi le innlo rawk mi kong ah thawngfiang kan theikho rih lo. Duhpaoh in hriamngan an kah lengmang ruang ah innlo rawkmi zong a tam cang i, mipi nunnak liammi zong an tlawm ti lo, tiah a chim chap. Mindat peng ah SAC ralhrang nih November thla chung ah cunglei le hriamngan pawl duhpaoh in an kah mi ruang ah mipi inn 18, biaknak lei he aa pehtlaimi inn 6 le sianginn 2 a rawk, tiah theih a si.
Sami Khuachung Ah Tlaih A Tongmi Tualchung Mi 4 Cu Ni Khat Hnu Ah An Thlah Ṭhan Hna. A luancia November 4, zinglei ah CNA le SAC ralkap kaphnih kar kahdohnak a chuah hnu ah Paletwa peng Hiwa khuami 4 hna cu SAC ralkap nih an umnak inn ah an tlaih hna i ni khat hnu ah an thlah ṭhan hna, tiah theih a si.
Tlaih a tongmi Hiwa khuami 4 cu; U Aung Nan, U Man Kha, U Tet Lin Aung le U Sein Hla hna an si i November 9 lioah Sami sakhan ah an rak kalpi hna, tiah tualchung mi pakhat a chim. November 4 lioah Sami khua Bawa sang chung ah sakhan in a rak lawimi SAC ralkap pawl cu CNA nih a kah hna i 4 an thi, cu hnu ah kaphnih kar fak ngaiin kahdohnak a chuak i CNA nih meithal pakhat an laak khawh.
Tlaih a tongmi tualchung mi 4 cu SAC ralkap nih CNA sin ah meithal laak an fial hna, tiah an chim. Kaphnih kar fak ngaiin kahdohnak a rak chuah ruang ah Bawa sang mi nausem pom lio nu pakhat zong meithal nih a rak hliam i Sittwe siizung ah an rak kalpi, tiah theih a si.
Kokang Pengkomh, Tonshan (တုန်းရှမ်း)Hmunram SAC Ralkap Sakhan 2 Le Laukkai Peng Sakhan 4 Cu MNDAA Nih An Laak. Shan ramkulh, Kokang pengkomh, Tonshan (တုန်းရှမ်း) hmunram SAC ralkap sakhan 2 cu MNDAA nih nizan ah an laak khawh i Laukkai peng ralkap sakhan 4 zong November 9 ah an laak khawh, tiah MNDAA thawngthanhtu The Kokang nih a thanh.
1027 Operation ni 15 tiang ah Kokang MNDAA nih SAC ralkap sakhan a ngan he a fa he a zate ah 133 an laak khawh, tiah theih a si. Nizan November 10, zinglei 5:30 ah MNDAA nih Tonshan hmunram Taton (တာတုန်း) hmun SAC ralkap sakhan cu Drone in an kah i zinglei 6:30 ah an laak khawh, sakhan chung ummi ralkap zong an zaam dih, tiah theih a si.
Nizan November 10, zinglei 8:00 hrawng ah MNDAA ralkap hna nih Siyunkyi (ရှီယွင်ကြည်)khua pawng Laukchunpu (လောက်ချွင်ပု) sakhan ah a ummi Pyituhsit pawl cu an kah hna i zinglei 8:20 ah Laukchunpu sakhan zong an laak khawh. Cu sakhan laak kahdohnak ah cun SAC ralkap 3 le Pyituhsit 11 an thi, 3 hliam an pu i 1 an tlaih khawh. SAC ralkap motor 3 zong an hrawh khawh i hriamngan zeimawzat zong an laak, tiah theih a si.
Cu pin ah November 9 ni ah chaklei hriamtlai phu unau thum nih Kokang ah rallam a sialmi SAC ralkap pawl cu an kah hna i Siyunkyi khua, Shishan (ရှီရှမ်)hmunram, Tashwethan (တာရွှေထန်) khuakomh le Manlaw (မန်လော်) khuakomh um ralkap sakhan 4 cu an laak khawh, tiah theih a si.