Chin 80% Lungtlingpimi Chinland Council hi a za tuk ko!
===========
Vawleicung tuanbia ah miphun fatete kha miphunpi nih a rialdit tikah miphun fa tete kha an tangrual tawn, an tonmi harnak nih nationalism thinlung a putter tawn hna. Serhsathnak an tonning fah paoh le an lung an i rual deuhdeuh ve tawn.
Kan nih Chinmi hi zei khuachia ko nih dah kan chungah a kan luhhnawh hnga i mahtluk dirhmun kan dir cang hnu zongah, ar ngal hmanh a khiak kho huaha lo ding tete nih hin, cu e! kha e! kan ti peng rih hnga? Uite airemlomi hmanh hmundang uite nih an seh ahcun an i chan lio ah, mah uite unau lila seh i timh phun hna in kan um rih hi cu a mak ko.
Kan dam taktak nak ding ahcun CNF/A hi thawng chin lengmang sehlaw dinfelnak he raltha lawlaw in hung kan uk ko seh. Phundang in kan chim a si ahcun Chinland Council hi thawnter lawlaw ko usih. Minung 100% lungrual dih timi cứ vawleicung ah a um kho lomi thil asi, Chinmi ca le bang ahcun ”no way” khi asi ko. 50% kan lung ai hmumi kan um ahcun a za, tu Chinland Council hi 80% hrawng lungtlinmi asi caah a za tuk ko Chinland cozah ser nak dingah cun.
Dingfel tein le raltha taktak in an goal leiah an tlik peng ko asi ahcun, a duh lomi team nih an fuh te ko lai, cu asilo hmanh ah a thawh chin lengmang ahcun a humham linhsat nih a rak duh lomi pawl kha a kangh viar thiamthiam ko hna lai. Abiapi cu raltha taktak in Chin State pumpi ah full power in rian an tuan ngam kha asi ko. Ralhrang hi cu tuning tein cun sau a awk ti lai lo caah, Chin cozah an sinak kha raltha taktak in an kalpi ah a thacem lai.
CNF/A hi hruh tanh in ka tanh asi nemmam lo, kan Chin miphun kan damnak solution um chun cu a thawng bikmi ah i fonh hi asi ti a fian caah asi. Chin mipi/pengtlang kip duhning le an duhnak vialte he lung tlinnak in cozah ser khawh ding cu Vancung khua zongah a um khawh ti lai ka zum ti lo kei cu. Cucaah tu bantuk CC hi thazaang pe hna usihlaw dinfelnak, thleidannak umlo le raltha tein hmai a kal ko asi ahcun an vun i fonh cio te lai ka zumh.
Chinland Council le CNF/A hi a tanhtuk mi ah ka ruat hlah u, Chinmi cozah sernak ding ah le lungrualnak dingah lamdang a um ti in ka hmuh lo caah asi. Cunak tha nan theih asi ahcun comment ah vun chim cio hnik u.
Hakha, Thantlang, Falam etc. timi hi miphun min an si bal lo, Pengtlang or Myone min sawhsawh an si. An miphun min taktak cu LAI asi i Lailun in a rak ra mi an si. Cu hna cu Chin miphun tang i a ummi miphun hme te an si. Minung an hung karh deuh hnu le Kawl miphun he hmunkhat ah khua sak a van si hnu in pengtlang or myone dangdang ah then an hun si.
Pengtlang or Myone ah a then tu hna cu Kawl an si i Miphun ah arak sertu hna cu a nung Pathian asi. Cucaah LAI miphun sinak a tanh deuh tu cu a ser tu Pathian a daw tu an si i pengtlang tanhnak thinlung a nei mi cu kawl a tanh tu an si pin ah sertu Pathian zei a rel lo mi an si. Jocab fale cu an nu le lei in an dir ahcun mi dang dang an si i khat le khat an i do nain an pa lei in an dir ahcun Jacob pakhat fale sinak in rem te in an um kho! Bawipa nih fiannak kan pe ko seh!
Aw Chinram Kan Ram; Pasaltha hna nih an thisen le nunnak in an ven zungzalmi, ramdang vanhailo tein a chung ummi ti rawl nih a cawm zungzalmi, tupi le hmawng thatha a rak umnak ram, ramsai, fung le cakei tiang nih duhdim tein an rak tlawnlennak ram.
Atu ahcun fingtlang kip cuanh ah thingkung banbawr tia hmanh hmuh a har cang mu, ramsa le nga tlaih ding hmanh hmuh awk an um ti lo, kan tiva le cerh nih kum khat hnu kum khat in an reu chin lengmang cang. Zei ngaingai i kan rel lomi Mar pawl hmanh nih vawleicung tlangsang bik le rili thukbik tiang an kai kho cang, an nupawl tiang nih Mount Everest tiangin an kai cang, kan ram Rih tidil tawne tiang in an hun kan luh kanh dih cang mu.
Ruah lengmang ah lung a fak lo maw? Thanchonak tlangpar ah kan hawidang an kai cuahmah lio ah kan nih Chinmi vial nih ”lungrualnak” kong lawngah kan i buaipi rihmi hi kan fingtlang le ramsa nih an tuartuk cang lo maw? Kan tufa hna ton dingmi kong nan ruah ahhin nan celh cio ko maw?