Lainawn ruang ah thih hlan lo thong tla ding in Myanmar ralzaam pakhat Champhai Biaceih Zung nih bia a khiahpiak Myanmar ralzaam dirhmun in Mizoram, Champhai Distric, Khawbung khua ah aa dor lio mi Pu Hrang Than Che nih mi a thah caah Champhai Biaceih Zung nih thih hlan lo thong tla ding in nizan July 27 ah bia a khiah tiah kan theih.
Pu Hrang Than Che, kum 38 nih khua Chaklei mi sumdawng Pu Ngo Khan Do cu ni kum 2022 August thla ah khan a rak thah i, a thahnak evidence kip ngeih a si hnu ah Champhai Biaceih Zung nih biakhiahnak pahnih in sual a phawt tiah kan theih.
Biaceih Zung nih Pu Hrang Than Che cu, rian hraang he thih hlan lo thong tla ding le tangka thong hra liam ding in a pakhatnak biakhiahnak a tuah. Cun, Pu Hrang Than Che nih tet-te (Evidence) um lo ding in ruak a thuh ruang ah kum thum chung thong tla ding le tangka Rs. 50,000 liam ding in a pahnihnak biakhiahpiak a si.
“Pu Hrang Than Che nih 2023 kum ah khan Myanmar ram, Langzang khuami sumdawng Pu Ngo Khan Do sin ah thingahnak seh pakhat cu Rs. 35,000 in a rak cawk. Rs. 20,000 cu kutcung chanh in a pek i a taang mi cu kan bat lai tiah a rak ti. 2022 August 13 ah Pu Ngo Khan Do nih leiba hal ding in Pu Hrang Than Che cu inn ah a va fuh.
Ruah lo pi in Pu Hrang Than Che nih sobul in voi tam ngai a tuk i a thih hlan lo a hrom a dih. A thih hnu ah a ruak cu thlalangawng in a thlak i tikhor ah a thuh,” tiah Champhai Cable Network nih a langhter. Hrang Than Che nih ruak a thuh lio hi midang nih an hmuh caah Khawbung khuatlang hruaitu sinah amah tein aa pe colh i, Dungtlang Palek nih an tlaih colh tiah theih a si. Credit: The Hakha Post
Relchap: Mindat Ah SAC Ralhrang Nih Ralzaam Mi 3 An Thah, An Ruak Umnak Theih A Si Lo Chin ramkulh, Mindat khuachung PCM biakinn ah a dormi ralzaam 4 cu SAC ralkap nih an tlaih hna.An tlaihmi hna mi 3 lak ah mi 3 cu thah an ton. An ruak cu chungkhar sin pe duh lo in khuazei an chiah ti theih a si lo.
July 16 ah Mindat khua hnu le sang um PCM biakinn ah aa dor mi ralzaam 4 cu Mindat hrambunh keralkap battalion 273 nih tlaih in an battalion camp ah an kal pi hna. Mi pakhat cu an hrem hna lio ah a tli/a luat manh. Midang 3 belte an thah hna tiah theih a si.
SAC ralhrawng nih an thah mi 3 hna cu, U Hong Ki, U Chiang Ki, U Hone Chuai an si. Thah a tonmi an ruak cu an chungkhar sin ah an pe duh hna lo. Tlaihnak in a luat mi tu hi sii in aa zohkhenh lio a si tiah khuami pakhat nih Yangon Khet Tit media ah a chim.
Ralhrang nih an thah mi 3 cu, Mindat khuachung khuasa mi an si i, khuachung kahdohnak a um hnu khuate lei ah an tli/zaam. Mindat khuachung ah an cim ta mi thlai tawre ba dum thiangh ding an ra `han i, PCM biakinn camp ah an um lio ah a tu bantuk in SAC ralhrang nih tlaih in thah an tonnak cu a si. Credit: The Chinland Post