CDFs, CNA hna nih nunnak thap in Min Aung Hlaing ral an doh i, Ram chung ah mipi vaivian in an um cuahmah lio!
========
July, August, September chung Chin Miphun, kakip kan dirhmun, kan cawlcangh, kan khuakhan lairel ning tete ka zoh hna i, Miphun pii lungput cu kan ngei kho hrim hrim rih lo hi te tiah ka ngai zong a chia.
Kan Mino hna, CDFs, CNA hna nih nunnak thap in Min Aung Hlaing ral an doh i, Ram chung ah mipi vaivian in an um cuahmah lio le, Min Aung Hlaing ral hi kan miphun ningpi in kan doh a herh tiah kengkip ah Fundraising tuah in kan auh pah cuahmah lio ah, Min Aung Hlaing uknak tang ahhin, “Life hi normal” a si ko tbk phun in, Entertainment, Celebration, lam le inawmhnak he caan hmang thiam thiam cun, zeitindah kan ral dohnak hma a kal khawh lai?
CNA ralkap a zammi an um len, CDF zong aa dinmi an um. July, Aug, September, thla 3 chung kan dirhmun zoh tikah, zeitluk indah Min Aung Hlaing ral a do cuahmahmi, Kan palttha hna an moral a der? An lung a dong?
CYO, Chinland Club Concert, Lai Idol, Chin Star tbk kan tuah ning pawl hi celebration lawngte an si. I lawmhnak, Inawmhnak, le Life is happy timi muisam ngei iin kan Miphunpi nih kan cuanh hna i, kan zoh hna tikah, thihnak le nunnak karkah ral a tumi kan mino lungthin cu der lo awk a ttha ti lo.
Chinland Club nih Fundrasing Concert an tuah. Min Aung Hlaing ral dohnak caah a si. Ok, a hman. Asinain Concert an tuah ning le an ilawmh ning zoh tikah, Independent Day / luatnak Ni celebration tuah phun in an tuah. An ilawm. An inuam.
Tulio bantuk caan ahhin, Fundraising Concert zong a herh ning in kan tuah ko lai. Asinain, a spirit kha Celebration siloin, mithi topi bantuk, ulnak bantuk in a kal awk a si. Hlasa hna zong nih mitthli he, lungkekkuainak he hla an sak awk a si. Biachim hna zong nih kan ram kong an lungfahnak, teimak kan chuah rih a herhnak, kan mitthli he chim caan a si.
Israel mi cu, Babylon tiva kam ah an thu i an tap. Sal dirhmun cun, hla zong an sa kho lo. An tingttang kha uihliam kung ah an bah i, a ttap tu in an ttap. Chin Miphun cu, Min Aung Aung Ral kan doh pah i, kan ilawm. Kan lam. Kan inuam. Idol zuamhank zong kan tuah. Chin Star zong kan tuah. Min Aung Hliang uknak tang ah Life hi normal a si ko e tbk phun in kan um. Ral a tumi kan ralkap hna, Moral le thinlung a dertertu a si tiah hrial awk kan hngal lo.
Chin aiawh in khuakhang Laireltu le, CDF or CNF support tbk an si ah, Celebration le Entrainment lei a hoihmi thil tuah kan itimh ahcun, zeibantuk message dah kan ngeih ter lai? Zeibantuk Spirit dah kan ngeih ter lai? tbk hi thukpi in tuak le ruah cikcek a ttha ngai hnga ka ti.
Chinland Council a dir khawh ahcun, CNA le CDFs dirhmun hi zeitindah a si te lai timi hi ruah ciomi a si i, a ttha bik hnga maw tiah saduthah pakhat an von langhtermi ah a ttha ngai kho men tiah ka hmuhmi cu: Kan lung a fian deuhnak ding ah US ralkap umtuning ka von langhter ta lai.
US ahhin ralkap phun phun an um i, an tlaihmi rian cio aa dang i, an huapmi area zong aa dang cio. Kanmah he aa tlakbik branch 3 char ning law. US Army, National Guard le State cio nih an ngeihmi, State Defense Force tiah an um.
US Army an tuanvo cu, US federal ram himnak le aa timhmi/ Interest vengtu hi an si i, a herh ning in ramkip ah ral an tu. Ral an doh. US ram chung community himnak le vennak ah an ithlak lo.
National Guard pawl nih an tuanvo cu US ram chung, community himnak vengtu an si pin ah US cozah nih a herh ning in ramleng lei raltuknak zong ah an thlah thiam hna. Amah belte, US President nih National Guard hi duh paoh in hmannak nawl an pe lo. State of emergency tbk lawng ah hman dingin limit an tuah piak.
State Defense Force hi, State level cio nih an ngeihmi ralkap a si i, Indiana State ahcun, “Indiana Guard Reserve” an ti i, Governor order tang ah a ummi ralkap an si. US president nih Governor nawl loin, State Defense Force hi a hmang kho hna lo. US ralkap ah a dot, dot te in an um bantuk in….
Chinland Council hi dir kho sehlaw, US Ram le a Interest vengtu dirhmun, US army bantuk hi, CNA hi an si hnga i, an tuanvo cu, Chin ram le Chin Miphun interest a vengtu an si ve hnga. Chin ram chung, community himnak tbk ah an thlak ve hnga lo. Chin ralkap bak an si hnga.
CDFs pawl hi, US ram ah National Guard tibantuk, Community himnak an ven pinah, Chin Cozah nih a herh ning in Chin ralkap/ CNA bantuk in ral a tu khomi an si ve hnga. Amah belte, Chin State dihlak huap si loin, US ram ah State level defense force bantuk in, anmah le an region cio lawng ah station/camp a ngeimi an si hnga i, anmah region uknak/ administration tang ah a cawlcanghmi, anmah CDF president order tang ah a ummi an si ve hnga.
Chinland Government ahhin Defense Minister a um te lai i, Defense Minister tang ahhin Chin National Army a um lai i, cucu CNA an si hnga. CDF pawl tu cu, Regional administration tang ah an um hnga. Chinland Cozah, Defense Minister le Regional administration tang ah a ummi CDF a hruaitu an ipehtlaih ning belte hi zeitindah an tuah te hnga:). Credit: Zasang Cinzah