CDF-Matupi Nih Cathanh An Chuah Ve Cang, Online Ralkap le Cachuah Lawngte a si cang!
========
Matupi Peng Chung I Rianṭuan A Duhmi Organisation Hna Nih Peng Ukhruainak Phu Sinah Theihternak Tuah Ding In Ukhruainak Phu Nih An Thanh. Matupi peng chung ah rianṭuan a duhmi organization pohpoh nih peng mizapi ukhruainak phu le CDF-Matupi sinah theihternak nan tuah hmasa lai i rianṭuan khawhnak nawl nan hal lai, tiah peng mizapi ukhruainak phu nih September 5 ah an thanh.
2023 August 29 lio, peng mizapi ukhruainak phu meeting biachahmi ningin Matupi peng chung ah NGO/INGO bu nih peng mizapi ukhruainak phu le CDF-Matupi nih zulh ding an chuahmi hi zulh ding a si lai.
Cu pinah Matupi peng chung ah CNF/CNA, MP nih tlawn nan duh a si ahcun khat le khat upatnak te he a hlankan in ṭuanvo ngeitu sinah thawngthanh cia ding in le dohthlennak thazaang a dertertu tuahsernak poh cu an cohlan hrimhrim lonak kong zong an langhter.
Nawl kan chuahmi a ngai lomi poh cu upadi ningin dantat nan si lai. Matupi peng mizapi ukhruainak phu cu Matupi peng ṭhanchonak rian kan ṭuan lawng si loin i sersiam ṭhannak rian zong a ṭuanmi kan si, tiah an thanh.
CDF-Tonzang Battalion 2 Cu CDF-Tonzang Chungtel Sinak In Chuah An Si. CDF-Tonzang Battalion 2 cu CDF-Tonzang chungtel sinak in kan chuah hna, tiah September 5 ah CDF-Tonzang nih an cathanh an chuah.
Thado miphun cheukhat phu nih an ukmi CDF-Tonzang Battalion 2 nih CDF-Tonzang Battalion 3(Company 3) Company Commander Mang Mun Piang cu a sual lo bu ah Khuangkhan khua ah an tlaih i meithal zun 8 he an tlanhter hna hnu ah an thlah ṭhan. Asinain CDF-Tonzang Battalion 2 nih Mang Mun Piang cu an tlaih ṭhan i an thah, tiah CDF-Tonzang nih an langhter.
Thahnawnnak tiang in thil an tuahmi hi Zo miphun zei an kan rel lo a si caah Zo miphun CDF-Tonzang hruaitu hna nih kan cohlang hrimhrim lo. Cu ruangah CDF-Tonzang Battalion 2, Thado phu cu CDF-Tonzang chungtel sinak in kan in chuah hna, tiah CDF-Tonzang nih cun an langhter.
Mang Mun Piang cu a sual lo buin a sualnak kawl in thahnawnnak tiang a tuahtu CDF-Tonzang Battalion 2 cu 2023 September 5 ah a voihnihnak CDF-Tonzang chungtel sinak in kan hrawh cang, tiah CDF-Tonzang nih cathanh an chuah. Hi cathanh an chuahmi hi CDF-Tonzang Secretary Thang Suan Mung le CDF-Tonzang chimphuannak nawlngeitu theihpinak in an chuah mi a si.
CDF-Tonzang Battalion-2 Cu CDF-Tonzang Sinak In An Chuah Hna. Thado phu cheukhat hna khuakhan lairelnak tangah a cawlcang mi CDF-Tonzang Battlion-2 hna nih CDF-Tonzang Battlion-3 in phuthen (3) lutlai Pu Mang Mon Piang cu sualnak a neih lo pin ah buainak chuah ter duh ah Kingkaan khua an um lio ah an tlaih. An tlaih mi Pu Mang Mon Piang cu meithal zun 8 in an tlanh ter hna hnu ah an thlah than.
CDF-Tonzang Battalion 2 aa timi Thado phu pawl nih Pu Mang Mon Piang cu uah in an tlaih than i a nunnak dih tiang dantatnak an pek. Cu bantuk tuahser nak cu Zo cithlah a si mi CDF-Tonzang hruaitu upa vialte nih kan duh lo i kan lung a fak.
Cucaah CDF-Tonzang Battalion-2 aa timi Thado phu pawl cu CDF-Tonzang ralkap sinak in an chuah hna nak kong cu CDF-Tonzang aiawh in chungtuan tu Thang Suan Mung le CDF-Tonzang chimphuannak nawlnei tu nih thawng thanhnak kan tuah tiah CDF-Tonzang nih September 5 ah thanhca an chuah.
Sualnak ngei lo Pu Mang Mon Piang a that tu CDF-Tonzang Battalion 2 aa timi Thado phu pawl cu September 5 thok in a voi 2nak CDF-Tonzang ralkap sinak in kan in chuah hna tiah CDF-Tonzang nih an langhter chih.
Karenni Ramkulh August Thlachung Ah Kahdohnak Voi 50 Tluk A Chuak; SAC Ralhrang 110 An Thi. Karenni ramkulh chung hmun dangdang ah 2023 August thlachung lawngah SAC ralhrang he kahdohnak voi 50 tluk a chuak i ralhrang lei in 110 an thi tiah KNDF nih September 5 ah thanhca an chuah.
Loikaw, Demoso, Hparuso le May-seh peng chung kahdohnak lawngah SAC ralhrang Lieutenant Colonel pakhat telh in 100 leng an thi i 40 leng hliam an tuar. Aluan cia August 2 thok in Demoso le Hparuso khua motor lampi cu humhak ding in aa zuam mi SAC ralhrang Tat-mah (55) kuttang Battalion chung in ralhrang phu 3 ah rallam sial mi hna he nifa tin kahdohnak a chuak.
Hi thlakhat chung kahdohnak lio ah ralhrang lei a thi mi le hliamtuar an tam caah SAC ralhrang nih raltuknak vanlawng voi 45 a hman. KNDF ralkap in minung 5 an nunnak liam. Ralhrang lei 3 an tlaih hna pin ah hriamnam fa mi zun 15 le a nganmi zun 1 telh in meithal kuan le hriamnam dang zong kan lak chih. Ralhrang vanlawng le hriamngan kah nak ruangah mipi 3 an thi i inn 30 leng a rawk pin ah Khrihfa biakinn 1 le sianginn 2 a rawk tiah KNDF nih an langhter chih.
SAC Ralhrang An Thathawhnak Caah An Mah Ralhrang Lila Le An Chungkhar Hna Cu TikTok An Zuamter Hna Lai. SAC ralhrang pawl an thathawhnak le an lungthin thawnnak ding caah an mah ralhrang le an chungkhar hna cu TikTok zuamnak an tuah ter hna lai tiah ralhrang chung neihniam hna nih an chim.
TikTok aa zuam dingmi hna nih, ralhrang hna thazaang ah an i lak ding mi hla, Myanmar ram chawleh thalnak kong, zatlaang sining kong, dothlennak tuah tu lei nih an langhter mi thawngpang hna cu nichuak capo ah tuah ding kong le ralram ah a kal mi ralhrang lei an thawhnak bia le hla tibantuk zong aa tel lai i a hnubik September 5 ah nan kuat cio dih lai tiah a thlithup in thawngthanhnak an tuah.
Cu an i zuamnak Vedio cu minute 3 tluk lawng a sau lai i Social Media ah tar a si lai, hi zuamnak ah a thiambik pakhat nak laksawng sing 1, pahnih nak 50,000 le pathumnak ah 30,000 pek an si lai pin ah a dang tein laksawng phun 2 a um rih lai tiah ca an chuah mi ah an langh terchih.
“Rampi huap in ralhrang pawl le an chungkar cio TikTok zuamter ding in thawngthanh dih an si, an laksawng zoh tik ah a phupha lo. Social Media ah TikTok hi mitam deuh nih an vun hman ngai caah a tu an tuah mi ralhrang lei thathawhnak le ralhrang ttanh hlei nak kong TikTok zuamnak an tuah mi zong hi mitam deuh nih zoh kho hna seh ti ruahnak an neih caah a si” tiah ralkap CDM pakhat nih a chim.
Myanmar Ram SAC Ralkap Cu Ralhrang Phu Tiah ASEAN People’ Forum Nih Thawngthanhnak An Tuah. Indonesia ram Jakarta khua ah tuah mi ASEAN People’ Forum 2023 tonpumhnak ah Myanmar ram SAC ralkap phu cu ralhrang phu tiah September 3 ah langhter in thawngthanhnak an tuah.
Myanmar ralkap hna nih Miphun pakhat ci hmih khawhnak tiang sual a tuah rung le ralkap phung le phai buar in mipi cungah lainawn nak a tuah mi ruang ah a tubantuk in ralhrang phu tiah kawh auh in thawngthanh nak an tuah hi a si.
Brunei, Cambodia, Indonesia, Lao, Malaysia, Philipine, Singapore, Thailand, Timor Leste le Vietnam ram hna in zatlaang phu tonpumhnak chungah a tubantuk in Myanmar ram mipi hna sin ah lungrual te le hmunkhat ah kan dirpi hna tiah APF nih an langhter. Ni 945 tiang Myanmar ram SAC ralhrang nih uknak a kal pi mi zong a tlamtling lo tiah hi Forum cathah chuah mi ah an langhter.
Mah pin ah NUG, NUCC, ERO le zatlaang phu hna telh in dothlennak ah aa teltum mi phu pawl hna lawng pehtlaih ding le an mah sin in bawmhnak luh ter ding kong zong ASEAN Civil Society Conference/ ASEAN People’ Forum ACSC/APF nih an langhter chih.