CDF-Mara Ralkap 4 Cu MDF Le AA Nih An Tlaih Hna I Nihin Tiang An Thlah Hna Lo Tiah CDF-Mara Nih Thanh
======
CDF-Mara ralkap in Tactical Operation Command le Commanding Officer telh in minung 4 cu Maraland Defence Force (MDF) le Rakhine ralkap AA nih a ruang um lo in an tlaih hna i nihin tiang an thlah rih hna lo, tiah CDF-Mara nih nizan January 17 ah an thanh.
India ram, Mizoram lei ah CDF-Mara ralkap pahnih cu riahcaw an caw i ramri an kirnak lam ah Paletwa peng Pathiantlang khua hrambunh MDF nih a ruang um lo in an sual kawl in January 5 ni ah an tlaih hna. MDF nih an tlaih mi hna CDF-Mara ralkap pahnih thlah ṭhan ding in nawlnak a va tuahtu CDF-Mara in Tactical Operation Command U Htet San le Commanding Officer U Khu Ma cu January 7 ah MDF le AA nih Shweletwa khua ah an tlaih ve hna i nihin tiang an thlah hna lo, tiah an thanh.
Maraland Defence Force (MDF) le Rakhine ralkap AA nih an tlaih mi Tactical Operation Command le Commanding Officer telh in minung 4 an tlaih mi hna cu nihin tiang an thawng theih a si lo caah CDF-Mara le chungkhar lei an lungre a thei ngai i kanmah Mara le Mara kar ah buainak a chuak kho mi a si, tiah CDF-Mara nih phungning tein cathanh an chuah.
CDF – Mara I Chief Strategist Le Commander Telhin Minung 4 Cu MDF Le AA Nih An Tlaih Hna I Nihin Tiang Thlah An Si Rih Lo. Chinland Defense Force-Mara i Chief Strategist (Byuhahmu) le Commander telh in minung 4 hna cu Maraland Defense Force –MDF le Rakhine ralkap AA hna nih a ruang um lo in an tlaih hna i nihin tiang an thlah than rih hna lo tiah CDF-Mara nih nihin January 17 ah cathanh an chuah.
Mizoram lei ah ralkap herhbau zalh ding in a kal mi CDF-Mara ralkap 2 a si mi Hneichua le Bawia hna cu an kir lei Paletwa peng Pathing tlang khua ah hmun a khuar mi MDF ralkap hna nih January 5 ah an rak tlaih hna.cutin tlaih a tong mi hna cu thlah piak than ding in January 7 ah CDF-Mara chief Strategist Pu That Sang le Commander Pu Khuma hna nih an va ton hna i an mah zong cu Shweletwa khua ah MDF le AA nih an rak tlaih chih hna hi a si i nihin tiang an thlah rih hna lo.
MDF le AA Nih An Tlaih Mi Ralkap Pawl Thlahpiak Ding In CDF-Mara Nih Cathanh An Chuah. MDF le AA nih an tlaih mi CDF-Mara Tactical Operator, Battalion Commander le an ralkap pawl thlahpiak ding in CDF-Mara nih January 17 ah cathanh an chuah.
CDF-Mara Battalion 4 hriamtlai pawl a si mi St. Hneichhua Bohia, Puhpa Bawi a Sangaichho hna cu India, Mizoram,Lungpu khua in Pa-ṭhing-lan khua kal ding in an timh lio Shweletwa khua ah MDF Battalion Commander Tupa hruai mi ralkap pawl nih January 1 ah an tlaih hna.
An tlaih mi ralkap pawl thlahpiak ding in CDF-Mara Tactical Operator Htet San le Battalion Commander Khuma hna nih AA le MDF ṭunvo ngeitu pawl sin ah an va hal hna. An tlaih mi ralkap pawl thlahpiak ding in CDF-Mara ṭuanvo ngeitu pawl cu hriam lo in Shweletwa khua ah rat ding in an auh hna i caah CDF-Mara Tactical Operator le Battalion Commander hna cu Shweletwa khua ah an va kal nain an tlaih chap hna tiah theih a si.
An tlaih mi CDF-Mara hriamtlai pawl cu an chungkhar zong he pehtlaihnak an ngeih khawh lo caah chungkhar lei thinphang in an um. Atu bantuk thil tuah nih Mara miphun karlak buainak a nganter chin khawh tiah CDF-Mara nih cathanh an chuah.
SAC Ralkap Hriamngan Le Vanlawng Kahdohnak Ruang Ah Kyauktaw le Sittwe Ah Tualchung Mi 10 An Thi. Rakhine ramkulh, Kyauktaw peng le Sittwe peng ah SAC ralkap nih hriamngan le vanlawng in kahdohnak an tuah ruang ah tualchung mi 10 an thi i minung tam ngai hliam an pu, tiah chaklei hriamtlai phu unau thum nih an thanh.
Nizan January 17, chunhnu suimilam 1:56 ah Kyauktaw peng Pyichaung hmunram Lintzin khua thar ah SAC ralkap nih hriamngan an kah i, khuapi chung in ral a zaam mi hna an i dornak inn, phungki sianginn le sianginn hna ah hriamngan kuan cu a tla i tualchung mi 10 nak tlawm lo an thi. Cu pin ah nizan January 17, ṭhiamṭhiam zinglei suimilam 6:30 hrawng ah Kyauktaw peng Tayettapin khua ah SAC ralkap hriamngan kahnak in U Saw Hla Tun (kum 52) a nunnak a liam, tiah tualchung mi nih an chim.
January 16, zanlei suimilam 6:45 ah Sittwe peng Wabo khuami pahnih cu SAC ralkap hriamngan ruang ah hliam fak ngai an pu. Cu pin ah nizan January 17, zanlei suimilam 5:00 hrawng ah Kyauktaw peng, Pyichaung hmunram Waigyithaungh khua le a kiangkap ah SAC ralkap nih Helicopter in bomb an thlak i tualchung mi 5 an thih pinah hliam a pu mi an tam, tiah theih a si.