CDF-Hualngoram Nih Thla 6 Chung An Cawlcanghnak Kong An Thanh!
=========
2023, March thla thawk in CDF-Hualngoram le SAC ralkap kar kahdohnak a chuakmi kong ah Chinland le Hualngoram chung um mizapi theih ding in CDF-Hualngoram nih phungning tein cathanh an chuah.
2023, March thla chungah Kalaymyo in Hakha lei a kalmi SAC ralkap thazaang 200 leng le hriamnam a phurtu motor 30 leng cu 2013, March 3 ah CDF Hualngoram nih Zawngkawng khua pawng ah bomb puahhnawh in an rak kahdoh hna i SAC ralkap a thimi le hliamhma tuarmi zong an um.
2023, March 13 ah Rihkhuadar sakhan le Ṭio um SAC ralkap sakhan cu 40mm bomb in voi tampi an kah hnu ah hriamhme zong in an kah. Kaphnih i kahnak ah SAC ralkap hliamhma tuar le a thi mi an um i, kanmah lei nunnak liam le hliamhma tuar kan um lo, tiah CDF Hualngoram nih an thanh.
2023, March 15 ah Rih sakhan cu tlang tang in ram mei kan khangh i a thli in kan va kahdoh hna. Cun, March 16 ni ah Rih sakhan le Ṭio um SAC ralkap hna cu kan kah hna i a thi mi le hliamhma tuar zong an um.
CNA le ṭangṭi phu hna he 2023, April 26 in Kalay-Hakha lampi Chuncung Operation ah CDF Hualngamram zong kan i tel ve. Cu kahdohnak ah cun SAC ralkap a thimi an tam pin ah tank 2 le riahcaw phur motor kan rak hrawh. Cu lio ah cun CDF Hualngoram in ralkap 2 nih ram le miphun ca ah an nunnak an rak pek.
Zinghmuh Operation cawlcanghnak chungah lungtho tein kan i tel kho. 2023, June 1 in atu tiang Timit Operation (Lungkar) ah CDF-Hualngoram zong tualchung hriamtlai phu hna he i fonh in kahdohnak ah kan i tel, cu kahdohnak ah cun CDF Hualngoram in ralkap 2 hliamhma an tuar. 2023, June 28 in July 20 tiang Laklei operation in CNA, CDF Zanniatram hna he i fonh in Zanniat Land, Waibula ah humhimnak le hmunhma zohfelnak cawlcanghnak ah kan i tel kho.
2023, August 1 in CNA, CDF-KKG, CDF-Tonzang, PDA hna he i fonh in Major Operation in Tonzaang um SAC ralkap sakhan le palik sakhan hna cu naih tein kan va kah hna. Cu kahdohnak ah cun SAC ralkap le palik 10 nak tlawm lo an thi. CDF Hualngoram in ralkap pakhat nih ram le miphun ca ah a nunnak a pek pinah pakhat hliamhma a tuar.
2023, August 12 zinglei suimilam 1:30 ah CNA, CDF-KKG he i fonh in Chin ramkulh, Falam hrambunh khahlahyiah 268 um SAC ralkap kan va kahdoh hna, hriamngan telh in hriamnam 11 le kuan tamlak kan laak. Cu lio kahdohnak ah cun CDF-KKG in ralkap pakhat nih ram le miphun ca ah a nunnak a pek.
2023, August 14 ah CNA, CDF-Thantlang, CDF-Zophei he i fonh in Thantlang hrambunh khahlahyiah 269 kan va kahdoh i sakhan hme zong kan laak. SAC ralkap tamlak an thih pinah 2 tlaih an si. Kaphnih i kahdohnak ah CDF-Thantlang in ralkap pahnih le CDF Zophei in ralkap pathum nih ram le miphun ca ah nunnak an pek. CDF Hualngoram in ralkap pahnih nih hliamhme an tuar.
2023, August 28 ah Chin ralkap phufonh nih Thantlang SAC ralkap sakhan cu kan va kahdoh i SAC ralkap a thimi an tam i hliamhma tuar zong an tam. Chin ralkap phufonh zong in nunnak liam mi le hliamhma tuar kan um, cu chung ah CDF Hualngoram in pakhat nih hliamhme a tuar ve.
HPO/CDF-Hualngoram cu SAC ralkap an hram a cahnak ding le Myanmar rampi ah federal democracy a um khawhnak ding caah cawlcanghnak a tuah vemi phu kan si. Mizapi zong nih kan thazaang ṭhawnter chin in dohthlennak ah i tel ve cio ding in kan in sawm hna, tiah CDF Hualngoram nih nihin August 31 ah cathanh an chuah. CDF-Hualngoram pawl hi, an cawlcangh ning duh an nung hringhran ko, Bawipa nih Chin pasalttha hna lungrualnak le teinak he lam hruai chin ko hna seh.
KNDF Battalion 1 Sin Ah Karenni Hriamtlai Phu Dang In Ralkap 38 An Lut. KNDF Battalion 1 sinah a dang Karenni hriamtlai ralkap 38 an lut. Annih hi June thla chung ah khan an ning piin a rak lutmi hriamtlai an si, tiah KNDF Battalion 1 nih nizan August 30 ah an thanh.
“Kan sin ah a rak i fonhmi hna cu raltuk chimhnak, pumpak number peknak, uniform peknak le uniform hmelchunh(tazeik) peknak kan ngeih hna leng ah biakamnak zong an tuah. COC pakhat chung ah a rak i fonhmi mizei hriamtlai phu poh lunglawm tein kan in don ko hna,” tiah KNDF Battalion 1 nih cun an langhter.
KNDF sinah aa fonhmi hi zei bantuk phu dah an si ti cu KNDF Battalion 1 nih an langhter lo nain Karennni hrambunh media pakhat a simi Kantarawaddy Times nih a langhter ning ah cun Karenni Generation Z (KGZ) Volunteer Fighters phu an si, tiah a langhter.
PKPDF zong nih Karenni Generation Z (KGZ) Volunteer Fighters in ralkap 38 cu KNDF Battalion 1 sinah lungrual tein an va i fonhnak cung ah an i lawmhnak an langhter ve. KGZ phu cu charity fighter hna he a dirhmi a si i atu zong raltuknak ah PDF he ral a tuṭi mi ralkap phu an si, tiah theih a si.
Shwebo Peng PDF Sakhan Cu SAC Ralkap Nih An Luhhnawh I Kyats Sing 150 Man Tluk An Sung! Sagaing ramṭhen, Shwebo peng, Zidaw khua ah tualchung hriamtlai phu umnak Tawgyigan sakhan pakhat cu SAC ralkap nih an luhhnawh i Ks sing 150 leng man hrawng an sung, tiah Tawgyigan tualchung hriamtlai phu hna sin in theih a si.
August 29, zinglei suimilam 5:00 hrawngah Shwebo in Zidaw khua lei a kalmi SAC ralkap thazaang 50 hrawng cu Tawgyigan phu nih voi hnih bomb an puah hna i cu hnu ah SAC lei nih sakhan cu an luhhnawh, tiah ṭuanvo ngeitu nih a chim. Bomb puahnak ah SAC ralkap 2 an thi i, 8 hliamhma an tuar. Hliamhma tuar mi SAC ralkap hna cu Shwebo lei ah an kalpi hna, tiah theih a si.
PDF nih Sakhan chungah an chiahmi motor 1, cycle 3, kutser meithal 1, bomb lung hnih, uniform hna le thildang thilri, Ks sing 150 man tluk kan sung, tiah ṭuanvo ngeitu nih a chim. SAC ralkap hriamngan kahnak in Zidaw khuami 2 zong hliamhma an pu, tiah theih a si. SAC ralkap hna cu khuachung ah umhmun an khuar i Zidaw khuami 1500 reng lo cu a himnak hmun ah an zaam hna, tiah theih a si. Credit: The Chin Post