CDF-Hualngoram Nih SAC Ralkap Umnak Rih Sakhan An Kah
==========
Chin ramkulh, SAC ralkap an umnak Rih sakhan cu CDF-Hualngoram nih October 14 ah an kah, tiah theih a si. A luancia October 14 ah mipi hriamtlai phu CDF-Hualngoram nih Rih sakhan ah a ummi SAC ralkap hna cu an va kah hna i kaphnih kar fak ngaiin kahdohnak a chuak.
“Cu kahdohnak ah cun CDF-Hualngoram ralkap nih SAC ralkap 2 cu fak ngaiin an hliamh hna nain an thih le thih lo bel kan fehter kho rih lo, midang aa hliammi zong an tam ngai lai ti kan zumh, kaphnih kar fak ngaiin hriamngan hmang in kahdohnak a chuak nain CDF-Hualngoram ralkap cu an him, kan mipi hna cung zong ah fahnak zeihmanh kan tlunter lo”, tiah CDF-Hualngoram in ṭuanvo ngei pakhat nih The Chin Post ah a chim.
CDF-Hualngoram hmunram chung Rih le a pawngkam khua hna ah hin SAC ralkap lawng si lo in ZRA ralkap zong an i chawkvak tawn, tiah theih a si. Ai smart mi Pui Tea hruaimi phu cu vanriang an si ko. an mah thihnak in donghter an duh loh uar an um hringhran ko e, mahbelte kan peng chungah hriamtlai dang lut hlah uh an ti hoi men hna la kap ngamh lo pawl nih.
Pau A Naih Cang Caah Innkip Nih Lungkhur I Cawh Cio Ding In CDF-Mindat Nih Mipi Ralrin An Pek Hna. Chin ramkulh, Mindat peng mipi hna cu pau a naih cang caah vanlawng bomb le hriamngan lak in an him khawh nakhnga i dornak lungkhur ngeih cio ding in CDF-Mindat nih ralrin an pek hna.
SAC ralkap nih tanglei in hriamngan kah le vanlawng hmang in bomb an thlak tawn ruang ah pau naih hin cun vanlawng in bomb zong an thlak khawh ṭhan caah mipi kan him khawh nakhnga lungkhur i ngeih cio ding in mipi sin ah CDF-Mindat nih ralrinpeknak thawng an thanh.
Cunglei in kahdohnak an tuah caan ah sualnak ngei lo mipi thi le hliam an tam tuk caah atu bantukin mipi ralrin kan pek hnanak hi a si, tiah CDF-Mindat in ṭuanvo ngei pakhat nih a chim. Mindat peng chung khua a cheukhat hna cu CDF-Mindat nih an uk khawh i SAC ralkap rallam sial in an luh khawh ti lo caah a lang in hriamngan kah le cunglei in bomb an thlak tawnnak a si.
SAC ralkap hriamngan kahnak in October thla chung ah mipi umnak inn an rawk, innzuat saṭil zong an thi i ngakchia le tar upa deuh hna cu ral an zaam, tiah CDF-Mindat nih October 15 ah an thanh. A luancia October 2 lioah SAC ralkap hriamngan kahnak in tualchung mi pahnih kum (11) pa ngakchia pakhat le kum (18) tleirawl nu pakhat zong hliam an rak pu.
SAC ralkap nih hramhram in nawlngeihnak an laak kum hnih le cheu chung Chin ramkulh ah SAC ralkap vanlawng bomb thlaknak in tualchung mi 52 an thi i, 51 hliam an tuar. Biakinn, sianginn, minung umnak inn le leikuang a rawkmi zong a tam ngai cang, tiah theih a si.
Kalaymyo Ah A Hlan Phurhman Lethnih Tluk Deng In Thilphurh Man A Kai. Sagaing ramṭhen, Kalaymyo ah khualtlawn a har ngai caah September thla thawk in thilphurh man cu a hlan nakin a lethnih tluk deng in a kai, tiah tualchung mi hna nih an chim.
Cu hlan ah cun bawm a fa deuhmi pawl hi phurh man ah Ks 10,000 hrawng a si tawnmi kha atu ah cun Ks 20,000 ah a kai cang, thilphurh man a kai sin in dawr thil man zong a kai colh ve, tiah tualchung mi nih cun an chim. Thilphurh man a kai tuk caah hin thilhphurh man he tuakchih in dawr thil man kaiter a hauh ve ruangah kan kaiter tawn, kanmah nih cun kaiter hi kan duh hrimhrim lo, tiah dawr ngei pakhat nih a chim ve.
Kahdohnak ruang ah Kalay-Gangaw lampi cu phih a si hnu in Mahamyaing lampi le Yagyi lampi lawng hman a ngah cang. Micheu cu lam a chiat tuk caah Hakha lei in i hel in Kalaymyo ah an zuang tawn, chawhlehnak lam a har tuk ruangah atu bantukin thilphurh man a kainak zong hi a si, tiah tualchung motor ngei pakhat nih a chim. Kalaymyo in Yangon, Mandalay lei thil an cahmi man a kai hlei ah a phurh man a fah tuk ruangah tualchung mi an har ngai, tiah theih a si.