CDF-Hakha Council Cu CDF-Hakha Central Council Tiah Min An Thlen, Thimnak Thar Zong An Tuah Khawh!
========
Chinland Defense Force -Hakha Council cu Chinland Defense Force-Haka Central Council tiah min thlen a si tiah September 28 ah CDF-Hakha Central Council nih cathanh an chuah. 2023 September 21-22 tiang CDF-Hakha Central Council Conference cu tlamtling tein an tuah khawh i bu kip aiawhtu palai 358 an kai kho tiah theih a si. Atu bantuk in Conference chung hnatlaknak he min an thlen hi a si tiah theih a si.
“CDF-Hakha Council kan ti tik ah micheu nih Hakha khuapi ca lawng in an hmuh tawn. CDF-Hakha cu Hakha pengpi chung dihlak (Mie, Senthang, Zokhua le Hakha khuapi) ti in dothlennak ah kan thawn chinchin nakhnga hmunkhat aa funtonmi kan si. Cucaah Hakha pengpi huap in rian a ṭuanmi kan si caah kan min kan thlennak a si” tiah CDF-Hakha Central Council chungtel pakhat nih The Chinland Post ah a chim.
Conference chung ah kumkhat rianṭuan ning report peknak, phunghram zohṭinak le fehternak hna zong an ngei kho. CDF-Hakha Central Council i ṭhithruai ningcang zong tlawmpal an thlen mi a um tiah theih a si.
Thim thar mi hruaitu hna hruainak in hramhram uknak a dihdongh tiang dothlennak tuah ding ti mi biahrennak zong an tuah chih tiah an langhter. Cun SAC he pehtlai in rian a ṭuan mi vialte zong dantatnak fak pi in pek an si lai tiah an cathanh ah an telh chih.
Dothlennak hi kan sungh sual ahcun kan miphun zeitik hmanh ah a lu a tung kho ṭhan ti lai lo, kan tei ahcun kan techin fapar chan tiang zalonnak kan hmuh lai caah mipi zapi, ramchung ramleng um mi hna nih kan zeizong vialte thap in i bawm hna usih tiah sawmnak zong an langhter chih. Cun dothlennak chung ah miphun le ram caah nunnak a pe mi, fahnak a tuar mi, thazang a chuah mi vialte hna zong upatnak sang bik kan in pek hna tiah an telh chih.
“Dothlennak kan tuah tik ah kan tei hrim lai tiah zumhnak in a tuah mi kan si. Cun kan miphun caah a donghnak raltuknak a si tiah kan i sehchih caah hmailei ahcun hi nak thawng chinchin le hmual ngei deuh in kan kal kho hrimhrim lai tiah zumhnak kan ngei.
Cubantuk in kan kal khawh nak ding caah cun mizapi a si mi nih kan ngaihchiah chawva le kan sining dihlak ram le miphun caah pek in hmunkhat ah lungrual tein kan kal ṭi a herh” tiah CDF-Hakha Central Council chungtel nih cun a peh chap. Atu bantuk Conference hi 2022 September 9 ah palai 300 tluk he a voikhatnak zong tlamtling tein an rak tuah khawh cang tiah theih a si.
CDF-Hakha Central Council cu 2021 February 1 ah SAC nih hramhram in uknak an lak ruang ah duhlonak langhter in lamzawhnak in siseh, CDM tuah in siseh, hriamtlaih kahdohnak in siseh, CNF/A lam hmuhsaknak in Chin ram le Chin miphun zalonnak, a dik mi Federal Democracy ser kho ding in Miepeng, Senthang peng, Zokhua peng le Hakha khuapi ti in funtom mi bu a si i nawlngeihnak sang bik cu Central Council a si.
CNF/A, CJDC, NUG le phu dangdang hna he zong rian a ṭuanṭi ti zong kha an langhter chih. CDF-Hakha Central Council nih a tlaihnak hmunhma ah zatlang bu dang le hriamtlai phu dang um khawh a si lo nak zong kha an langhter chih.