Zawasa Thattu Cu AA He Pehtlaihnak A Ngei Mi An Si Tiah MZP Nih Cathanh An Chuah.Siaha, ECM sang i khuasa mi, Zawasa thihnak kong ah Mizo Zirlai Pawl(MZP) nih cathanh an chuah i, an cathanh ah cun Zawasa thattu Myanmar mi pali cu Rakhine lei mi Arakan Army(AA) he pehtlaihnak a ngei mi an si, tiah an langhter.
MZP nih ngaihchiatnak a tong mi chungkhar hna cu an ngaihchiatnak an hrawmpi kong an langhter pinah hi bantuk ruruhranghrang thahnawnnak a tuahtu hna cungah a fah khawh chung in dantatnak tuah ding in nawlnak an tuah.
“Lainawnnak a tuahtu hna hi ralzam he pehtlaihnak a ngei mi an si lo pinah Lawngtlai refugee camp-ah a um mi zong an si lo. Arakan Army(AA) he pehtlaihnak a ngei mi an si i, an herhhai zaal ding in aa chawkvak mi an si,” tiah MZP nih cun cathanh an chuah. Lainawnnak hi himnak kawl in Mizoram ah a rak zaam mi mizapi, nu le ngakchia hna he pehtlaihter lo ding in MZP nih cun nawlnak an tuah. Culio ah Mizoram um ralzam hna zong ralring te le fimkan te i um ding in nawlnak an tuah fawn.Credit: The Chin Post