SAC Ralkap Nih Mongmit Khua Mi 102 An Thah Hna, Nu 4 Cu An Thah Hna Hlan Ah An Tlaihhrem Hna! Shan ramkulh chaklei, Mongmit khuapi ah SAC ralkap nih kahdohnak an tuah lioah tualchung mi 102 an thah hna i kum tling lo nu ngakchia 3 telh in nu 4 zong an tlaihhrem hna hnu ah an thah hna, tiah Mongmit khua mi hna nih Khit Thit Media ah an chim.
February 18 ah KIA le PDF nih Mongmit khuapi cu an kah i khuapi chung hmun cheukhat an laak hnu ah tualchung mi 102 an thah hna i kum 13 tluk nu ngakchia telh in nu 4 zong an tlaihhrem hna hnu ah an thah hna, tiah a chim chap.
Division 99 SAC ralkap pawl cu Mongmit khuapi an luh lio ah Ywatawlay khua mi pafa hna cu an tlaih hna i a pa an thah hnu ah a fanu kum 13 tluk cu an tlaihhrem i an thah ve. Shwezalri le Ungkyaw khua karah nuva hna zong an tlaih hna i a vapa an thah hnu ah a nupi cu an tlaihhrem ṭhan i an thah ve. Shwezali khu mi kum 15 le 17 tluk nu 2 zong an tlaihhrem hna i an thah ṭhan hna, tiah theih a si.
Cu pin ah Mongmit khuapi in meng 7 aa hlatnak arzuatnak dum ah SAC ralkap nih kum 64 pa pakhat cu an tlaih i a kut hri in an ṭem hnu ah mei in an khangh, cu thil an tuah mi cu PDF tuah ser mi bantuk in an langhter, Khit Thit Media nih a ṭial.Crd: The Chin Post
Thawngpang dang : A Biapi Taktak Mi Ralring Peknak Thawngpang. Fake PDF Page Group Hmang In Ralhrang Tampi An Tlai Cang Hna Ee. 2024, February 10 ah SAC ralhrang nih kumtling mi paoh hramhram in SAC ah luh ding timi Upadi an chuah hnu in Mino cheukhat zong tlaih an ton cuahmah.
Mino tampi nih PDF le A dangdang phu ah an lut ruangah, Ralhrang pawl nih Facebook le Telegram te pawl ah PDF min char in Mino tampi an hlen hna tiah kan theih. PDF page or Group an i tuah ve ii, Mino tampi cu an petlaih hna hnu ah an tlaih mi an tampi cang tiah thawng kan theih ning si.
Cuca cun Kawlrawn um mi mino nih fak piin kan i ralring a hau lai. PDF lut kan duh tih ah anmah PDF page or Group lawngah petlaih si lo in, a tlawmbik Riantuan tu pa 2,3 tal pehtlai nak tuah khawh kan izuam hna lai. Telegram zongah Fake number in mino tam ngai Ralhrang nih an hlenh caang hna ti asi.