SAC Ralkap L.T Colonel 1 Le Captain 1 Cu Ralkap Phungning Lo Un An Um Tiah A Sangcem Mi Thong Le Thihdan Pek An Tong
============
Yangon ramṭhen, Mingaladon ralkap Medical University in Sii lei doctor Captain Ye Yint Shwe cu online in SAC bawizik Min Aung Hlaing thatlonak kong a tarlangh tiah SAC biaceihnak zung nih Thihdan an pek. L.t Colonel Aung Khant zong mipi ralkap sin ah thawng a petu a si tiah thong kum 40 tla ding in dan an tat tiah Mizzima Daily nih a chim.
Ralkap Medical University ah sii lei he pehtlai in Mingaladon Medical Univesity batch 16 chuak Sii lei (M.Med.Sc) a kumhnihnak a cawn lio ah ralkap siibawi Captain Ye Yint Shwe cu Min Aung Hlaing soiselnak kong online ah a post ruang ah ralkap biaceih zung nih August thla ah a sangcem mi thihdan an pek hi a si.
Thihdan pek a tong mi Captain Ye Yint Shwe hi NUG Ministry Health & Education Minister Dr. Zaw Wai Soe he naihniam chungkhat an si ruang ah mah bantuk in a sang cem mi thihdan an pek hi a si ko tiah ralkap lei in thawngpe nih an chim.
Amah bantuk in August thla chung ah Ralkap Medical University batch 4 sianginn chuak L.t Colonel Aung Khant zong mipi ralkap sin ah thawng petu a si tiah lunghrinhnak he ralkap biaceih zung nih thong kum 40 tla ding in nawl an chuah.
SAC ralkap nih hramhram in uknak a lak hnu ah anmah chung in a duh lo tu ralkap tampi an um i, atu lio Myanmar ram buainak le harnak ah SAC lutlai duhlo ruang ah CDM a tuahtu ralkap le SAC chung ah buainak tampi a um, mah le mah lunghrinh ruang ah rianphuah le thongthlak a tong mi ralbawi ngan an tam ngai tiah theih a si.
Thla 4 Chung Ah SAC Chungtel 500 Leng CDM An Tuah. Tu kum 2023 April thla thawk in July thla dongh tiang thla 4 chung ah SAC chungtel 500 leng nih SAC kaltak in CDM an tuah tiah NUG Ministry of Defense sin in thawng theih a si. SAC an i uk ning, nawl an i pek ning a rawh thluahmah caah thla 4 chung ah hmunkip in SAC chungtel 500 leng CDM an tuah tiah MOD zung in biachimnak nawl a ngeitu Asst. Secretary U Mg Mg Swe nih nizaan thawngthanhnak ah a chim.
“Kahdohnak a fah chin lengmang bantuk in anmah chung nawl pek ningcang, an i uk ningcang zong a rawh thluahmah tik ah mipi sin ah aa fonh mi ralkap an tam chin thluahmah kha hmuh khawh a si. A luancia April thla in July thla tiang SAC chungtel 500 leng mipi lei ah an i fonh” tiah U Mg Mg Swe nih a chim. Cun SAC ralkap chung ah Pha-ye-ti (ralkap thawngpang pawl a khawmtu) zong an tam chin thluahmah i cu hna pawl cu NUG nih rian a pek cio hna tiah a chim fawn.
SAC nih hramhram in uknak a lak hnu 2021 thawk in Kachin, Chin, Mon, Karenni, Shan, Sagaing, Magway, Bago, Taninthary hna ah SAC ralkap pawl cu NUG kuttang PDF pawl, CDF pawl nih fakpi in an kah thluahmah hna caah Byu-ha-hmu, Battalion Commander rank tiang a thi mi an um tiah theih a si. Kahdohnak pawl le Operation pawl ah a kuttang ralkap pawl ṭha tein a uk kho lo mi ralbawi ngan bawi zong Min Aung Hliang nih rian a phuah thluahmah hna kha hmuh khawh a si.
Kawkareik Lam Ah Zohfelnak An Tuah Lio Ah SAC Captain 1 An Tlaih. Karen ram, Kawkareik peng, Kyaphyu Column nih a tlaihnak hmunhma chung ah PDF pawl nih lamcung zohfelnak an tuah lio ah SAC ralkap Captain 1 an tlaih tiah Kyaphyu Column sin in thawng theih a si.
August 28 chun ah Kyaphyu Column nih a tlaihnak hmunhma lamcung ah PDF pawl nih himnak an lak i mawṭaw pakhat cu an dirter i an check tik ah SAC ralkap Captain pakhat a si kha an theih i an tlaih hi a si. An tlaih mi SAC ralkap hi Computer lei in Degree a la cang mi Captain Ye Min Htun (kum 33) a si i Myawaddy ah fa a pawi lio mi an nu a va ton i a kirlei ah an tlaih hi a si.
SAC ralkap Captain Ye Min Htun cu No. 207 nih a herh ning in biahalnak an tuah lio a si i dantatnak zong a ing lai tiah theih a si. Myawaddy-Kawkareik lam ah Kyapyu C04, C05 le Kyapyu kuttang himnak phu pawl nih nifatin in lamlei zohfelnak an tuah lengmang tiah theih a si.
Myaing Peng, Kaidawma Palek Sakhaan Kahdohnak Ah PDF 1 A Nunnak A Liam. Magway ramṭhen, Myaing peng, Kaidawma palek sakhaan kahdohnak ah PDF 1 a nunnak a liam tiah Young Force – UG nih thawng an thanh. August 27 ah Myaing peng, Kaidawma palek sakhaan ah a um mi SAC ralkap, palek le pyusawthi pawl cu Young Force – UG, Pakokku Underground Force, Thurain-TR hna nih an va kah hna i kahdohnak chung ah PDF 1 aa hliam i sii an thlop lio ah a nunnak a liam tiah theih a si. Credit: The Chinland Post