PDF-Tamu Sakhan Pakhat SAC Ralhrang Nih A Voi 2 Naak An Laak Ṭhan!
=========
Sagaing ramṭhen, Tamu peng um mipi ralkap PDF battalion 4 sakhan cu SAC ralhrang nih September 16, zing suimilam 8:30 tluk ah an luh hnawh i minute 30 tluk kap 2 kar kahdohnak a chuah hnu in SAC ralhrang nih an sakhan an laak piak hna, tiah kan theih.
“SAC ralhrang pawl an luh khawhnak ding lam pawl cu mipi ralkap PDF nih an bawh ko hna nain hmun dang in a thlithup in an luhhnawh hna caah kap 2 kar kahdohnak a chuah hi a si. Hriamngan le hriamhme he pehtlai in an kah lengmang hna caah mipi ralkap PDF hna nih an sakhan an chuahtak hi a si” tiah neihniam 1 nih a chim. Hi kahdohnak ah mipi ralkap PDF in minung 4 nih hliamhma faaktuk lo an tuar, tiah PDF battalion 4 he neihniam 1 nih Zalen ah a chim.
Khampat Khua Ah Kum 103 Pu Siah Khan Mang Upatpeknak An Tuah. Tamu peng Khampat khuachung sangthen No.1 ah khuasa mi Pu Siah Khan Mang kum 103 tlin camtuak upat peknak le thlacam piaknak cu Immanuel Assemblies of God Church (AG), Khampat nih ṭuanvo lak in an Biakinn ah an tuah hi a si.
Pu Siah Khan Mang cu Taithul (Zo) hrinsor a si i Zo hrinsor vialte lak ah kum upa bik pakhat a si lai tiah upa hna nih an chim. Japan ral zong a tem ing i a theihngal tu pakhat zong a si.
Pu Siah Khua Mang cu a tu lio ah ngandam tein a um rih, a mah cu Haipii khua ah a rak chuak. A mah cu July 22 lio Khampat khua kahdohnak lio ah har ngai in a himnak hnun ah an rak zam pi mi zong a si tiah kan theih.
Sami Khua Ah Hriamtlai Phu Pakhat Nih SAC Palik Chungtel Pakhat Cu A Inn Ah An Tlaih. Chin ramkulh thlanglei, Paletwa peng, Sami khua ah hriamtlai phu pakhat nih September 16 zan ah SAC palik chungtel pakhat cu a inn ah an va tlaih, tiah Sami khuami hna sinin theih a si. Tlaih a tongmi palik bo khat Naing Zaw Aung cu September 16 zan suimilam 8:00 luan ah hriamtlai phu pakhat nih an va tlaih, tiah Chin World nih a ṭial.
Sami khuami pakhat nih cun, “Anih hi Brigadier pa kuttang misual pakhat a si i khoika poh ah sopawt phun rumro in a um caah AA le CDF zong nih a umtu ziaza ṭhinh dingin ralrinnak an rak pek cangmi a si,” tiah Chin World ah a chim. Palik Naing Zaw Aung a tlaitu hi CNF an si tiin tualchung mi hna nih cun an chim nain CNF nih thanhnak an tuahmi a um lo.
Sii-ai Lei Chanbau Ruangah CDF-Paletwa Ralkap 2 An Nunnak Liam. Chin ramkulh thlanglei Paletwa pengkomh chungah sii-ai lei tlamtlin lo nak le chanbau ruangah CDF-Paletwa ralkap 2 an nunnak a liam nak kong CDF-Paletwa nih September 16 ah ngaihchiat nak cathanh an chuah.
A nunnak liam mi ralkap 2 hna nih Chinland le a Miphun ca rian an tuan lio ah an nunnak a laim hi a si tiah ngaichiatnak cathanh chuah mi ah an langh ter chih. A nunnak liam mi hna hi, Salai Muang Maung (kum 25) cu August 3 le Salai Enok (kum 19) cu August 8 ah an nunnak an liam i an pahnih in Commando ah a um mi an si. “An zawtnak nih an cheituk hna ruang, Operation tuahnak tiang thilri a um lo ruang le siizung kalpinak a hlat tuk ruang zongah a si”tiah CDF-Paletwa lutlai pakhat nih a chim.
“Ramtang ah um in Dothlennak a tuah mi kan si caah harnak tampi kan tong, cucaah mipi hna nih a hmunhma ah ra in nai teltum khawh lo zongah a kakip in rak i tel cio dingin kan sawm hna”tiah a cunglei upa nih a chimchap. CDF-Paletwa cu 2021 April 28 ni ah rak dirh mi a si i a tu ni tiangah CDF-Paletwa ralkap 9 an nunnak a liam cang tiah theih a si.
Kum Hnih Le Cheu Chungah CDF-Mindat Ralkap Minung 56 An Nunnak Liam. 2021 kum SAC ralhrang nih hramhram in uknak an lak hnu in kum hnih le cheu chung ralhrang an nornak ah CDF-Mindat ralkap in minung 56 an nunnak a liam tiah CDF-Mindat ralkap pakhat nih a chimnak kong Ayerawaddy Times nih a langh ter. A voikhatnak kahdohnak an rak tuah lio ah SAC ralhrang Tactical Operation Command pakhat an rak tlaih hnu in CDF-Mindat nih khuachung hmun cheukhat zong an humhak khawh.
“Ralhrang lei nih thazaang tampi hmangin khua in nichuah, nitlak lei in luhhnawh an kan timh caah kan sikhawh chungin kan kham hna caah ralhrang lei motor 7 kan hrawhpiak hna pin ah ralhrang hriamnam le riahcaw hna zong kan rak chuhkhawh hna. Ralhrang a thi mi le hliamtuar zong an rak tam”tiah CDF-Mindat ralkap nih cun a chim. CDF-Mindat nih Lai meithal thonghrolh in SAC ralhrang an rak doh mi hna cu hmundang hriamtlai phu hna zong nih thazaang ah an rak i lak ngai hna tiah kan theih.
Hriamnam Tling An Ngeilo Nain CDF-Asho Nih SAC Ralhrang Sakhan Voi 3 Tiang A Nam Hna. Hriamnam tlamtling tein an ngeih lo bu in SAC ralhrang hna lam tampi in a nor mi CDF-Asho nih ralhrang sakhan voi 3 tiang kan nam cang hna tiah CDF-Asho tuanvo ngeitu pakhat nih a chim.
CDF-Asho cu Magway ramthen nitlak lei Rakhine tlangram pawng ah Chin miphun um nak khua cheukhat ah kahdohnak tuah in an cawl cang. A si nain hriamnam lei an chanbau caah hmunhma humhak le hmunhma theihhngalh nak caah biapi in an cawl cang deuh. CDF-Asho cu an dirhnak caan zong a sau rih lo nain SAC ralhrang sakhan voi 3 tiang an nam cang.
Aluan cia August 21 lio ah Ngaphe(ငဖဲ) peng Gas lam a hngak mi SAC ralhrang sakhan an rak luhhnawh hna nain hriamnam an i deih lo caah le hriamnam ṭha an ngeih lo caah an duhning in an cawlcang kho lo. “Sakhan lak dingin kan i timtuah ko nain hriamnam ṭha kan ngeih lo caah kan duhning in kan cawlcang kho lo. Cucaah kan herh mi Drone cawknak caah ‘Vakok thla’ timi tangka kawlnak Campaign zong kan tuah lio a si.”tiah CDF-Asho upa Salai Ro Chin nih a chim.
Hi tangka kawlnak Campaign cu August 25 in October 2 tiang chungah Ticket zuar a si. Lawmman laksawng (poh ding) cu kut in tah mi Laithil Samtu thuam, Lautu, Asho, Mara le Mizo thuam hna an si lai. CDF-Asho cu SAC ralhrang nor ding le Chin Miphun nih zalonnak a hmuh khawhnak ding, Chin Miphun hna hmunkhat teah le lungrual tein kan i funtom khawhnak ding ca le mah te khuakhan lairelnak kan hmuh khawhnak ding caah Ngaphe peng, Min Hla peng, Min-dung(မင်းတုန်) pengchung hna ah a cawlcang mi an si tiah kan theih.
Vawlei Pi Huap In Zuu Tamtuk Din Ruangah Minute Pakhat Ah Minung 6 An Thi I Kumkhat Ah Minung Sing 30 Tluk An Thi; WHO Myanmar. Vawlei pumpi huap in Zuu din ruangah minute pakhat chung lawngah minung 6 an thi i kumkhat chungah minung sing 30 tluk an thi tiah World Health Organization (WHO) Myanmar nih a langh ter.
Zuu tamtuk dinnak nih Zuu dinnak lungthin a ngeipeng mi (Zuu nih a suai mi) hna zatuak 100 tluk an si, Zuu din ruangah mah le mah thah aa tim mi zatuak 18, Lainawnnak zatuak 18 a chuak, Motor khawndennak zatuak 27 a chuak, zatuak 13 in zawtnak a kaiter, zatuak 48 nih thin carnak a chuah ter, TB zawtnak zatuak 20 a chuah ter, Rilpi Cancer zatuak 11 a chuah ter, Hnuk Cancer zatuak 5 a chuh ter, thikai le lungtur zawtnak zatuak 7 a chuah ter pin ah Cancer dang zong Zuu tamtuk din nak nih a chuah ter chih tiah a lang ter. Credit: The Chin Post, Lungmili Media