Hlaingthayar, Innchungkhar Minung 3 Thahnawnnak Ah Pyusawhti Misual Thonginnchuak Pawl An Zumh Hna
===========
Yangon ramṭhen, Hlaingthayar ah kum 9 hngakchia telh in innchungkhar minung 3 an thah hna i, thilman sung sui an laknak kong he pehtlai in SAC ralkap le palek nih ramkhel rianṭuantu le dohthlennak ah aa tel mi pawl tlaihnak ah an dirhmi pyusawhti (Pyithutsit) bu thonginnchuak misual rual he pehtlaihnak a um ko tiah palek chung in le khuami hna sin in thawng theih a si tiah Yangon Khit Thit nih a ṭial.
September 4 chun sml 1:00pm hrawng ah Yangon raṭthen, Hlaingthayar peng No. 841/A Anandahturihyah lam No. 18 sang um U Htey Lwin, Daw Su Hlaing Win le an fa pa kum 9 hngakchia, Pyo Myant hna cu namsawhnak in an thi, an inn ah thil mansung le sui pawl aa lak tiah an chim.
Nihin ah Hlaingthryar khua cu SAC ralkap le palek nih thonginn chuak pawl cu PDF le ramkhel le dohthlennak ah a cawlcang mi hna tlaihnak ah Pyusawhti (Pyithutsit) pawl rian an fial hna. Mah hna nih sang chung um mipi tlerh, inn le lo kong buainak ah tangka an hal hna, rithai sii duhpaoh in an zuar, sualnak phunkip an tuah caah sang chung um mipi humhimnak a um ti lo tiah theih a si.
“Atu Hlaingthayar ah sualnak thil ṭha lo a karh, mithat lainawnnak a tam, misual thongchuak an tam, Pyusawhti kan si tiah sang chung ah aukhuang in nam le fung he an dir, Insein lei zong ah Kyaw Win Saint le Cim Hont bantuk misual an tam. SAC ralkap le palek nih an runven hna. Mi thah lainawnnak tiang an tuah, Thil ṭha lo tuah hi an caah misual (license) a ngei mi-phungning tein a tuah mi ko an lo cang” tiah Hlaingthayar sang mi pakhat nih a chim.
Bawlung Puai Security Lak Ah A Kal Mi SAC Motor Bomb Puahhnawh A Tong. Madalay ramhṭhen Nyaung U peng chung bawlung zuamnak ah security lak ding in a kal mi SAC motor cu September 5 ah bomb an puahhnawh I Sergeant pakhat a thi i, hliam tuar mi 3 an si tiah BBC Burmese nih a tial.
Lamhla in hmeh mi automatic bomb puahhnawh a tong mi SAC motor rawknak ah motor chung um ralkap Sergeant 1 cu hliam a tuar I Siizung ah a thi. Adang Motor chung a um ve mi ralkap pa 2 le nu 1 hliam an pu ve i Nyaung U siizung ah an thlop bul hna.
Karen Ram, August Thlachung Kahdohnak Pawl Ah SAC Ralkap 110 An Thi, 3 A Nung In An Tlaih Hna. Karen ram, August thlachung kahdohnak pawl ah SAC ralkap ralbawi telh in ralkap 110 an thi i a nung in 3 an tlaih hna leng ah hriamngan zuun 1, meithal zuun 15 le kuanzen pawl an lak khawh tiah KNDF nih thawng an thanh.
August thlachung, Karen ram pumpi ah KNDF aa tel mi kahdohnak voi 50 hrawng a cang i cu kahdohnak pawl chung ah SAC chungtel 110 an thi, 40 leng an i hliam i a nung in 3 an tlaih hna. KNDF hriamtlai 5 nih ram le miphun caah an nunnak an pek ve tiah an langhter.
August thlachung ah SAC ralkap nih vanlei kahdohnak voi 45 a tuah i mipi 1, hriamngan ruang ah mipi 2 an thi. SAC ralkap lei nih Drone in kahdohnak an tuah ruang ah hngakchia 3 an i hliam.
Cubantuk vanlei kahdohnak le hriamngan ruang ah mipi inn 20, biakinn 1 le sianginn 2 an rawh leng ah mipi inn 18 cu SAC ralkap nih ciam lak in an khangh tiah theih a si.
Dothlennak Chung Ah Nu Hriamtlai Pawl An Intuarnak. Nu ti mi biafang le sining hi ningkhel tein kan ruah ahcun an tha der tiah hmuh a si nain dothlennak chung ah lung ṭhawng tak in hramhram uknak an doh i an caan le an nunnak an pek.
Atu langhter mi muicawl hi CNA ralkap nu Grace telh in a hawile pawl an sining a si. Dothlennak a dih tik ah zei tuah dah nan duh timi biaruahnak cu ramdang thawngzamh a si mi French Arte TV thawng latu pawl he bomkhor chung ah an i ruah mi kha PDF Insight nih a tar chin mi a si.
Taze Khuachung Ah A Um Mi SAC Ralkap Gate Drone In Bom An Thlak Hna, 2 An Thi. Sagaing ramṭhen, Taze khuachung ah a um mi SAC ralkap gate 2 cu drone in bom an thlak hnawh hna caah ralkap 2 an thi tiah Vikings phu sin in thawng theih a si.
August 28 zaanlei ah Taze khuachung ah a um mi SAC ralkap Kan pura gate le Daungmin gate 2 cu dothlennak phu pawl nih Drone in bom an thlak. Kahdohnak chung ah SAC lei ralkap 2 an thi i 3 an i hliam, dothlennak phu pawl him tein an kir kho tiah cathanh chung ah an langhter. Kahdohnak chung ah Daung Mann, P2P le Vikings Drone phu pawl an i bawm tiah theih a si.
Ngazun Ah SAC Ralkap Nih Hmunhma An Khuarnak Sakhaan Drone In Bom An Thlak, Ralkap 2 An Thi, Ralbawi 1 Fak Ngai In Aa Hliam. Mandalay ramṭhen, Ngazun peng ah a um mi SAC ralkap sakhaan cu drone in bom an thlak hnawh hna i SAC ralkap 2 an thi, ralbawi 1 fak ngai in hliam a tuar tiah Ngazun PDF nih thawng an thanh.
September 5 chun sml 2:00pm in zaanlei sml 4:00pm karlak ah Ngazun peng, Thacin khua ah SAC ralkap pawl nih hmunhma an khuarnak cu Drone in bom lung 8 an thlak hnawh hna hi a si. Kahdohnak chung ah Ngazun PDF, Black Eagle Defense Force-MMU, Black Eagle Drone Force, Ngazun Pah-Kah-Phah, 925 Guerrilla phu hna an i bawm tiah theih a si.
SAC Ralkap Le KNDO Karlak Kahdohnak Ah KNDO Hriamtlai 3 An Nunnak A Liam. Mon ram, Bilin peng, Alulay khua, Yangon-Mawlamyaing lampawng ah hmunhma a la mi SAC ralkap pawl le KNU Brigade 1 phufonh hna karlak ah kahdohnak a chuak i KNDO hriamtlai 3 an nunnak a liam tiah Mizzima nih a langhter.
September 4 zinglei sml 8:30am hrawng ah Bilin peng, alulay khua, Yangon-Mawlamyaing lam pawng ah a um mi ramlak ah SAC ralkap pawl le KNLA, KNDO, PDF hna karlak ah kahdohnak a chuak.
“Kanmah lei in KNDO Corporal pakhat le ralkap 2 an nunnak a liam. Anmah lei a thi mi le hliam a tuar mi an um lo. Kanmah lei kan i relh lo kar ah an kan kah” tiah Dothlennak phu lei nih Mizzima ah an chim.
Kahdohnak hi mins 15 tluk a rau nain KNDO hriamtlai 3 an thi, RPG zuun 1, M-16 zuun 1, RPG kuan 2 le kuan cheukhat an sung tiah theih a si. Bilin peng ah SAC ralkap le KNU Brigade 1 kuttang KNLA, KNDO, PDF phufonh hna karlak ah kahdohnak a chuak tawn. Credit; The Chinland Post