Breaking News: Mipi Ralkap Sin Ah A Sungkhan Mi Ralhrang Ralkap 600 Leng An Um Cang!
==========
1027 Operation Thawk Ni In Hriamnam He Mipi Ralkap Sin Ah A Sungkhan Mi SAC Ralkap 600 Leng An Um Cang, CDM A Tuah Mi Cozah Rianṭuantu Hna Tha Tein Kan Chiah Peng Hna Tiah NUG Nih An Chim. Shan ramkulh chaklei unau hawikom phu 3 hruainak in 1027 operation thawk a si hnu in SAC ralkap pawl cu battalion ning pi in hriamnam he a sung pek in mipi ralkap sin ah a fonh mi nikhat hnu nikhat an karh chin lengmang i December 25 tiang ah ralkap 600 leng a sungkhan in mipi ralkap ah an lut cang tiah NUG president zung sin in theih a si.
“1027 Operation” thawk hnu Myanmar ram hmunkip ah kahdohnak a fak chin lengmang i, SAC lei battalion ningpi in hriamnam he CDM a tuah mi hi November thla le December thla 2 chung ah an karh chin tiah tiah a si.
“A tu 1027 operation” thawk hnu ah SAC ralkap ralbawi telh in battalion ning pi in a sung an pek. 1027 operation hnu ah SAC ralkap le palek 600 leng cu mipi lei fonh in an rak lut. Khuapau dohthlennak thawk ka in nihin tiang register cazin ning ah, SAC hriamtlai ralkap le palek 15,000 leng nih CDM an tuah cang. Cazin kan lak khawh rih lo mi ralkap, ralbawi a tli mi a thong/sang in a um lai” tiah NUG President zung lei biachimnak nawl ngei U Kyaw Zaw nih Ayeyarwaddy Times ah a chim.
Cun, a sungpek in mipi sin a rak I fonh mi SAC ralkap pawl cu mipi ralkap he biakchawnh in CDM an tuah, kahdohnak ah Thandar rang tar in hriamnam he an rak lut, Kahdohnak ah tlaih mi SAC ralkap zong tha tein zohkhenh an si tiah a chim chih.
“ Kanmah lei kap in kan chim peng mi a um, SAC ralkap lei ralbawi in ralkap, palek pawl CDM tuah ko uh, CDM a tuah duh lo mi cu ralhrang lei ralbawi caah nunnak pek lo in thandar rang tar in hriamnam he rak lut u, mipi lei ah rak i fonh u tiah NUG president zong nih a chim mi a si. Mipi sin ah rak I fonh zoh uh tiah dohthlennak a tuah mi mipi ralkap lei nih kan i don hna” tiah NUG President zung biachimnak nawl ngeitu U Kyaw Zaw nih cun a chim chap.
Kahdohnak ah tlaih mi ralkap zong Geneva Convention biachah ning in zohkhenh an si lai. SAC nih uknak a lak hnu 2021 kum February in nihin ni tiang SAC ralkap le palek CDM a tuah cangmi 15000 leng an si cang I, ramri hngak (BGF)ralkap zong an I tel tiah theih a si.
Gangaw Peng Myitta Dam SAC Ralkap Sakhan Kahnak Ah SAC Ralkap 4 An Thi Hriamnam An Lak Chih. Magway ramṭhen, Gangaw peng um, Myitta Dam SAC ralkap sakhan cu December 22 zinglei ah Chin hriamtlai phu pawl nih an laak tiah theih a si.
Myitta Dam um SAC ralkap pawl hi Gangaw hrambunh LIB 50 ralkap pawl an si hna i an sakhan cu ZZLMS phu a si mi, CDF-Zophei, CDF-Zotung, CDF-Lautu, CDF-Mara, CDF-Senthang, CDF-Mindat, CNDF, CDF-KKG le Gangaw peng PDF, Unbroken Generation hna bawm in December 22 zing ah an kah i an laak. Sakhan in a zaam mi SAC ralkap pawl zong an dawi hna tiah theih a si.
Myitta Dam SAC ralkap sakhan kahdohnak ah SAC ralkap Fighter pathum nih bomb an thlak pin ah sakhan chung um ralkap nih hriamngan an kah ve hna. Chin hriamtlai phu lei in meithal zuun 4, Drone kahnak pakhat, bom, kutcheh bom, kuan le zen le RPF kuan zen an lak. CDF-Mindat ralkap mi 1 nih ram caah nunnak pek i hliamhma pum mi zong an um tiah ZZLMS he naihniam mi sin in theih a si. Chin ramkulh, Matupi pengkomh, Rezua khua um SAC sakhan cu ZZLMS operation in Chin mipi ralkap ṭangṭi phu hna nih an kah hna i November 29 zing 10:00am an rak lak khawh.
November 25 ni ah Rezua SAC sakhaan hi kah hram an thawk i November 29 ni tiang ni 5 chung ah sakhaan an lak khawh hi a si. SAC lei nih Rezua khua lak kho lo ding in November 28 zanlei 3:00 pm le November 29 ni tiang vanlawng in bom 20 hrawng a thlak tiah mipi ralkap sin in theih a si.
Rezua kahnak ZZLMS operation ah CDF-Zophei, CDF-Zotung, CDF-Lautu, CDF-Mara, CDF-Senthang, CNA, Matupi( B-2), CDF- Hualngoram, CDF- Hakha, ThanTlang Drone team le CDF-Asho tiah Chin mipi ralkap ṭangṭi phu hna an i tel.
Chinland mipi ralkap ṭangṭi rual hna nih Chin-Magwe ramri um Hakha peng Bungzung sakhan zong December 18 ni ah an lak khawh i SAC ralkap Captain telh in 6 a nung in an tlaih hna , SAC ralkap 10 an thi tiah CDF-Hakha sin in theih a si.