Karenni Ramkulh Cu SAC Nih Ralkap Thazaang 1,000 He An Luhhnawh
=========
Karenni ramkulh, SAC ralkap ramri sakhan cu kah an ton caah SAC lei nih ralkap thazaang 1,000 leng in an luhhnawh ruangah kahdohnak a zual kho, tiah KNDF Chairman Khun Bi Htoo nih a chim. Mese peng Hpasaung peng, Demosoe peng le Shan ramkulh thlanglei Mobye le Phekhon peng ah kahdohnak a chuak cuahmah, tiah theih a si.
KNDF Chairman Khun Bi Htoo nih cun, “SAC nih dohthlennak i ukhruainak phu vialte hrawh dih a timh caah kan si khawh chung in kan kham lai i kan si khawh chung in kan sersiam ṭhan lai,” tiah a chim. Caan Karlak Karenni Cozah(Interim Executive Council/IEC) cu ukhruainak zung(deparment) 12 in sermi a si i cheukhat deparment cu rianṭuan hram an thawk cang, tiah theih a si. A luancia ni tlawmpal ah Demoso-Hprosu motor lampi pawng ah kahdohnak a rak chuak i Dawnginkhu-Htipawso lam cu ahohmanh zulh rih lo dingin KNDF nih ralrinpeknak an rak tuah.
June le July thla ah Mese peng chung ah a ummi SAC ralkap ramri sakhan 7 le palik sakhan 1 cu Karenni hriamtlai phu hna nih an rak laak i hriamngan le hriamhme zeimawzat zong an rak laak, tiah theih a si.
Karenni Ramkulh Thla Khat Chung Kahdohnak Ah SAC Ralkap 84 An Thi, 3 An Tlaih Hna. Karenni ramkulh, July thla chung kahdohnak ah SAC ralkap 84 an thi i, 3 kan tlaih hna. Meithal zun 8 telh in zen-kuan zeimawzat zong kan laak, tiah KNDF Central nih an thanh.
July zarhthumnak thawk in Shan ramkulh thlanglei Pinlaung peng in Loikaw peng lei ah rallam a sialmi SAC ralkap motor cu Karenni hriamtlai phu nih an kah hna i SAC motor pathum an rawk. Cu motor humhimnak laakpiak ding ah Loikaw khuapi in a chuakmi SAC ralkap pawl cu an kah ṭhan hna i SAC ralkap 20 nak tlawm lo an thi chap, tiah theih a si.
July thla chungah KNDF le SAC ralkap kar kahdohnak voi 33 a chuak i SAC ralkap 84 an thih leng ah 3 an tlaih hna. KNDF in ralkap 2 nih ram le miphun ca ah nunnak an pek ve. KNDF lei nih SAC ralkap meithal zun 8 le zen-kuan tamlak an laak, tiah theih a si.
SAC ralkap nih vanlawng in voi 42 kahdohnak an tuah ruangah tualchung mi 4 an nunnak a liam i 8 hliam an tuar. SAC hriamngan kuan in tualchung mi 1 nunnak liam i 14 hliam an tuar pinah tualchung mi inn 13, biaknak he aa pehtlaimi inn 2, sii-khan 1 le cacawnnak sianginn 2 zong an rawk. Cun, SAC ralkap nih a ruang um loin tualchung mi 7 an thah hna, tiah theih a si.
Bawlakhe peng, Ywathit khuapi lei ah SAC ralkap nih rallam an sial i Karenni hriamtlai phu nih an kah hna caah SAC ralkap nih Ywathit khuami 300 hrawng zong ralphaw hma dingin an tlaih hna, tiah KNDF lei nih an thanh.
Karenni Ram Ah Thlakhat Chung Kahdohnak Voi 33 A Chuak; Ralhrang 84 An Thi 3 An Tlaih Hna. 2023, July thla chung lawng ah Karenni ramkulh ah kahdohnak voi 33 a chuak i SAC ralhrang lei 84 an thih pinah 3 kan tlaihkhih hna. Cu pinah ralhrang lei hriamthil tam ngai zong kan laak khawh chih, tiah Karenni Nationalities Defence Force(KNDF) nih cathanh an chuah.
Karenni ramkulh, Mese peng um SAC ralhrang sakhan pawl le ramri um an sakhan pawl zong June thla chung ah kan laak khawh hna caah SAC ralhrang le an kuttang hriamtlai pawl nih motor 100 leng in hriamthil tam ngai le pehtlaihnak thilri pawl cu tling tein an phurh hna i Loikaw khuapi ah luhpi in thazaang an chap hna, tiah an langhter.
July thla a zarh 3nak zong ah Shan ramkulh thlanglei Pinlaung khuapi in Loikaw khuapi chung ah a lutmi ralhrang thilri pawl a phurtu hna cu KNDF ṭangṭi phu hna nih an kahdoh hna caah an motor 3 a rawk i ralhrang lei 20 naak tlawm lo zong an thi, tiah an langhter chih.
Karenni ramkulh chung kahdohnak ah a faak ngaimi SAC ralhrang pawl nih chunglei kahdohnak le hriamngan kahnak voi tampi a tuah i July thla chung lawng ah cunglei in voi 42 a kah caah kum 11 ngakchia 1 telh in mipi 4 an nunnak liam i mipi 8 nih hliamhma an tuar. Cu pinah duhpaoh in an kahmi hriamngan ruang ah mipi 1 nunnak liam i 14 nih hliamhma an tuar. SAC ralhrang nih a ruang um loin mipi 7 zong an thah hna, tiah KNDF nih thawng an thanh.
Atu bantuk in SAC ralhrang nih cunglei le hriamngan pawl hmang in kahdohnak a tuahmi ruang ah mipi inn 13 a rawk i biaknak lei inn 2 zong an rawk chih. Cu pinah sii peknak inn 1 le sianginn 2 zong an rawk. Kahdohnak ah Karenni Nationalities Defence Force(KNDF) ralkap in minung 2 nih ram le miphun caah an nunnak an pek, tiah cathanh an chuahmi ah an langhter chih.