SAC Cawk Mi Russia Ser Su-30 Jet Fighter 2 Cu Myanmar A Rak Phan Cang!
===========
SAC ralkap nih Russia ser mi Su-30 Jet Fighter 6 an cawk mi hna chung in 2 cu Myanmar ram a phan cang, tiah SAC Minister of Industry Dr. Charlie Than nih Russia ram thawngzamhtu RIA ah a chimnak kong cu Reuters nih an langhter.
Russua sin in Su-30 Jet Fighter 6 caw ding in Russia le Myanmar cu a luancia 2022 September thla ah khan biahrennak an rak tuah. Ramhnih karah khualtlawnnak rian ṭhanchohter ding kong telh in hmailei chawleh chawhrawlnak kong zong ah hnatlaknak kan ngei lai, tiah Dr. Charlie Than nih cun a chim. 2018 lio ah khan Su-30 Jet Fighter cawk ding kongkau ah Russia le Myanmar cu minsen thutnak an rak tuah cang, tiah theih a si.
Fimcawnnak Hmun Kah le Hrawh A Tam Biknak Ram Ah Myanmar Aa Tel. A luancia 2022 kum ah vawleicung huap in fimcawnnak hmun kah le hrawh a tam biknak ram ah Myanmar aa tel ve, tiah Global Coalition to Protect Education from Attack (GCPEA) nih a donghnak bik thawngthanhnak an tuahmi ah aa tel.
Vawleicung ah fimcawnnak lei he aa pehtlaimi hmun kahnak hi voi 3,000 leng a chuak i Ukraine, Myanmar le Burkina Faso ram hna ah hin voi tam bik a cang, tiah GCPEA nih September 9, International Day to Protect Education From Attack ni ah an thanh.
A luancia 2022 chung ah siangngakchia le cachimtu dihlak 6,700 leng tlaih le thah an tong. Myanmar ram ah SAC ralkap le SAC ralkap a si lomi hriamtlai phu hna zong nih cacawnnak sianginn cu tinhchih in voi 500 leng an kah, tiah an langhter.
UN General Secretary Antonio Guterres nih cun ngakchia hna nih lungdai hnangam tein ca an cawn khawh nakhnga cawnnak hmun ṭha serpiak a herh, tiah a chim. Vawleicung ah hriamtlai phu khat le phu kar i kahdoh ruangah ngakchia 72 million nih ca an cawng kho lo, tiah a chimchap. Myanmar ram ah hin kahdohnak ruangah ngakchia 17 million cu ca cawng kho loin an um, tiah Education Cannot Wait phu nih an thanh.
Sianginn Hmunhma Kahdoh A Tam Biknak Ram Ah Myanmar Aa Tel. A luancia 2022 kum ah vawleicung huap in fimcawnnak hmunhma ah kahdohnak voi 3,000 leng a um i cu chung ah Ukraine hnu ah Myanmar hi pahnihnak a tambik ram a si tiah Fimcawnnak lei dohhlatnak a tuahtu bu Global Coalition to Protect Education to Attack nih September 9 ni ah a thanh tiah BBC Burmese nih a ṭial.
2022 chung ah siangngakchia le cachimtu dihlak 6,700 leng tlaih le thah an tong. Myanmar ram hngakchia pawl hi 2021 nak in 2022 ah an covo an buarpiak khun hna tiah 2023 June 27 ah UN General Secretary report ah an langhter. Cu bantuk nuhrin covo buarnak cu SAC ralkap nih a tam bik an buar i adang tlangcung hriamtlai pawl zong an i tel ve tiah cathanh chung ah an langhter.
2022 ah hngakchia thahnawnak le hliamhma tuarnak thil sinning (case) 512 a cang i cu chung ah SAC lei nih voi 377 an buar tiah theih a si. Sianginn le sizung kahdohnak voi 105 a um i SAC lei nih voi 66, PDF lei nih voi 12 an tuah tiah an langhter fawn.
SAC nih hngakchia bawmhnak petu phu telh in mipi pawl a doh hramhram hna caah thinphang a si tiah UN General Secretary nih a chim. Tlaih a tong mi hngakchia pawl thlah ding le SAC telh in hriamtlai phu vialte nih hngakchia covo upatnak pek piak ding in cathanh chung ah an langhter. Myanmar ram ah hin kahdohnak ruang ah ngakchia 17 million cu ca cawng kho loin an um tiah Education Cannot Wait phu nih an thanh.
Bago Yoma Ah A Um Mi Khagyin Tlang Sakhaan PDF Nih An Lak I An Khangh Beh. Bago Yoma ah a um mi SAC ralkap Khagyin tlang sakhaan cu PDF phufonh pawl nih an kah i an lak hnu ah sakhaan an khangh beh tiah thawng theih a si. Minhla peng, Seinkanlan-Myochaung lam, Khagyin tlang ah a um i khor zong ṭha tein an i cawhnak sakhaan cu September 9 ah Taryarwady pengkomh B3802, C 5 nih an lak hi a si.
Kahdohnak chung ah hriamngan, hriamhme hna hmang in an doh hna i SAC ralkap nih an kah ṭhan ve ko hna nain teinak an hmu tiah theih a si. SAC ralkap 20 hrawng, palek 10 le Thit-Ṭaw (သစ်တော) pawl nih hmunhma an khuarnak sakhaan a si i kahdohnak chung ah a thi mi cazin a fiang in theih a si lo tiah an langhter. SAC ralkap pawl nih sakhaan an zaamtak caah sakhaan an lak khawh i hmunhma an khuar ṭhan khawh ti lo nak hnga an khangh beh tiah theih a si. Credit: The Chinland Post