2026 ASEAN Chairman Hmunhma Cu SAC Pe Loin Philippines Tu An Pek
===========
ASEAN chungtel hna nih aa chang tein Chairman rian an tlaih tawn mi, 2026 ASEAN Chairman cu SAC pe loin Philippines ram tu nih ṭuan te dingin a sang bik ASEAN meeting nih bia an chah, tiah theih a si.
NLD nih cozah a tlaih lio ah hramhram in SAC ralkap nih nawlngeihnak an laak caah US telh in nitlaklei ram tampi nih faak piin duhlonak an langhter i chawleh chawhrawlnak lei in phihkhamnak an tuah lio ah a sang bik ASEAN meeting nih 2026 ASEAN Chairman a ṭuan ding cu Myanmar(SAC) si loin Philippines a si lai, tiah biakhiahnak an tuah.
2026 ASEAN Chairman ṭuan ding in timhcia kan si cang, tiah Philippines President Bongbong Marcos nih a chim. Asinain zeiruang ah dah 2026 ASEAN Chairman cu Myanmar ram nih ṭuan loin Philippines nih an ṭuan lai kong cu fiang tein a thanh lo.
Ram khat hnu ram khat chang in ṭuanmi ASEAN Chairman rian cu Myanmar ram nih 2026 ah a ṭuan ding a si nain SAC cozah nih tualchung mi cungah thahnawnnak a tuah ruangah le SAC ralbawi hna tuahsernak a cohlang lotu US, European Union le ASEAN karah i pehtlaihnak a rawh ding an duh lo caah 2026 ASEAN Chairman cu Philippines ṭuan dingin bia an chah, tiah ASEAN palai cheukhat nih an chim.
Karenni Ramkulh August Thlachung Ah Kahdohnak Voi 50 Tluk A Chuak; SAC Ralhrang 110 An Thi. Karenni ramkulh chung hmun dangdang ah 2023 August thlachung lawngah SAC ralhrang he kahdohnak voi 50 tluk a chuak i ralhrang lei in 110 an thi tiah KNDF nih September 5 ah thanhca an chuah.
Loikaw, Demoso, Hparuso le May-seh peng chung kahdohnak lawngah SAC ralhrang Lieutenant Colonel pakhat telh in 100 leng an thi i 40 leng hliam an tuar. Aluan cia August 2 thok in Demoso le Hparuso khua motor lampi cu humhak ding in aa zuam mi SAC ralhrang Tat-mah( 55 )kuttang Battalion chung in ralhrang phu 3 ah rallam sial mi hna he nifa tin kahdohnak a chuak.
Hi thlakhat chung kahdohnak lio ah ralhrang lei a thi mi le hliamtuar an tam caah SAC ralhrang nih raltuknak vanlawng voi 45 a hman. KNDF ralkap in minung 5 an nunnak liam. Ralhrang lei 3 an tlaih hna pin ah hriamnam fa mi zun 15 le a nganmi zun 1 telh in meithal kuan le hriamnam dang zong kan lak chih. Ralhrang vanlawng le hriamngan kah nak ruangah mipi 3 an thi i inn 30 leng a rawk pin ah Khrihfa biakinn 1 le sianginn 2 a rawk tiah KNDF nih an langhter chih.
SAC Ralhrang An Thathawhnak Caah An Mah Ralhrang Lila Le An Chungkhar Hna Cu TikTok An Zuamter Hna Lai. SAC ralhrang pawl an thathawhnak le an lungthin thawnnak ding caah an mah ralhrang le an chungkhar hna cu TikTok zuamnak an tuah ter hna lai tiah ralhrang chung neihniam hna nih an chim.
TikTok aa zuam dingmi hna nih, ralhrang hna thazaang ah an i lak ding mi hla, Myanmar ram chawleh thalnak kong, zatlaang sining kong, dothlennak tuah tu lei nih an langhter mi thawngpang hna cu nichuak capo ah tuah ding kong le ralram ah a kal mi ralhrang lei an thawhnak bia le hla tibantuk zong aa tel lai i a hnubik September 5 ah nan kuat cio dih lai tiah a thlithup in thawngthanhnak an tuah.
Cu an i zuamnak Vedio cu minute 3 tluk lawng a sau lai i Social Media ah tar a si lai, hi zuamnak ah a thiambik pakhat nak laksawng sing 1, pahnih nak 50,000 le pathumnak ah 30,000 pek an si lai pin ah a dang tein laksawng phun 2 a um rih lai tiah ca an chuah mi ah an langh terchih.
“Rampi huap in ralhrang pawl le an chungkar cio TikTok zuamter ding in thawngthanh dih an si, an laksawng zoh tik ah a phupha lo. Social Media ah TikTok hi mitam deuh nih an vun hman ngai caah a tu an tuah mi ralhrang lei thathawhnak le ralhrang ttanh hlei nak kong TikTok zuamnak an tuah mi zong hi mitam deuh nih zoh kho hna seh ti ruahnak an neih caah a si” tiah ralkap CDM pakhat nih a chim.
Myanmar Ram SAC Ralkap Cu Ralhrang Phu Tiah ASEAN People’ Forum Nih Thawngthanhnak An Tuah. Indonesia ram Jakarta khua ah tuah mi ASEAN People’ Forum 2023 tonpumhnak ah Myanmar ram SAC ralkap phu cu ralhrang phu tiah September 3 ah langhter in thawngthanhnak an tuah.
Myanmar ralkap hna nih Miphun pakhat ci hmih khawhnak tiang sual a tuah rung le ralkap phung le phai buar in mipi cungah lainawn nak a tuah mi ruang ah a tubantuk in ralhrang phu tiah kawh auh in thawngthanh nak an tuah hi a si.
Brunei, Cambodia, Indonesia, Lao, Malaysia, Philipine, Singapore, Thailand, Timor Leste le Vietnam ram hna in zatlaang phu tonpumhnak chungah a tubantuk in Myanmar ram mipi hna sin ah lungrual te le hmunkhat ah kan dirpi hna tiah APF nih an langhter. Ni 945 tiang Myanmar ram SAC ralhrang nih uknak a kal pi mi zong a tlamtling lo tiah hi Forum cathah chuah mi ah an langhter.
Mah pin ah NUG, NUCC, ERO le zatlaang phu hna telh in dothlennak ah aa teltum mi phu pawl hna lawng pehtlaih ding le an mah sin in bawmhnak luh ter ding kong zong ASEAN Civil Society Conference/ ASEAN People’ Forum ACSC/APF nih an langhter chih. Credit: The Chin Post, Lungmili Media