Israel Nih Hamas Ralkap 700 Renglo An Tlaih Hna
=========
Kan hnu zarh chung khan Israel ralkap nih Hamas chungtel minung 200 naak tlawmlo biahalnak tuah dingin an ram chungah an rak hruai hna tiah ṭuanvo ngeitu hna nih an chim. Misual ah ruah zumh mi cheukhat cu tualchung mipi sin ah aa thup mi hna cu anmah tein an i pe tiah an chim. Gaza hmunram kah thoknak in a tu tiangah Hamas chungtel 700 renglo an tlaihkhih cang hna.
Hamas nih Palestinian nu le ngakchia tam deuh hi Israel nih an kah thah hna tiah an chim. Hi kong ah Israel nih lehnak a tuah micu tualchungmi hramhram in kan kah hna a silo an ralkap mipi sin an i fonh caah a si tiah an chim.
October 7, Hamas misual hriamtlaiphu nih Israel hi kah hram an thok i minung 1,200 an thah hna pin ah 240 an tlaihkhih hna. Israel nih lehrulhchamnak a tuah mi ah Gaza hmunram ah minung 20,000 naak tlawmlo an thi, 50,000 renglo hliam an tuar. Gaza kahdohnak ah Israel ralkap 144 tluk an thi, Gaza ram thlanglei hmunram cu voikhat ah tei dingin an kah caah mipi hmun himnak ah i ṭhial dingin an theihter hna.
Czech Ram Charles Sianghleirun Meithal Kahnak A Chuak Mi Ah Minung 14 An Thi. Czech ram sianghleirun pakhat ah meithal pu pakhat meithal puahnak in minung 14 an thi, 25 nih hliam an tuar, tiah ṭuanvo ngeitu hna nih an chim. Hi thil hi Czech ram tuanbia ah meithal kahnak in nunnak liammi an tambik caan a si. Meithal kahnak a chuaknak hmun hi Charles Sianghleirun ṭhing ah a si i, meithal keng tu pa kum 24 cu palik hna nih an kah thah tiah theih a si.
Meithal kahnak hi December 21, sianghleirun pakhat ah a cangmi a si i, minung tampi cu himnak dingah inn-dot in an zuang i hmunhimnak ah an zaam tiah an langhter. Meithal kengtu hi sianghleirun ah fimcawng liomi pa a si, zei bantuk ruahchannak in dah mah thil hi a tuah an thei kho lo.
Malaysia Ah Myanmar Rammi Hna Telh In Minung 500 Leng Tlaihkhih An Tong. Malaysia ram, Kuala Lumpur khuapi ah December 21, chun suimilam 11:00 (Malaysia Times) ah Malaysia ram Lah-wah-kah zung le zung kip fonh in ṭuanvo ngeitu hna minung tangzaang 1,000 leng nih ramdang mi hna an umnak Kotaraya Mydin khuapi an luhhnawh i Myanmar rammi hna telh in minung 500 leng an tlaih hna, tiah Malaysia ram Lah-wah-kah phu nih thawng an thanh.
Malaysia ramchung ah ramdang mi hna nih phungning lo in chawleh chawhrawlnak, visa cauk chuahpiak, phungning lo in mizaw zohnak, License ngeih lo bu in zu le beer zuarmi, ritnak siivai cawkzuarh le a dang phungning lo thil hna an tuah tiin report a um caah atu bantuk in kan luhhnawh hna hi a si, tiah an langhter.
Tlaihkhih a tongmi hna lak ah a tam bik cu Bangladesh rammi hna an si i Nepal le Myanmar rammi hna telh in an dihlak minung 500 leng cu Pusat Latihan palik sakhan ah chiah an si, tiah an langhter chih.
Aluan ciami November 22 zong ah Chin miphun hna an tam biknak Bahut khuapi cu atu bantuk in an luhhnawh caah naupawi mi hna le ngakchia hna telh in Chin miphun minung 48 an tlaih cang hna, tiah KRO phu sin in kan theih.
Lamka Khuapi Ah Kuki-Zo Miralṭha Hna Ruak 87 An Vui Hna! India, Manipur ramkulh, Lamka khuapi ah December 20, chun suimilam 2:00 tluk ahkhan miphun buainak ruang ah nunnak liammi Kuki-Zo miralṭha hna ruak 87 cu upatnak an pek hna hnu ah an vui hna, tiah kan theih.
Lamka khuapi um sii-inn ah an chiahmi ruak 46 le Imphal khuapi JNMS, RIMS morgue in Manipur ram nawlngeitu hna nih December 14 ah helicopter in an kuatmi ruak 41 a dihlak fonh ruak 87 an si i upat peknak he an vui hna, tiah Lamka khuapi tualchung thawngzamhnak nih an langhter.
Kuki-Zo miphun chung in a thimi miralṭha hna ruak 87 an vuinak kong he pehtlai in Kuki-Zo tuanbia ah ruakvui an tambik ni a si. Manipur ramkulh ah May 3 thok in Kuki-Zo miphun hna lak ah thah a tongmi minung 117 tiang an phan i cu chung ah miralṭha hna ruak 106 cu upat peknak he an vui hna nain a dang ruak 11 tu cu nihin tiang hmuhkhawh an si rih lo.