Hawaii Ramlak Kanghnak In Minung 36 Naak Tlawmlo An Thi
=========
Hawaii ramlak Maui hmunhma kanghnak in minung 36 naak tlawmlo an thi cang tiah ṭuanvo ngeitu hna nih an langhter. Thlichia/ṭotho nih hin meikanghnak a fahter chin chin caah chungkhar khuasaknak inn tampi le rianṭuannak hmunhma a rawk tiah theh asi.
Tualchung minung thong tampi cu hmun himnak ah ṭhial ansi cang hna. Chaitṭhat zohkhenh tu phu nih bawmhchanhnak zong ṭhawng chin chin in an kalpi tiah ṭuanvo ngeitu nih an langhter.
Tulio dirhmun ahcun tualchung hi a him tilo caah a herh ning in meithat tu phu hna cu cawlcanghnak la dingah cozah nih a nawl hna tiah theih asi. Maui ah khualtlawng luhchuah khap asi i, hi hmun ah hin i dorchungnak inn 5 an ser chih. Cunglei helicopter hmangin meialh hi hmih dingah an cawlcang tiah kan theih.
President Joe Biden Thah Ding In A Hrocer Tu Robertson FBI Nih An Kahthah. CCN news nih a langhter ning in, Utah khuapi ah khuasa mi Craig Robertson cu August 9, ah FBI nih an kahthah tiah theih asi. FBI nih an langhter ning in, Mr Roberston nih hin online chungin American president Joe Biden thah dingin a ṭhihphaih tiah an langhter.
August 9, zing suimilam 6:15 tluk ah FBI nih an kahthah mi Robertson nih hin America president Joe Biden hi Salt lake khuapi Utah lei panh in a kal lai ti a theih bak in online chungah vunra seh sniper in ka rak kahthah lai tiah ṭhihphaihnak a tuah tiah an langhter.
France Ram Mitlamtlinglo Hna Khuasik Thla Dinhnak Caan Hmang Ding In Kalmi Hna Umnak Inn Kanghnak In Minung 11 An Thi. France ram khuachak lei lam mitlamtlinglo hna khuasik thla dinhnak caan hmang ding in kalmi hna umnak inn (Vacation Home) pakhat ah August 8, khan meikanghnak a chuah i minung 11 an thi tiah The Associated Press nih a langhter.
Meikangh chuahnak hmun ah meithattu phu hna cu rianrang in kalter ansi i, meialh hi caan raulo teah an hmihkhawh colh tiah Haut-Rhin prefecture nih a chim. Meikanghnak hmun in minung 17 cu chanhchuah ansi i pakhat hi a dirhmun derthawm caah rianrang in sii-innpi ah an tlikpi colh tiah a chimchap.
Nunnak liam mi hna hi Wintzenheim khuapi in meng 90 tluk a hlatnak hmun France khuapi Nancy in khuasik thla dinhnak caan hmang ding in ara mi bu ansi hna tiah an langhter. Hi kong he pehtlai in, France president Emmanuel Macron a chim micu hi mibu chungah hin mitlamtlinglo le an hawikom cheukhat hna an i tel tiah chim in nunnak liammi chungkhar a tuarpinak hna zong a langhter tiah theih asi.
Australia Ram Ah Chungkhar Pakhat Ah Minung 3 Pa Eisualnak In An Nunnal Liam. Australia ram chungkhar pakhat ah minung 4 rawl eiṭimi lak in minung 3 cu (Mushroom) eisualnak in an nunnak a liam tiah theih asi.
July 19, khan hi thihnak konglam he pehtlaiin Australia palik hna nih chungkhar rawlchum tu nu cu a umnak inn ah fuh in tonbiaruahnak an tuah cang tiah an langhter. Sihmanhsehlaw amah zong damloin aum lio si caah zeihmanh buainak anpe lo tiah an chim. Australia palik nih August 8, tiang khan chungkhar pakhat minung 4 cung ah pa (Mushroom) eisualnak in a thi mi 3 le damlo in a ummi rawlchumtu nu konglam hi hlathlainak an tuah tiah theih asi.
Sudan Buainak Ruangah Tualchung Mipi 4 Million Tluk Nih Khua An Chuahtaak. Sudan buainak a fah chin chin caah tualchung mipi 4 million tluk cu an khuasaknak hmun in hmunhimnak ah an zaam tiah theih si. Hi lak ah minung 884,000 renglo cu an innpa hna khua/ram ah an i dor tiah UN nih an langhter chih.
Sudan buainak nih hin thihlohnak a chuahter lawng silo in din-ei lei zongah harsatnak fakpi a chuahter tiah U.N refugee agency biachimtu William Spindler nih a chim. May thla in July thla tiangah din-ei ṭhatlo ruangah mipi 300 tluk nunnak a liam. Cu lak ah atam deuh cu ngakchia kum 5 in atang lei mi ansi hna tiah an langhter chih.
Kum 2023; April thla thok in Abdel Fattah Burhan hruai mi ralkap hriamtlai phu le Mohammed Hamdan Dagalo hruaimi ralkap hriamtlai phu karlak ah buainak a chuak mi asi i Khartoum khuapi le hmun dang dang ah kahdohnak fak a chuak tiah theih asi.
Omdurman’s Al-Nou sii-innpi ah hliamtuar zohkhenhnak thisen peknak lei le oxygen lei ah harsatnak tampi a chuak tiah Sudan sii-bawi Union hna nih an langhter. June thla tiang khan Sudan buainak ruangah minung 3,000 tluk an thi cang tiah an chim. Mah hnu ah nunnak liam mi, milurelnak zeihmanh an tuah tilo tiah Sudan cozah nih an langhter. Credit: Lungmili Media