Hakha No.3 B.E.H.S A Kaang!
==========
Chin ramkulh, Hakha khua ah a um mi No. 3 B.E.H.S a kaang tiah thawng theih a si. August 5 zaanlei sml 6:30pm hrawng ah atu bantuk in No. 3 B.E.H.S a kangh hi a si. Sianginn kanghnak kong he pehtlai in zeiruang dah a kangh le mi zei nih dah an khangh ti cu a fiang theih a si rih lo caan thawng tling deuh in thanh khawh ṭhan kan rak i zuam lai.
Hakha Pyidawtha sang (HBC Biakinn pawng) No. 3 Siangsangrun (High School) inn nihin August 5 (Nirukni) Zaanlei sang ah a kang tiah kan theih. A kangmi a lang in a cuanmi khuami nih, “A kangh hi zaanlei sml. 5:30 fai hrawng ah si dawh a si, 5:45 ahhin a mei a lio (ngan) tuk cang,” tiah an chim.
A kanghnak a ruang bel hngalh a si rih lo, nain khua mi cheukhat nih, meihri a sawt mi in a si kho men tiah an ruah damh. A kanghnak hmun ah meithat mawtaw zong a phan cang tiah theih a si.
A kangmi inn hi a thlanglei bik ummi David Van Bik Building tiah min an pek mi si dawh a si tiah kan theih.
No. 3 High School, Pyidawtha, Hakha cu American Baptist Mission (ABM) Sianginn a rak si i, Ralkap uknak chan lio ah ABM Sianginn cu Cozah nih nawlngeihnak an rak chuh i, caan saupi a rauh hnu ah High School sinak an rak pek mi a si.
Khuami An Zaam Kar Ah Khampat Khua Inn 15 Leng A Kaang! Sagaing ramṭhen, Tamu peng, Khampat khua cu SAC ralkap le tualchung hriamtlai phu kar kahdohnak ruangah a luancia July 23 in tualchung mipi dihlak nih an rak zaamtak i, culio ah no.1 sangchung ah inn 15 leng a rak kaang, tiah theih a si. No.1 sangchung ah a kaangmi inn 15 hna hi inn ṭhaṭha le sakliomi inn an si, tiah tualchung mi pakhat nih a chim.
“Tutan ah SAC ralkap nih an khanghmi inn hna hi SAC ralkap le palik nih umhmun an khuarnak sang a si caah an pawngkam, an duhnak inn paoh cu an khangh hna,” tiah SAC ralkap khanghmi a si kong a chimchap.
“Inn khanghpiak a tongmi chungah NLD party a ṭanhtu le USDP party chungtel zong an i tel. Cucaah timh ciammam tein an khanghmi siloin an duhnak hmun paoh an khanghmi a si,” tiah a chim. Inn 15 an khangh pinah thilri man fak deuh le an duhmi thilri paoh an i laak, tiin khuami hna nih an chim tiah Chin World nih a ṭial.
Khampat Khua Ralzam Mi Ah Kum 103 Tluk Kum Upa Pakhat Aa Tel. 2023 July thla dih lai Khampat khua kahdohnak lio ah khuami a zam mi hna chung in Kum 103 tluk Pu Sieh Khan Mang zong inn le lo chuah tak in a zam.
Pu Sieh Khan Mang cu a ralai mi September 17 ah kum 103 a tling cang lai. “Amah cu Khampat khua sangthen No.1 ah a um mi a si i Zo miphun chung ah kum upa bik zong a si” tiah khuami hna nih an chim. A thong lengin ralzam mi chung zong ah kum upa bik zong a si lai zumh a si. A mah cu ralzam in a himnak hmun pakhat an phak tiang ah ngandam tein a um rih.
Pu Sieh Khan Mang cu Mirang nih Myanmar ram a rak uk lio, Japan ral lio, Myanmar ram zalonnak a rak hmuh ka, ralkap nih uknak a rak lak ka tibantuk chan zong a rak tem cang mi le Japan ral lio zongah ral a rak zam bal cang mi upa pakhat zong a si tiah kan theih.