Falam Khuapi Ah SAC Ralhrang Nih CNDF Ralkap Pakhat An Tlaih!
=========
Chin ramkulh, Falam khuapi, Cinmual sang ah November 27, zanlei suimilam 3:00 hrawng ah Chin National Defence Force(CNDF) ralkap pakhat cu SAC ralhrang nih an tlaih, tiah tualchung mi hna nih an chim.
“CNDF ralkap pathum hrawng an si i, Falam khuapi Cinmual sang um siangsangrun No.2 lamcung ah SAC ralhrang pawl he hmaitonh in an i tong i hnulei kir ṭhan in zaam an i timh lio ah SAC ralhrang pawl nih meithal an puah i pakhat cu an tlaih. A dang pahnih cu an zaam kho. Tlaihkhih a tongmi pakhat cu meithal hliamhma a tuar le tuar lo kan thei kho lo. Falam khuapi um SAC ralhrang sakhan pi ah an kalpi” tiah tualchung mi pakhat nih Zalen ah a chim.
SAC ralhrang thawngzamhnak Telegram nihcun ” Misual a thimi ruak pakhat kan hmuh. Kut cheh bomb 1, Drone battery 1, CNDF hmelchunhnak aa telmi luchin 1 zong kan laak chih” tiah an langhter.
Hi kong he pehtlai in nunnak liammi an um le um lo cu ṭuanvo ngeitu phu hna nih thawngthanhnak zeihmanh an tuah rih lo nain thlaihkhih a tong timi tu cu ṭuanvo ngeitu hna sin in theih a si.
Kokant Peng SAC Ralhrang Sakhan 4 MNDAA Nih An Lak Ṭhan, SAC Ralhrang Sakhan 152 An Laak Cang. Shan ramkulh, chaklei Kokant peng SAC ralhrang sakhan 4 cu Kokant MNDAA hriamtlaiphu nih an lak ṭhan, SAC ralhrang sakhan 152 an lak cang tiah MNDAA nih an langhter.
November 16, zing suimilam 5:30 tluk khan Kokant peng, Tonsham hmunram SAC ralhrang sakhan cu MNDAA nih suimilam 6 chung tluk an kah hna hnu ah, zing suimilam 11:30 ah an lak khawh. Cu ni ṭhiam zanlei suimilam 3:15 tluk khan Kokant peng SAC ralhrang sakhan hmundang ah a ummi 1 cu minute 25 tluk an kah hnu ah an lak chap tiah theih chih a si.
November 17, khan Kokant peng, Shisham hmunram, Chinchomthang khua pawng SAC ralhrang sakhan 1 zong MNDAA an lak khawh ṭhan. Cu ni ṭhiam zanlei suimilam 2:37 tluk ah Chinchomthang khua pawng SAC ralhrang No. 2 sakhan zong an lak chih tiah theih a si.
Madaya Peng PatlayInn Khua Ah A Ummi SAC Ralhrang Luhhnawh In An Kah Hna 10 Renglo An Thi, 1 An Tlaih. Mandalay ramṭhen, Madaya penmg, Patlayinn khua ah a ummi SAC ralhrang mipi ralkap nih luhhnawh in an kah 10 renglo an thi, 1 an tlaih, tiah NUG nih an langhter.
November 16, khan Madaya peng, Patlayinn khua i ralbawi Kyaw Hin hruaimi SAC ralhrang thazaang 50 tluk umnak sakhan cu mipi ralkap People’s Defence Army Battalion, Singu စဥြ့ကူး peng Pah Kah Phah le Madaya peng Pah kah Phah nih luhhnawh in an kah tiah theih a si.
Kahdohnak hmun ah SAC ralhrang 10 an thi, 5 hliam an tuar, 1 an tlaih, meithal 3, Kuan bawm 49 le kuan chiahnak bawm 7 an lak tiah theih a si. Kahdohnak hmun, SAC ralhrang thazaang chap dingin a rami ralhrang nih Aungkantha khua pawng an phak ah Arr Thit lakphaktidawr cu ruang umlo in an kah caah tualchung mipi 11 lak ah 1 nunnak liam, tiah theih a si.
Loikaw Khuapi Biaceihzung Ah Umhmun Khuarmi SAC Pawl Cu An Kah Hna I Mei In Khangh. Karenni ramkulh, Loikaw khuapi ah ummi biaceihzung ah umhmun khuarmi SAC ralhrang pawl cu Karenni hriamtlai phu hna nih luhhnawh in an kah hna caah an laak khawh i biaceihzung zong mei in an khangh piak hna, tiah ralhmai thawng latu cheukhat sin in kan theih.
“Biaceihnak zung ah umhmun a khuarmi SAC ralhrang pawl luhhnawh in an kah hna i biaceihzung zong an khangh piak hna. Nihin November 17, zing suimilam 10 hrawng ah mei a kaang. Kahdohnak cu zinglei tuandeuh ahkhan a si.
Zung chung ah ummi ralhrang pawl cu a zaammi an um i, a thimi zong an um. Biaceih zung cu an laak khawh cang” tiah ralhmai thawng latu pakhat nih Khit Thit ah a chim. Karenni ralkap hna nih Loikaw khuapi um SAC ralhrang pawl nih umhmun an khuarnak sianghleirun zong luhhnawh in an kah caah an laak khawh cang, tiah theih chih a si.
Pauk Peng Kahdohnak Ah Palik Le Pyusawhti 32 An Thi I PDF 21 An Nunnak A Liam. Magway ramṭhen, Pauk peng, Zee-Pyar khua um SAC ralhrang chungtel palik sakhan le pyusawhti khua cu tualchung hriamtlai ṭangṭi phu hna nih ni 5 chung an kahdoh hna caah palik le pyusawhti 32 an thi i PDF ralkap 21 an nunnak a liam ve, tiah Myaing peng PDF nih nihin November 17 ah thawng an thanh.
2023, November 10 in 15 tiang Zee-pyar khua palik sakhan le Zee-pyar (Pyusawhti) khua cu tualchung PDF ṭangṭi phu hna nih luhhnawh in an kah i ralhrang pawl nih umhmun an khuarnak hmun paoh cu an laak khawh dih pinah SAC ralhrang nih an sakmi sakhan pawl zong an khanghpiak hna, tiah Myaing peng PDF nih an langhter.
Cu kahdohnak lio ah SAC ralhrang nih raltuknak helicopter Mi-35 in voi 3 tiang a rak bawmh hna i Rocket pawl, seh meithal pawl in an kah chih hna pinah Kah-pah-sah 24 in 120 MM hriamngan in an kah bawmh chih hna, tiah an langhter.
Tualchung PDF ṭangṭi phu hna nih khuachung dihlak cu an laak khawh ko nain SAC chngtel pawl nih an kulh dih hna caah PDF pasalṭha 21 an nunnak a liam i meithal cheukhat zong ralhrang lei nih an laak, tiah an langhter chih. Kahdohnak cu Myaing Pah-kah-phah battalion 1, 2, Pauk khua Pah-kah-phah phu hna le ṭangṭi phufonh hna kan si, tiah Myaing PDF nih an langhter chih. Credit: Lungmili Post