Mindat Peng Ah Khuami 40 Tlaih An Tong!
=========
Mindat peng nih 2 chung ah SAC ralkap nih khuami 40 tlaih in bia hal an tong tiah theih a si. September 12 ah Magwe ramṭhen le Chin ramri, Mindat peng, Dantdi khua sianginn ah SAC ralkap nih saya/mah telh in sianghngakchia 35 an tlaih hna. Magwe ramri in a rak kai mi SAC ralkap 100 hrawng nih an tlaih hna tiah The Mindat Post nih a tial.
“An tlaih mi pawl cu an thlah ṭhan cang hna, khuachung thilri le eidin an lak, Kum upa deuh pakhat cu hrem in an velhnak hma ruang ah lam a kal kho rih lo tiah khuami nih an chim. “September 13 zinglei ah Mindat khuachung, Bawahthit sang nu le hngakchia zung pawng ah kum 17 hrawng pa 3 zong SAC ralkap nih an tlaih hna” tiah khuachung mi sin in theih a si.
Tlaih a tong mi pa 3 cu Battalion 274 lei ah an kalpi hna, zeitin an tuah hna ti thawng theih a si rih lo. CDF-Mindat nih Mindat khuachung um mipi uknak ralrinnak kong cu August thladongh lei ah thawngthanhnak cathanh an rak chuah cang tiah theih a si.
Chin National Front(CNF) Nih An Ngaihchiatnak Cathanh An Chuah. CNF party ah Assistant Secretary a ṭuan liomi Salai Aung Thu(pumpak party number 817938) cu hi vawlei nunnak in nizan September 12 ah a nunnak a liam, tiah CNA nih ngaihchiatnak cathanh an chuah.
Salai Aung Thu nunnak a liam hi CNF ca ah sungh zawtlaknak nganpi a si i a tantaakmi a chungkhar le a sahlawh rualchan zong nan ngaihchiatnak kan in hrawmpi hna, tiah CNF nih cun an ngaihchiatnak an langhter. Salai Aung Thu cu SAC ralkap a hram in bongh ding le Federal rampi ser khawhnak ca ah cunglei nih nawl kan pek i miphun ca ah rian a ṭuan lioah ruah lo piin a kan liamtaak, tiah CNF nih cun an thanh.
“Nunnak a liammi Salai Aung Thu rian le a lohma ban a simi miphun dohthlennak rian hi CNA ralkap hna nih pehzulh in kan rak ṭuan lai. Salai Aung Thu nang cu na rianhmi na Pa Pathian ṭangnem cung ah lungdai hnangam tein i din cang,” tiah CNF nih cun ngaihchiatnak cathanh an chuah.
Hakha Khuachung Ah Dothlennak Phu Pawl Cawlcanghnak Ngiat Ding In SAC Nih CCTV Camera Hmun Tampi Ah A Bunh. Chin ramkulh ah SAC nih an zungpi hram an bunhnak Hakha khua ah SAC nih CDF le Dothlennak phu pawl cawlcangh ngiathlai ding in Security Camera pawl khuachung hmun (5) nak tam ah a bunh tiah CHRO le CDF phu lei nih an chim.
“Hakha khuachung ah CDF pawl nih SAC ralkap sakhaan pawl, palek sakhaan pawl le himnak an laknak hmunhma pawl kha an kah khawh mi a si. Kahdohnak a um tik ah SAC nih CDF pawl cawlcanghnak kha ngia kho ding in, an i runven khawh nak hnga CCTV Camera an bunh hi a si tiah ruah khawh a si” tiah CHRO Project Director Salai Mang Hre Lian nih Khonumthung Burmese ah a chim.
CCTV Camera pawl cu SAC zung he a naihnak hmun pawl, Chin ramkulh Chief Minister hlun inn pawngkam le a inn kalnak lam hmunhma, biakinn kalnak lam hna ah an bunh. Hakha khuachung umkalnak vialte kha ngia kho ding in hmun 5 ah CCTV a bunh kha fehter khawh a si tiah a chim fawn.
SAC nih Hakha khuapi ning in CCTV Camera bunh aa tim ko nain atutiang cun a tuah kho rih lo tiah theih a si. Hramhram in uknak lak a rak si hlan ah, Bank le Sizung pawl ah CCTV Camera an hman ko nain atu ahcun SAC ralkap sakhaan, cheukhat zung le an cawlcanghnak hmun pawl ah CCTV Camera an bunh cang tiah Hakha khuami pakhat nih a chim.
CCTV Camera pawl an bunh hnu cun mipi tlaihkhih le cheknak pawl an tuah chin khawh mi a si caah thinphang a si tiah khuami hna nih an chim fawn. “Thawngpang kan theih mi a um. SAC nih Hakha khuachung an sakhaan pawl, himnak an laknak hmun pawl le cheukhat zung ah CCTV an bunh. Adang a biapi mi hmunhma pawl zong ah an bunh hna tiah thawng kan theih” tiah CDF-Hakha rianngeitu pakhat nih a chim.
Hakha peng chung ah CDF, CNA le SAC ralkap karlak ah atu le atu kahdohnak a chuak ṭheo tawn. Hramhram in uknak lak a si hnu kum 2 le cheu chung ah SAC zung le sakhaan pawl ah kahdohnak a um pah lengmang.
Mizoram Ah Myanmar Rammi Pahnih Sinin Meithal Kuan Tlaih A Si! Mizoram ramkulh thlanglei, Siaha pengkomh ah Myanmar mi pahnih le mizoram mi pakhat sinin AK 47 kuan 1800 cu Mizoram palik le Assam Rifle nih an tlaih.
September 12 ah Saiha pengkomh Tlangpuikawn ah Mizoram palik le Assam Rifle nih cycle pathum cu chekhlatnak an tuah i AK 47 meithal kuan 1,800 he an tlaih hna, tiah Mizoram thawngzamhca Zalen News nih a langhter. Meithal kuan he tlaih a tongmi pathum chung ah minung pahnih hi Myanmar mi an si i an pathum in Saiha palik nih an laak hna, tiah theih a si.
Cu bantuk in Champhai pengkomh, Chalbawiha Junction, Khankawn check gate a hngaktu palik nih Myanmar mi, Khuamawi khuami Lalthangvunga motor ah ritsii(heroin) gram 410 in a ritmi an tlaih. Lalthangvunga hi tlaih a si i, foreigner act in taza cuai a si pinah hlathlainak tuah ding a si lai, tiah Mizoram palik nih an thanh. Credit: The Chinland Post, The Chin Post