Breaking News : Auto Tlang Um SAC Ralkap Nih Thlualam Ah Bomb An Thlak!
==========
Auto tlang ah umhmun khuarmi SAC ralkap nih nihin August 30 zaanlei suimilam 4:00 hrawngah Thlualam khua cu hriamngan in an kah i hliamhma tuar le nunnak liam mi an um, tiah kan theih. SAC ralkap hriamngan kahmi bomb cu Thlualam khua le tlanglo rianṭuannak hmun ah an tla. Thlualam ah ralhrial in aa dormi Pu Ca Thang cu lo i a umnak hmun ah hriamngan hliamhnak in a nunnak a liam. Cu pinah Thlualam khua zong ah hliamhma tuar mi an um, tiah kan theih.
Hliamhma tuarmi hi minung zeizat dah an si thawngfiang kan thei kho rih lo. “SAC ralkap nih Auto tlang ah 120mm hriamngan an i chiah caah Thantlang peng ummi khuakip hna cu i ralrin ngai kan herh cang ko,” tiah tualchung mi pakhat nih The Chin Post ah a chim.
2023 August 30 zaanlei ah Thantlang peng Thlualam khua le kiangkap ah bomh voi 4 leng a tlak caah khuami minung pathum hliam an tuar i, pakhat a nunnak a liam tiah thawng kan theih. Hi kong he pehtlai in Thantlang peng mi pakhat nih, ”Lo ah a riak mi Pu Ca Thang cu bomb hliamhnak in a nunnak a liam, cun khuachung mi Pu Tin Hmung le ngakchia pahnih hliam an tuar” tiah a chim.
Inn le lo a rawk mi zong an um tiah theih a si i phone line that lo ruangah fianghlang in theihfian khawh a si rih lo. Bomb a tla mi pawl cu SAC ralhraang nih khoika in an kah mi a si ti mi le zei bantuk bomb dah an si ti mi fiang in hngalh a si rih lo.
Thantlang kahdohnak ah Chin ralkap nunnak a liam mi hna diriamhnak kong Falam holh in a taar (post) tu kha Falam mi a si lo. Tg Sianpi Zomi a si i Falam Duhdawttu timi group ah mindeu (fake account) in a taar.
Hi pa cataar ruangah Falam kan unau hna cungah lungfahnak, ingpuannak, thinhunnak a chuahter. Cucaah mah ca a taartu kha Falam mi si lo ti kha theihternak kan vun tuah. Dohthlennak ah hin kanmah le kanmah karlak ah thencheunak, i hmuh thiam lonak, i sikhuatnak chuahter dingin MAH le amah tanhtu hna nih a phunphun in an i zuam peng lai. I ralrin ngaingai a herh.
Ruahdamhnak: Cheukhat nih Tg Sianpi Zomi a si lo. Ngun Nei Mawi a si an ti i hi zawn i an i comment mi zoh tikah an pahnih in CNA a hua ve ve mi an si ti a fiang. Cun mah min pahnih hi a hmangtu pakhat zong a si kho.
Tonzang Ah ZRA Nih Ralvennak An Tuahlio Hman A Thlatu Pastor Pakhat Cu ZRA Nih An Velh! Chin ramkulh, Tonzang ah nizaan August 28 chun suimilam 12:00 hrawng ah pastor pakhat cu Zomi Revolutionary Army (ZRA) nih an tukvelh, tiah Tonzang khuami nih an chim.
ZRA nih an velh mi pastor pa hi Tonzang peng, Nar Zang khua EBC Church pastor Vanpi a si. ZRA nih Tonzang khuachung ralvennak an tuahlio ah hman a thlak i a hawi pakhat sin a kuat hnu in social media ah SAC ralkap le ZRA an ṭangṭi tiin thawngpang a len caah atu bantuk in an tukvelh, tiah pastor pa he naihniam in a ummi nih a chim.
“Pastor pa nih ZRA khuachung an tlonlen lio cu hman a thlak i a hawi pakhat sin ah hmanthlak a kuat, cu hmanthlak cu a hawi nih social media ah langhter dawh a si. Cu hmanthlak cataar ah cun ZRA le SAC ralkap i fon in runvennak an tuah tiah langhter a si tikah, SAC ralkap he an ṭangṭi timi bia an hmanpiak hna cu an duh lo,” tiah a chim.
ZRA hriamtlai phu nih an tukvelh mi pastor pa cu a lu le a keeng ah hliamhma a pu i Tedim siizung ah an zohkhenh lio a si, tiah a chimchap. Tonzang um SAC ralkap hna cu Tonzang khuachung ah um loin sakhan lawng ah an um i, khuachung ah cun ZRA nih humhimnak an laak kong tualchung mi nih an chim, tiah Chin World nih a ṭial.
Kalay-Ye U Motor Lam A Awn Hnu In Kalaymyo Ah Datsi Man A Ṭum Ṭhan Cang. Sagaing ramṭhen, Kalaymyo ah Kalay-Ye U motor lam a awn hnu in datsi man cu a ṭum i a hlan ningkel a phan ṭhan cang, tiah Kalaymyo ummi hna nih an chim.
Kalay-Ye U motor ah a luancia August 5 ni thawk in SAC le PDF kar kahdohnak a rak zual ruangah cuka lam cu caan karlak chung an rak kham i Kalaymyo le Chin ram ah thil man le eidin man a kai pinah thilri le datsi man zong a rak kai dih.
Kalay-Ye U lam cu August 26 zinglei in a awn cang caah datsi phortu motor nih Kalaymyo ah datsi an phorh i datsi man le a dangdang thilri man a rak kaimi hna zong a hlan ningkel an si ṭhan cang, tiah Kalay ummi hna nih Chin World ah an chim.
Nai te ah datsi 1 litre ah kyats 5,000 a rak simi cu 3,000 ah a ṭum i arti pum khat ah kyats 700 cu 400 ah a ṭum ṭhan cang, tiah theih a si. Kalay-Ye U motor lam a rak awn hlanah datsi dawr ngan pipi ah thawl khat kyats 5,000 in an rak zuar i datsi a rak ting lomi zong an rak tam. Cu lioah a leng ah datsi thawl khat kyats 10,000 tiang a rak phan, tiah theih a si. Credit: The Chin Post