Manipur Buainak: Tualchung Mipi Le Venhimnak Rianṭuantu Hna An I Nam
=========
Manipur Imphal khuapi ah Venhimnak rianṭuan tu le mipi an i nam ṭhan ca ah tualchung mipi pahnih hliam an tuar. BJP hruaitu inn zong khangh an timh ti ah ṭuanvo ngeitu hna nih an chim. Imphal pin ah Kwakta, Bishnupur peng le Kangvai, Churachandpur peng ah kahdohnak a chuak ṭhan fawn. Imphal nitlak-chaklei Iringbam palik station in ralthuam zong fir an timh a sinain zeihmenh an la menh lo.
Army, Assam hriamtlai phu le Manipur Rapid Action Force hna nih khuapi chung buainak chuak ding veng in zankhuadei joint march an ngei tiah theih asi. Mipi a fun mi hi 1,000 tluk an si i palace compound kam ah inn khangh an timh tiah kan theih.
Sinjemai ah zantlai hnu ah BJP pisa thah ding in an kulh asinain, ralkap nih an ṭhawl khawh hna. Imphal zong ah BJP women’s wing president Sharda Devi inn cu luhhnawh an timh chih asinain, hriamtlai tu phu nih an ṭhawlkhawh ṭhan hna. Union Ministee RK Rangjan Singh umnak inn zong kan hnu cacawn ningani khan luhhnawh in khanghpiak a si.
Kalewa Peng Kahdohnak Ah Motor 3 Telh In Hriamthil Tam Ngai Mipi Ralkap Nih An Lak__NUG; Sagaing ramṭhen, Kalewa peng ah kahdohnak a chuak i, mipi ralkap nih ralhrang lei Faw-motor 3 telh in hriamthil tam ngai zong an laak khawh chih, tiah NUG cozah in runvennak vuanci nih May 17 ah cathanh a chuah.
June 16, nizan ah Kalewa khuapi in Minkin (မင်းကင်း) peng ah Faw-motor 3 he hriamthil tam ngai le eidin phurtu Khah-mah-yiah 362 in SAC ralhrang, palik le pyusawhti (an zapi thazaang 130 hrawng) cu mipi ralkap Kalay pengkomh Battalion No.9 nih an kahdoh hna, tiah an langhter.
Kahdohnak ah ralhrang lei Faw-motor 2 an khangh piak khawh hna pinah MA-11 zuun 2, G-3 zuun 2, MA-11 kuan bawm 3, G-3 kuan bawm 6, Maithal saumi zuun 1, MA-7 60 MM zuun 1, 60 MM bomb kuan pawl, RPG kuan 5, 38 Webly Wesson zuun 1, Jammer zuun 1, M-14 lamhmi bomb 2, kut cheh bomb 30 leng le hriamthil dang tam ngai zong mipi ralkap nih an laak khawh chih, tiah cathanh an chuahmi in kan theih.
Hi kahdohnak ah ralhrang lei thimi le hliam a pumi kan hlat cuahmah lio a si i, mipi ralkap lei in nunnak liammi le hliam a tuarmi um loin hnu lei an tolh ṭhan kho, tiah NUG cozah nih cathanh a chuahmi ah a langhter chih. Crd; Lungmili Post