Paungde Kahdohnak Ah SAC ralkap 2 An Thi
==========
Bago ramṭhen, Pyay pengkomh, Paungde peng, Latpankhung le Ma-Oo-kun khuate karlak sakhaan in a rak kir mi SAC ralkap pawl an kah hna i 2 an thi tiah Paungde PDF nih an langhter.
June 25 zinglei sml 10:15am hrawng ah kahdohnak tuah dih hnu in an sakhaan ah a rak kir ṭhan mi SAC ralkap pawl cu Latpankhung khuate le Ma-Oo-kun khuate karlak thlam 2 ah an i dor lio ah an kah hna i SAC ralkap 2 an thi, 4 an i hliam tiah theih a si. Kahdohnak hi mins 5-10 kar lawng a rau i SAC ralkap nih hriamngan bawm in an kah ṭhan hna caah PDF pawl an kir ṭhan tiah theih a si.
Sagaing Ramṭhen Kindaw Khua Ah PDF 15 le Mipi 3 Thah An Tong; Sagaing ramthen Kindaw khua pawng PDF sakhaan cu June 25 ah SAC ralhrang nih an luh hnawh i PDF 15 le mipi 3 an thi tiah RFA nih a chim.
June 25 zinglei ah SAC ralhrang mi 50 hrawng nih an luh hnawh hna. Kindaw khua hi Ayeyawaddy tipi kam Phayakung pawng ah a um mi PDF sakhaan pakhat a si. SAC ralhrang nih zingka ah motor he tiva kam ah an rat hnawh hna. Zing 5:30am a si caah PDF pawl duty lo can te ah an luh hnawh hna. Mah PDF hi Ngazun khua lei mipi hriamtlai an si.
PDF a thi mi hi kum 20-30 kar mino an si. Pa ralkap 12 le Nu ralkap 3 an si. An ruak hi June 25-26 ah an vui hna. SAC ralhrang nih Kindaw khua le Ooyin khua pawng PDF sakhaan an kah hna lio ah Sniper meithal pakhat telh in meithal zuun 15 le kuan pawl kan lak khawh tiah SAC nih june 26 ah thawngthanhnak a tuah.
NUG ralkap lei biachimnak nawl ngeitu nih 2023 kum May thlachung ah No.(1) hmunlei telhmi Ralkap umnak Sagaing, Magwe, Mandalay, le Shan ram chaklei kahdohnak ah PDF hriamtlai 41 nih ram caah an nunnnak an pek tiah a chim. Crd;The Chinland Post