Kalaymyo Peng Kahdohnak Ah CNDF Ralkap 1 A Nunnak Liam; 3 Hliam An Tuar
=========
Sagaing ramthen Kalaymyo peng Thar-she khua pawng June 25 kahdohnak chungah SAC ralhrang hriamngan ruangah CNDF ralkap pakhat a nunnak a liam tiah tualchung mi hna nih an chim. “Kahdohnak hi Thar-she khua ah a chuak, ralhrang nih hriamngan in mipi ralkap an umlai ti ruahnak ah an kah hna, mah ni ah kap hnih kahdohnak a fak ngaingai” tiah mipi ralkap he neihniam pakhat nih a chim.
“Ralhrang nih 120 mm hriamngan an kah mi cu mipi ralkap an umnak hmun ah a tlak caah Vakok-CNDF ralkap pakhat cu a lu ah hriamngan apuak mi nih a peh caah a nunnak a liam i minung 3 hliam an tuar” tiah a cunglei upa nih a chim.
Mah pin ah tualchung mipi ralkap nih an ser chom mi 40 mm hriamngan cu an kah lio ah a peng in a puah caah Pah-kah-phah ralkap minung pakhat a kutthei tlau in hliam a tuar caah an thlop lio a si.
“SAC ralhrang lei in a thi mi le hliamtuar hna cu motor 2 le mizaw phurhnak motor in an lak hna i Kalaymyo No.10 SAC ralhrang siizung ah an chiah hna. Ralhrang lei a thi mi le hliam tuar hna cu kan hngal kho rih hna lo” tiah a cunglei upa nih a chimchap. Hi kahdohnak ah Kalay Pah-kah-phah, UGF, Kalay PDF B-2, B-4, B-5, B-6, KKG RKDF le CNDF hna an i tel tiah kan theih.
June 25 ni ah Falam Mobile Clinic Team nih Falam peng, CerHmum khua ah damlo mipum 80 lenglo an zoh hna pin ah Minor Operation zong an tuah chih hna tiah theih a si. Mah ni ah CerHmun khua i dam lo lawng si loin TlauHmun, KhuaRua, Lunkhua le LianDuh khua mizaw hna zong an rak i zoh ter hna tiah thawng kan theih.
Sagaing ramṭhen, Sagaing peng, Kintaw khua pawng um PDF sakhan pakhat cu SAC ralhrang nih tuzing ah luhhnawh in an kah hna caah PDF ralkap 12 an nunnak a liam, tiah tualchung mipi cheukhat hna nih Khit Thit ah an chim. June 25, deilei suimilam 4:50 tluk ah Sagaing peng,
Kintaw khua telh in khuate 7 hna cu SAC ralhrang nih hriamngan pawl in an kah hna hnu ah Kintaw khua pawng um PDF sakhan cu an luhhnawh hi a si. Cu lio ah SAC ralhrang nih PDF ralkap hna cu an tlaih hna hnu ah atu bantuk in an thah hna hi a si, tiah theih a si.
“Kahdohnak a um lo, deilei sang ah hriamngan pawl kah in an luhhnawh hna hi a si. An zapi in an tlaih hna hnu ah an lu ah meithal in an kahthah hna. Hriamthil zong an laak piak hna, SAC ralhrang nih a thli in an luhhnawh hna hi a si.
PDF sakhan umnak hmun hi an theih cangmi a si lai” tiah min langhter a duh lomi tualchungmi pakhat nih a chim.
“Mah pawngkam ah LDF zong an um nain mizei phu dah an si cu kan thei kho rih lo. Kan theih khawh in thawng kan rak thanh ṭhan te lai” tiah mipi ralkap thawngthanhnak nih a langhter chih.