Bomrap Ral le Kahdohnak Chung In Mipi Pawl Ralrinnak!
==========
Atulio rampi ah kahdohnak hi a hlannak in ramchung hmun kip ah a karh chin ti kha mithmuh kuttongh a si. Kahdohnak chung ah SAC lei siseh, mipi hriamtlai phu lei nih hriamngan, bom le bomrap pawl tampi hman chin thluahmah a si. Kahdohnak chung ah hman mi bomrap pawl hi a phun zong an tam bantuk in a sining zong an i lo cio lo. Bomrap le kahdohnak hriam pawl an sining phun 6 kha a tanglei bantuk in kan rak langhter.
Bomrap le kahdohnak hriam pawl hi a rawh caan (expire date) tiah rikhiah mi an um lo. Zeitluk in hlun hmanh sehlaw a puak kho i minung kha harnak an kan pek khawh. A fuse (a hri) tongh bak in a puak kho mi a si. Bomrap le a puak kho mi hriam pawl hi muisam tampi an ngei kho i thir, plastic, thing, rua pawl zong in an ser hna. A thi mi saram pawl, hramh, bur, vawlei an cilhnak hmun pawl, mi tampi an umkal lo nak hmunhma pawl hna ah bomrap hi an hmanh khawh mi a si.
Myanmar Red Cross Society nih bomrap le a puak kho mi thilri pawl chung in kan himnak hnga zulh ding phun 8 a langhter. Kan theihfian tuk lo mi hmunhma pawl kan kal tik ah/khual kan tlawm tik ah mi tampi nih an palnak lam pawl hman ding. Cuka hmunhma ah khua a sa mi khuami hna kha ṭihnung a si le si lo hal ding.
Bomrap asilole a puak kho mi hriam kekkuai pawl tonghtham lo ding. Hmunhma pakhat khat kha kan khangh cang tiah hnangam in um lo ding. Bomrap le a puak kho mi hriam kekkuai pawl kha ṭihnung a si ṭhiam. Bomrap le a puak kho mi hriam kekuai pawl hi fawite in a puak kho mi a si. Zeitik caan hmanh ah va naih le tonghththam lo ding. Bomrap le a puak kho mi hriam pawl kha zei bantuk thil hmanh in cheh lo ding.
Bomrap asilole a puak kho mi thil pawl hmuh tik ah upa pawl theihter colh ding. Van naih le tonghtham hrimhrim lo ding. Bomrap le a puak kho mi hriam ruang ah thihnak (asilole) nunchung pum tlamtling lo dirhmun phak khawh a si. Zeitik caan hmanh ah tonghtham hrimhrim lo ding.
A puak kho mi hriam pawl he aa hlatnak ah i ṭhial colh ding. Cu bantuk a puak kho mi thilri pawl pawngkam kha zeitik hmanh ah naih lo ding. Midang pawl zong kha cubantuk hmunhma an kal lo nak hnga chimh le kham ding.
Myanmar ram, bomrap ruang ah a nunnak a liam mi chung in cheuthum cheukhat leng hi hngakchia an si. Myanmar ram ah 2023 January in June tiang thla 6 chung, bomrap ruang ah hliam a tuar mi le a nunnak a liam mi sualnak ngei lo mipi 556 an phan i cu chung ah hngakchia 110 leng an i tel tiah UNICEF nih 2023 June ah a thanh.
2022 kumkhat chung bomrap ruang ah upa a nunnak a liam mi le hliam a tuar mi 443 an um i cu chung ah 72 an nunnak a liam, 471 nih hliam an tuar tiah theih a si. Thla 6 chung ah bomrap ruang ah hliam a tuar mi le a nunnak a liam mi hngakchia 113 an si. Hngakchia 30 an nunnak a liam cang i 83 nih hliam an tuar tiah UNICEF report ah hmuh khawh a si.
SAC nih hramhram in uknak a lak hnu thawk in dai tein duhlonak rak langhter a si. Sihmanhsehlaw SAC ralkap pawl nih dai tein duhlonak a rak langhter mi mipi pawl kha hriam hmang in a kah hna, a ṭhencheu hna caah mah le hmunhma, miphun, peng le ramṭhen kip hoih in hriam tlaih in SAC ralkap cu rak doh a si.
Atu ahcun Myanmar ram hmunkip ah kahdohnak nifatin ngawt in a chuah cang caah mipi hna nih kan pawngkam ah kahdohnak a chuah tik ah kan zulh ding le kan hrial ding a herh mi tete kha a tanglei bantuk in kan rak langhter. Kahdohnak a chuah tik ah SAC lei nih mei, ti, eidin, phone line le lam hna an phih tawn.
Mei An Thah Tik Ah; Meihol, Gas rawlchuannak le Gas um, meilul (pazawngdan), dahmei le a rawl I chiah cia ding. A si kho deuh mi nih Generator (မီးစက်) i chiah ding. Ti An Thah Tik Ah;
Ti kha a rat caan poah i khawn ding, ti kha din awk le rual chuannak ca lawng hman ding, ti kholh na duh tuk ahcun towel in I hnawt ko, na pawngkam minung hna caah ti pe ve hna, dum he khua a sa mi hna caah Generator (မီးစက်) le Datsi/Diesel pawl i chiah ding.
Eidin An Phih Tik Ah; Caan sau a nguh i chuan a fawi mi eidin pawl i chiah. Himnak; Innka pawl kha fawn tein aa awn khawh lo nak hnga tawh a ṭha mite in hrenh, a si khawh ahcun thirtung hme tete khamnak tuah, leng chuah hau lo tein innchung in lenglei thil sining ngiat khawh nakhnga tuah, inn hnulei asilole hmundang in chuah khawh nak hnga lakhruak chuahnak awng ser, hau he a um mi caah inn hnulei hau in chuah khawh nakhnga na innpa he ceihkhannak ngei, na innpa he nan I pehtlaih khawh nakhnga ruah awk theih lo mi muisam in innka ser, bomkhor ṭha tein i cawh le tuah ding.
Kilvennak – Hriamtlai phu pawl bawm hna, SAC ralkap pawl an umkalnak thawng hlat zungzal, Hriamtlai pawl nih i dornak, eidin, ti pawl an herh ahcun na si khawh tawk in pe hna. Sii — Sii-ai kha ṭha tein le buaktlak in a herh mi kha i chiah zungzal, nangmah nih na herh lo zong ah a herh mi pawl kha bawm hna.
A Hleikhun In Ralrinnak — Meithal thawng le bom thawng na theih tik ah, ṭihphan bu in a lenglei ah tlikzaam lo ding, a lenglei thil sining hlat na duh ahcun khamhnak pakhat khat na tlaih hnu lawng ah ngiat ding, Na ngiat len mi kha SAC ralkap pawl nih an in hmuh sual nak hnga lo ralrin taktak ding, mah innchung te hi a him ko
Kan Innchung Ah SAC Ralkap Pawl Luh An I Timh Tik Ah — Ralkap pawl doh ṭhan i tim hlah, chai, namte asilole thil pakhat khat in doh i tim hlah, innka awnpiak hrim hna hlah, innchung ah mi an um ti an theih lo nakhnga a lamkip in a herh mi tuah le ralrin ding, SAC ralkap pawl an luh hlan ah inn hnulei a silole lakhruak chush khawh nak in, dai trin zaam ding, a himnak hmun pakhat khat asilole innpa sin ah thil sining chimh in i dor ding
An Rak Luh Tik Ah Awnh Hna Ding Tiah Ruahnak Cheuh In Innka Nan Awn Sual Ahcun — Kanmah kha midang ai ah sualphawt hren (Hostage) in an kan tlaih khawh mi a si. Cun, hramhram in an duhmi fial chukcho Force Labour (ပေါ်တာ) an kan tuahter khawh mi a si, chungkhar ah pa, mino, an um ahcun hriamtlai tiah ruat in an thah khawh mi a si,
Thawngpang — Datkhe hman mi Radio in thawngpang ngaih lengmang ding, na theih mi thawngpang kha na pawngkam theihter chin ve ding, khoika hmunhma dah himnak ram a si ti mi kha theih a herh, himnak hmunhma kha kanmah he aa naihnak a si ahcun a rauv hlan ah kan luat cang lai ti mi ruahchannak ngeih ding, zeitik hmanh ah lungrawh lo ding le mah le mah a silole midang kha lung ṭhawnnak i pek lengmang ding. Credit: The Chin Post