BNRA Nih Pale In A Rak Chuak Mi SAC Ralkap An Kah Hna, 6 An Thi, 10 Hrawng An I Hliam
==========
Sagaing ramṭhen, Pale khua in a rak chuak mi SAC ralkap 85 hrawng cu Kyunbokone le Nweshauk khua karlak ah an kah hna i ralkap 6 hrawng an thi, 10 hrawng an i hliam tiah theh a si. September 11 chun sml 12:45pm hrawng ah Pale in a rak chuak mi SAC ralkap 85 hrawng cu Burma National Revolution Army (BNRA) phufonh nih Kyunbokone le Newshauk khua karlak ah an kah hna hi a si i, SAC ralkap 6 hrawng an thi, 10 hrawng an i hliam tiah theih a si.
Kahdohnak chung ah a sung tuk mi SAC ralkap pawl nih chun sml 1:37pm-2:50 tiang Mi-35 Helicopter in a rak kah hna. SAC ralkap pawl cu mipi hriamtlai pawl nih an kir tak mi hmunhma an rak nam hna lio ah an mah Helicopter lila nih a kah hna caah SAC ralkap a thi mi an tam tiah an langhter. Kahdohnak chung ah BNRA, Daungnyo phu le Kyathitnat phu hna an i bawm tiah theih a si.
Kalay-Tamu Lampi Ah Motor Cycle Le Kethum Ngei Cycle Kal Khawh A Si Cang. Kalay-Tamu lampi caansau nawn khar a si mi cu September 12, 2023 in Motor cycle le kethum ngei cycle pawl kal khawh a si cang motor belte kal khawh a si rih lo tiah theih a si.
Hlan ah Kalay in Khampat khua tiang motor in kal khawh a si i Khampat khua in Tamu ramri tiang ah suimilam 4 chung ramlak in umkal a si. Motor cycle citman ah kyat 70,000 man pek a si tawn. Kalay in Tamu umkalnak ah kallei-kirlei he tangka kyat 300,000 hrawng a dih tiah theih a si.
India ramri, Tamu peng ah kahdohnak a um pah lengmang caah Kalay-Tamu lampi motor kalumnak hi phih/khar a si lengmang. Tamu lam khar a si caan ah India lei in a lut mi thilri man a kai tiah Kalaymyo khuami pakhat nih a chim.
August 18, Kalay-Tamu lampi ah SAC nih Jet Fighter in kahdohnak a tuah, tualchung mi 500 leng India ram ah an zaam. Tamu peng, Kalay-Tamu lamkam um mi Bonegan (Zohmun) khua pawng ah SAC ralkap nih bomb a rak thlak i kahdohnak a rak um.
SAC Ralhrang Nih Ramchung Ah Sualnak Ngeilo Mipi 4,070 Leng An Thah Hna. SAC ralhrang nih ramchung ah sualnak ngei lo mipi 4,070 leng an thah cang hna. Myanmar ram ah hramhram in uknak lak a si hnu kum 2 leng chung ah SAC ralkap nih sualnak ngei lo mipi 4,070 a thah cang hna i a tlaih a tong mi minung 247,451 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 September 11 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 19,458 an tlaih cang hna i cu chung ah minung 7,310 cu thongthlak ding in biakhiah an si tiah DVB nih a langhter.
Dothlennak he pehtlai in an tlaih/hren hna i thah ding tiah bia an khiah mi 103 an um i hriawh in thah ding tiah biak an khiah mi 43 telh in minung 119 cu hriawh in thah ding tiah biakhiah an si caah thah ding tiah biakhiah a si mi an zapi te 146 an si cang. Atutiang ah biakamnak he a thlah ṭhan cang mi hna 5,293 an um cang tiah a langhter.
Myanmar Le Russia Zinan Cawknak Ah Ramhnih Tangka Hmang Kho Ding In Timhtuahnak An Ngei. Myanmar le Russia ramhnih karlak zinan cawknak ah Myanmar tangka kyat, Russia tangka Rubel hmang kho ding in ramhnih hnatlaknak cu a rauh hlan ah minthutnak tuah a si lai tiah SAC ramdang sipuazi pehtlainak Union Minister for Ministry of Transport and Communication Minister Dr Kan Zaw nih a chim.
Russia ram Vladivostok khua ah The 8th Eastern Economic Forum 2023 tonpumhnak ah aa tel mi Dr Kan Zaw nih forum lenglei a um lio ah Russia hrambunh Sputnik Media ah a chim tiah RFA Burmese nih a ṭial. Tu lio SAC nih Russia ram zinan a cawknak ah Tuluk Yuan tangka a hmannak kong zong Dr Kan Zaw nih a chim chip.
A luan cia 2022 Eastern Economic forum ah SAC bawizik Min Aung Hlaing nih Russia ram in zinan cawk a sinak kong Sputnik media ah a rak chim bal. Tu kum Eastern Economic forum hi Russia ram, Vladivostok khua ah September 10 in 13 tiang ni 4 chung an tuah lai. Mah forum ah SAC Ministry of Industry Minister Dr. Charlie Than zong nih Forum tuah lio ah ramhnih tangka hmannak ramhnih hnatlaknak minthut ding in timhtuahnak a um tiah a chim. Credit: The Chinland Post