Bawi Cin Mang a thawngpang ka vun theih cu ka mang dahra a si ti awk in ka zum kho hrim lo!
==========
Tukar cu mithi inn ah khua dei le khualtawn pah si i ka baa pah ngai ko. Cu lio ah nihin Thantlang kahdohnak ah kan Chin ralkap lei thisen tam tuk a luan i, ram le miphun caah a nunnak a pe mi an tampi cang tiah Tluangram (B) ah kan i dinnak ah an Church Pastor pa nih a ka ti ko. Ngaih a chia, lung a fak ti hlei chim ding a um ti lo.
29/8/23 zingka tein kanmah khua zong Khua upa hruainak in Pasal tha hna ruak humnak lei kan i thawh ve. Hmun hnih (Khuabung le Hriphi) ah kal ding kan si caah phu hnih in kan i tthen hna. Khua mino president le UPC pastor tel in mi tam ngai Khuabung lei an kal.
Hriphi lei hi khua VCP (Village Council President) le keimah tel in minung 8 kan si. Hriphi kan phak in Ram le miphun caah a nunnak a petu kan hero Salai Bawi Dawt Peng te inn ah kan kal hmasa. Khua kip in rat cio a si tikah mi cu kan tam ngaingai. Sml zeimawzat kan um hnu ah pasal tha Salai Duh Ka Lung (a ruak an lak khawh lomi) te inn ah kan kal than. Cu ka zong ahcun mi kan tam ngaingai. A nu le pa, an chungkhar an biachim le an tuar ning zoh ah hin cun minung fa nih celh ding a har ko.
Cu ahcun thawngpang dang kan theih than i Hmawngtlang pa Thawngpi le Kuhchah ka hawipa Salai Bawi Cin Mang hna zong an nunnak a liam ve ti thawng kan vun theih than ko. Ka hawipa Bawi Cin Mang a thawngpang ka vun theih cu ka mang dahra a si ti awk in ka zum kho hrim lo.
Sml 2:30pm hrawng ah Kuhchah kal kan i thawh. Kan CVP te cu Hmawngtlang lei an kal than ve. Congthia kan phan i caan tawi te kan i din hnu ah Kuhchah lei kan lanh colh. Lam a tha, cu hlei ah Ka hawipa khua cu zozok in phak ka duh tuk cang i rang taktak in Saikel ka mawngh. Vanchiat ah lung phahmi lam (ကျောက်ခင်းလမ်း) ah fak ngai in kan tlu ko. Pathian nih a kan umpi, Kannih cu fak tuk in kan i khawng hraw lo. Nain, ngeih lo chun tein nai te ah ka cawkmi ka saikel tu cu zeimawzat a rawk. Cu hnu ah kan i thawh than, ka saikel a lu a cei cang caah ralrin deuh le duhsa deuh tein ka mawngh cang.
Tlawmpal kan vun kal ah lam thlang, lam chak ah nu le ngakcia tlawmpal thlam hme tete ah an um ka hmuh hna. Tlawmpal kan vun kal rih ah khin dum thlam ah mi tam ngai an um ka hmuh rih hna. Rem cang lo ngai in thlam hme tete ah aa dor mi ka vun hmuh thluamah hna. An ka chim mi cu Kuhchah cu Nu le Ngakcia cu an zamter dih cang hna ti si. Kan miphun hna nih ral tih ruangah an zam i mah tluk rem cang loin Ngakchia le Nu hna nih ramtang ah khua an sakmi mit hmuh kuttongh in vun hmuh cu thinlung nih a celh hrim lo.
Tlawmpal ah Kuhchah khua cu kan vun phan. Khuachung kan vun lut i ka hawipa inn kan phak cu a nu cu um awk hngal loin a aihram len ko. Zoh ah thinlung nih celh awk tha lo. Ka ngaih a chiat khun mi cu Khuadang ahcun khuakip in an ra i khual an tam, thih cu si ko nain an thih ning a sunglawi deuh. Nain hika ahcun khuadang zong an phan rih lo bia maw si maw? Rat an tih cio caah dah si ka hngalh lo. CDF a hawile le rian ttuantu dah ti lo khual hmuh awk an tlawm. Nu le ngakchia chinchin cu chim awk um lo khi a si. Thih ciocio aa lo lo hi mu timi ka lungah a chuak.
A nu le pa kan vun chawnh hna i a pa nih a hawile maw nan ra a kan ti i kut a kan tlaih, “ka fapa hi fahniang te a si. Ram le miphun caah a ti i kal aa timh ah hin kan thlauh len nain a duh lo caah kan fapa caah pei kan nung cu kan ti i kan nu pa in kan fapa zawn ruah ah khua ah kan umnak a si e, a dang kan fale cu Hakha ah an um ko e” a kan ti.
Cun, a chim rih mi cu ka fapa a thih hi ka ngaih cu a chia ko nain Ram le miphun caah pei a thih cu ka ti i kaa lungsak khawh ko e, mah nakin ka ngaih chiat deuhmi tucu a ruak lak khawh loin Ralhrang kut ah a ruak a um ko mi hi ka celh lo e. A thihnak hi Hakha hna ah sisehlaw Hakha Rungtlang i ralbawi zong ka nawl hna hnga i a ruak lak khawhnak lam ka kawl hnga” a ti. A nu le pa an lungfah le an tuar ning le an fapa ruak te hman hmuh khawh loin an um mi ruah tikah cun thinlung nih a celh hrimhrim lo.
Zan tlai hnu ah kan khua kan phan than. Tuzing cu thinlung taksa in ka rak bat tuk caah si rua a ka zawt beh ko. Nizan cu Saikel ka tluknak ka khawng ka theih lo nain tuzing cu a ka ttamh pah ngai. Nain kan pasal tha hna an ruak humnak ah ka kal khawh hi a phu ko ka ti. Rest In Peace, Respect All Our Fallen Heroes, Nan thisen le nan nunnak nih hin kan ram luatnak hmuhnak ca’h si hram ko seh. Bawipa Kan Dirpi Ko. Credit: Salai Van Peng Uk