Aung San Suu Kyi Thlah Ding In Malaysia Hlutdaw Palai 135 Nih Minsen An Thut!
=========
Nawlngeihnak a latu SAC nih hramhram in an hrenmi rampi ruahnak petu Aung San Suu Kyi cu a rannak in luatnak pe ding in Malaysia parliament members 135 nih minsen thut in nawlnak an tuah, tiah The Malaysian Reserve nih September 19 ah an ṭial.
SAC ralkap nih an hrenmi Suu Kyi cu sii-ai thlopnak nawl pe ding in le a rannak in thlah ding in Malaysia hlutdaw palai, Seputeh MP Teresa Kok hruainak in tonnak ah party kip MP 135 nih minsen thut in nawlnak an tuah.
“Suu Kyi ngandamnak kong ah hin kan lungre a thei, sii-ai thlopnak nawl pek in, lenglei siibawi he ton khawhnak tuaktan piak si seh. Tlaih a tongmi ramkhel thongtla dang vialte zong luatnak pe hna seh,” tiah Malaysia parliament hna nih cun biachahnak(statement) an tuah.
UK um mi Suu Kyi fapa Kim Aris nih a nu ngandamnak a ṭhat lo kong BBC ah a rak chim pinah sii-ai ṭhiṭha in thlopnak nawl zong an pek lo kong a chim. A luancia September 13 ah vawleicung thawngzamtu media ngan Reuters nih, Suu Kyi cu lungmih le luakchuah a ngei tiah a rak thanh.
Royal Rose Hospital Ah Doctor Pakhat Nih Nurse Pakhat A Tuaitam Ruangah Nurse 26 Nih Rian An Chuahtaak. Mandalay khuapi ah a minthang bik sii-inn pakhat a simi Royal Rose Hospital ah Doctor Peter Thein Shwe nih nurse nu pakhat cu mizaw hmai ah a serhsatnak a langhter ruangah nurse bawmtu 26 nih rian an chuahtaak, tiah nurse nu pakhat nih amah pumpak social media ah September 19 ah a taar.
“Pa nih nu tawnghtham le zawmhtaihnak nawl a ngei lo. Cu bantukin doctor nih nurse cung ah tuaitam le cawhdehnak nawl a ngei lo. Royal Rose Hospital ah September 1 in rian ah ka lut i, September 18 ah ka chuak ṭhan,” tiah nurse nu pakhat nih cun social media ah a ṭial.
Dotocr Peter Than Shwe nih cun mizaw a zoh hna lio ah nurse le siibawi nungak no tete cu mizaw hmai ah an takpum tawnghtham le bia dawhcah loin a serhsat hna ruangah sii-inn nawlngeitu nih ṭuanvo laak ding in theihternak an rak tuah ko nain ṭuanvo an la duh lo, tiah Burma VJ nih a ṭial.
Doctor Peter Than Shwe cu Mandalay ramṭhen uktu hlun General Ye Myint he chungkhat an si i nu hna cung ah bia dawh lo chim le serhsat a hmangmi a si, tiah amah he rian a rak ṭuan balmi siibawi pakhat nih a Burma VJ ah a chim ve.
Nizan September 19 Ah SAC le TNLA Kar Kahdohnak Voi 7 A Chuak, TNLA Nih Hriamnam Zeimawzat An Laak. September 19 nikhat chung lawng ah Shan ramkulh Ta’ang Brigade 1 hmunram, Muse peng Saihkawng khua pawng, Kutkai peng Khumung khua pawng, Mandalay ramṭhen Mogok peng Nyaungkone khua pawng le Phyuyaung khua pawng kahdohnak ah a chuak i SAC lei in ralkap tam ngai an thi, tiah theih a si.
Mogok peng, Nyaungkone khua pawng ah September 19 ah Tatma 44 kuttang Khah Mah Yab 102, 104, Lah Pah Khah, Khah Lah Yah-88 in SAC ralkap le TNLA cu zing suimilam 10:00 hrawng le zanlei suimilam 1:00 hrawngah an i kap.
Cu pinah September 19 zanlei suimilam 1:00 hrawngah phyuyaung khua pawng um SAC ralkap sakhan an kah i, zanlei suimilam 5:00 hrawngah Nyaungkone khua chak le a thlang ah a ummi ralkap sakhan cu TNLA nih an kah hna.
September 19 ni khat chung lawng ah SAC ralkap le TNLA kar kahdohnak voi 7 a chuak i SAC ralkap a thimi le aa hliammi an tam. Meithal zun 5, pistol zun 2, meithal sau zun 1, seh meithal zun 1, 60mm bomb lung 5 le zen-kuan tampi kan laak, tiah TNLA nih an langhter.
September 19 kahdohnak ah SAC ralkap sakhan pathum nih kahdohnak pawng ummi khuate cu hriamngan in voi 112 an kah i tualchung mi a thimi le aa hliammi an um. Mogok peng in tualchung mi 400 leng le Muse peng in 340 leng cu ralhrial in an zaam, tiah theih a si. Credit: The Chin Post