SAC Van Ralkap Ca Ah Hriamnam A Cawkpiaktu Aung Kyaw Myint An Thah!
==========
SAC nih an bochan ngaimi le hramhram in kum sau tuk Myanmar ram a rak uktu General Ne Win i a tupa Aye Ne Win he rian a ṭuanṭi mi Aung Kyaw Myint cu SAC van ralkap hna ca ah hriamnam a cawkpiaktu a si i Chinshwehaw ah kah a tong i a thi, tiah theih a si.
A luancia October 27 le 28 hrawng hrang ah chaklei hriamtlai ṭangṭi phu thum nih Chinshwehaw khuapi an rak luhhnawh tan ah SAC bawmchantu mirum Aung Kyaw Myint cu pyituhsit he hmun khat ah an um lioah kah a tong i a thi colh, tiah Khit Thit Media nih a ṭial.
Aung Kyaw Myint cu Myanmar ram hramhram in a rak uktu General Ne Win i a tu le nih an ngeihmi Omini Focus ah director a ṭuanmi a si i SAC van ralkap hna ca ah hriamnam a cawkpiaktu zong a si. “PDF cu nunh loin thah thluahmah ding an si” tiin social media ah hrocernak zong a rak tuah bal.
Kutkai le Tangyan Ah A Um Mi Ralkap Le Pyithusit Sakhaan 3 TNLA Nih An Lak. Shan ram, Kutkai pengle Tangyan peng ah a um mi ralkap le pyithusit sakhaan 3 cu TNLA nih an lak tiah TNLA nih an thanh. November 10 zaan sml 12:00am hrawng ah Kutkai peng ah a um mi ralkap kuttang pyithusit sakhaan cu TNLA nih an lak, November 14 zinglei sml 4:00am hrawng ah Kutkai peng, Lwaikan khua pawng ah a um mi ralkap le pyithusit sakhaan cu TNLA nih an lak chap i sakhaan chung um kahdohnak thilri pawl zong an lak khawh tiah theih a si.
Cubantuk in November 14 ah Tangyan peng ah a um mi ralkap ralkap Sai-Hlian sakhaan zong TNLA nih an lak. November 14 ah Kutkai peng ah a um mi ralkap kuttang Mon-hyun pyithusit phu le Monpaw pyithusit phu hna cu TNLA sin ah hriam zuun 10 an rak ap. Cun November 15 zinglei sml 5:00am hrawng ah Kyaukme peng, Naungpyit khua lamṭhen ah ralkap le TNLA hna karlak ah kahdohnak a fak tiah theih a si.
Loikaw Kahdohnak Ah Ralkap 110 Leng An Thi. Karen ram, Loikaw University ah hmunhma a khuar mi ralkap pawl an kah hna i 110 leng an thi, tlaih mi ralkap zong an tam i adang tang mi ralkap vialte nih a sung an pek tiah KNDF nih nihin November 15 ah thawng a thanh.
Loikaw University tual chung ah Brigade 66 kuttang ralkap pawl cu Kareni dothlennak phu pawl nih a luancia November 13 thawk in an kah hna. Ni 2 chung kahdohnak LIB 425 in Battalion Commander le Second Battalion Commander telh in Battalion an zapi le IB 6 in battalion a cheu hrawng an thi i a zapi a thi mi ralkap hi 110 leng an si i tlaih mi ralkap 38 an um tiah KNDF nih a thanh. Cun hriamngan/hme 128 le kuanzen pawl tampi an lak khawh.
November 14 zaanlei ah Loikaw University tualchung ah a hnu bik a tang mi ralkap pawl a sung pek ding in caan an awnh hna caah Commander Kaung Myat hruai mi ralkap 32 nih a sung an pek tiah an langhter.