Manipur Ram Chung Ah Ral A Hrialmi Myanmar Rammi Hna Cu Chawleh Chawthal Tuah Le Rianṭuan An Khamh Hna. India ram, Manipur ramkulh, Kamjong pengkomh chung ah ral a hrialmi Myanmar rammi hna cu an mah pengkomh nih ri an khiahmi hmunhma chung lawng ah um ding in le chawleh chawthal tuah le rianṭuan tibantuk an khamh hna, tiah India thawngzamhnak pawl nih March 6, ah an thanh.
March 4, ah Manipur ramkulh minister Biren Singh nih Hluttaw chung a chimmi ah May 3, 2023 in February 27, 2024 tiang kan ram chung ah phungning loin a rak lutmi Myanmar rammi 6,746 an si cang. Cu chung ah minung 259 cu an sining checkhlatnak kan tuah hna hnu ah Myanmar ram ah kan kuat ṭhan hna i a taangmi hna cu khuami hna he fonh loin an mah tein camp kan sak piak hna i kan um ter hna, tiah a chim.
2023 may thla chung ah Manipur ramkulh chung ah miphun kong buaibainak a rak um i minung 150 tluk an rak thi. Cu lio ah minister Biren Singh nih Myanmar ram in phaisa duh ruangah kan ram ah ralkap a rak lutmi (Mercenary force) Myanmar rammi hna nih a tubantuk buaibainak pawl hi an chuahter tiah a rak ti.
Cu pin ah India Ministry of Home Affairs minister Amit Anil Chandra Shah zong nih Manipur ramkulh chung ah a cangmi buaibainak hna hi Myanmar ram in a rak i ṭhialmi Kuki miphun hna he aa pehtlai tiah Hluttaw ah a rak chim nain India, Myanmar an ram 2 ning in le Kuki miphun hna nih hikong cu a dikmi a sinak kong, an rak langh ter ve. Lungmili Post