Amak Ko Ee; Dr. Hmuh Thang nih Ralhrang Thazaang Pek Dingin Aforhfial Hna!
==========
SAC Chungtel Dr. Hmuh Thang Cu Chin Ramkulh Hmun Cheukhat Ah A Tlawng. (SAC Thazaang Pek Dingin Aforhfial Hna) SAC nih nawlngeihnak an laak hlan ah Chin mi nih upat hmaizah ngai mi Dr. Hmuh Thang cu SAC Council chungtel a si hnu, 2023 September zarhhnihnak ah Chin ramkulh ah a tlawng, tiah theih a si.
September 12 zing suimilam 11:00 ah Paletwa khuapi Kimu Hall ah SAC Council chungtel Dr. Hmuh Thang, Chin ramkulh SAC Chief Minister Dr. Vung Suan Thang, Colonel Thein Htun Aung, zung kip lutlai hna le khua nu khua pa cu tonnak an ngei, tiah theih a si.
September 14 ah Kalay peng zungkip fonh zung ah le September 15 zong ah Hakha ah tonnak an ngei hna. September 16 zinglei ah Falam khua ah Dr. Hmuh Thang, zungkip zung rianṭuan hna le khua nu khua pa zong tonnak an ngei i zanlei ah Tedim ah a lan, tiah theih a si.
Dr. Hmuh Thang khual a tlawnnak kong he pehtlai in SAC nih an ṭuan hnga ding rian le ramkhel, chawleh chawhrawlnak le zatlang nun kongkau fianternak a tuah pinah mizapi nih an herhmi a hal hna i SAC dirkamh dingin a forhfial hna, tiah theih a si.
Cu bantukin Kachin miphun SAC chungtel Duai Bu zong Kachin ramkulh peng tampi ah a tlawng, Karen miphun SAC chungtel Poo Ye Aung Thein zong Karen ramkulh peng tampi ah a tlawng. Rakhine miphun SAC chungtel Dr. Bah Shwe, Shan miphun SAC chungtel Shwe Kying le Yan Kyaw zong Shan ramkulh peng tampi ah khual an tlawng i SAC ṭhatnak le SAC ṭanpi dingin lemsawinak an aupi, tiah theih a si.
Hakha Khuapi, Hakhathar le Chin Oo Si sang Aa Tonnak Ah Inn Pakhat A Pur. Chin ramkulh, Hakha khuathar le Chin Oo Si sang aa tonnak(UNICEF zung pawng) ah a ummi Rev. Khua Er inn cu September 18 zanṭim ah a pur. “Ruah a sur tuk caah luti aa khong mi a tam tuk i a purhnak a si,” tiah tualchung mi pakhat nih The Chin Post ah a chim.
Hakha ah hin September 17 in pehtlai nawn in ruah a sur i luti luannak um loin hmun cheukhat cu a pit dih, tiah theih a si. Inn rawkral cu sang chung mi hna, meithat phu, palik le SAC ralkap nih an zuanhnawh i an fimhlawm dih cang. Inn a pur mi ah hin mi an um lonak a sau ngai cang. Inn a pur mi thlang ah hin Rev. Khua Er te an um i an vok pakhat cu inn nih a purhhnawh ruangah a zeng.
Atu Rev. Khua Er te umnak le inn purmi hi an pahnih in amah inn a si, tiah tualchung mi pakhat nih cun a chim. Hakha ruah a sur ning hi faak tuk pi cu a si lo nain caan sau deuh a sur ahcun luti luannak ah hmunthur aa khong dih i luti luang kho loin a kham, tiah tualchung mi pakhat nih The Chin Post ah a chim.
Myanmar Ramchung Ramṭhen Le Ramkulh Cheukhat Ah Khual Tlawng Lo Dingin United Kingdom(UK) Nih Thanhnak An Tuah. Ramchung buainak a chuahnak hmun Myanmar ramchung ramṭhen le ramkulh cheukhat ah khual tlawng lo dingin United Kingdom(UK) cozah nih British mi cu ralrin a pek hna.
Foreign, Commonwealth and Development Office nih September 18 ah hi kong hi thanhnak a tuah. Cu a thanhmi chung ah Chin, Kachin, Kaya, Karen, Mon, Rakhine chaklei, Sagaing ramṭhen, Magway ramṭhen le Tanintharyi ramṭhen hna an i tel.
Shan ramkulh, Mandalay ramṭhen le Rakhine ramkulh laifang hrawng tu hi cu, kal lo awk a ṭhat lo ahcun kal khawh a si ko, tiah UK cozah nih British mi hna cu ralrin a pek hna. SAC nih nawlngeihnak an laak hnu in Myanmar ramchung humhimnak kong hi zei a lawh lai chimchung awk a ṭha lo i Yangon le Naypyidaw telh in SAC umnak innlo le anmah he aa pehtlai mi hna cu a him lo, tiah an langhter.
Ramchung hmunkip ah vanlawng in kahdohnak, hriamngan in kahnak le vawlei tang hmanhmi bomb leng ah kahdohnak pehtlai in a chuak. Ramdang mi i ṭhumhnak Hotel, rawl dawr le super market hmun zong ah kahdohnak a chuak kho mi a si, tiah UK cozah nih cun a thanh.