Hollywood muvi chungah cun huat tlai raap, a tak bel ah raap dohtu
=========
Riatriat lio ah ABSDF Kawl siangngakchia ralkap phu an min a rak thang ngai. Cozah vanlawng bak hijack an rak tuah khawh bal. A hnu bel ah, anmah le anmah an rak inawnnok dih. Khin Nyunt nih a rak khuai khawh dih hna ti in theih si nain, si leem lai lo. Cu ABSDF pawl cu nihin ni ah cun a phunphun le a miao-miao ah an icang.
US rampi in Kawlram a kir hnu ah zohchia raap tilcawi ah ai cang an timi pa cu Moe Hein a si. The Sun Rays Journal timi thawngthanh media a tuah i ralkap til a cawi daan cu zoh a chia tuk lekpek ah ai cang. Pakhat cu Soe Than Naing a si. Pau Dohthlennak a von fah chin lengmang lio ahkhan mah pa bia pawl uar an rak um ngai. Biatak lawngte a rak phuan. Raap tilcawi zong ka si lo, NLD upa pakhat ka si bal a rak iti. Mah caah a rak laar pah ve. Caan a von kal deuh tikah, raap tilcawi lawng si loin raap tanbo pithuhsit phunphai ah ai cang.
ABSDF ah minthang cu Moe Thee Zun a si. Moe Thee Zun cu Pau dohthlennak tepawl ah cun a tlau bak ko hi. Adang miza zong an tampi ko lai. Ka van banh thlu kho hna lo. A tang video i ka von taarmi pa hi a min ah Min Htay a si, ti si.
Magway, Chin le Sagaing ramri Yaw lei hrawngah dohthleng phu dirh in raap a phomh cuahmah ve an ti. Hollywood muvi Rambo 4 ah Sylvester Stallone he lem a rak cang balmi, The Lady zongah raap leikap raapbawi misual i leem a rak cangmi pa a si. A muvi chungah cun raap leikap bawi misual a si. A tak bel ah, a ralkap 400 hrawng he Yaw ram lei ah raap uknak cu a doh cuahmah ve.
Zomi Page ah hi tin an taar “CNF ten Tedim mite man uh”. Nihin cu Bungzung raap an tlaihmi video a laar ngai. A phunphun in ruahnak an chuahmi zong um pah cang. MAH an pamhtermi pa kha bo khat, raap sungṭhoh phun si rua. Bia a chimtertu pa a thiam tuk i, a chimter ning paoh in a chimh thluahmah ve.
Tulio Kawlram dohthlennak tuahmi lakah, mah bantuk phun raap tuahter hi hmuh a si leem lo i a phun a van idang ngai tikah, bia chimtertu kha ka von uar ngai. An hrem hna lo. An tlerh hna lo. “မအေလိုး မင်းအောင်လှိုင်” tiah voi nga an auter hnu ah, MAH raap uico ka si tiah voi nga a auter chap rua, ka ti.
Rungtlaang raap bawi pawl cu an thin a khenh in a khenh ko hna lai. Ti awk theih lo ah, mipi cung belte ah faak deuh in an itlerkhawng in denkhawnnak an tuah sual te hnga dek maw? Bia an chimtermi nih Geneva Convention a buarnak cu um lai lo dah! Tulio dohthleng ralkap phu pawl nih Geneva Convention buar lo ding an iralring ngai hna. GC an buar sual cun, ‘dohthlengtu’ ti si loin, ralhrang tiah UN le Western pawl nih min pek ding an duh lo.
Kawl raap sin i iralrin tuk, minung zawnruahnak neih tuk zong khi thinphang cu an si hoi. Kawlram mi cu kan zer tuk hna i an thlahdorhmi vialte khi raap sinah an vai ipe ṭhan hna lai i Kawlram cu a mah lala kirtertu, raap tanbo le hmanmi pawl an va si hoi ṭhan te ding zong cu phan um dom.
Thah ah le raltuknak i vawlei tah-phung buar a va si hnga. Nunh ah le fangheu rul sawhsawh zuat bantuk an va si hnga. Ka ram kong nangmah zawng raang EU tepawl rual nih zeidah nan theih, thah tlak cu ka thah hna lai ta a rak titu Duterte saṭaal ai cawn ngammi le Kawlram ah um si lo. Poi dom ko la dah. Cu pinah, an tlaihmi pawl kha Kawl si loin mah miphun chung deuh an va si hoi tikah cun… Rul cawm ichap nan hau ko ne hna lai!
Bia an chimtermi pa kha CNF hua hna seh ti phun in Zomi Page nih a tar. Zomi pawl commentmi ningah cun, CNF nih buan a co. Raap uknak an rak fih tuk cio. CNF nih teinak hmu chin lengmang seh.
Zomi a si zongah ziah raap rian a ṭuan ti phun an comment ti in ka hmu.
Zomi lakah CNF an va laar tinak si. CNA le HKA-CDF, TT-CDF le CDF-KKG deuh an va si ko rua naan. CNDF te phu zong nih Matu lei ah raap sakhan pakhat cu a va phomh bak ve. Raap zeizat umnak, pa zeizat an thah hna i an tlaih hna, hriam zei tuak an ngah khawh ti bel Matupi-CDF nih a thanh te lai, ti si.
CNDF zong hi an ikhaap kho taktak. Khampat lak khawh ṭhannak zongah anmah an itel. Hmun kip ah an minung an samh tikah, Chin min ṭhattertu an si ve. A zei phu hmanh ai nihsawh ngam ding an si hna lo. Nihin chinram chung teinak ngan hmuhnak kipah TT-CDF in vei phu an itel zungzal. A tang video hi miphun dang ta a si. Tulio Kawlram dohthlennak ah a biapi takmi strategy phun khat ah ruah ciomi cu si ko. Na hmuh cia si lai nain, ngai ve ṭhan phot law. Credit: Salai C Alexander