AA, TNLA, MNDAA Phu Pawl Nih SAC Ralkap Sakhaan Tampi An Lak, Hriam Tamlak Te Zong An Lak Khawh!
==========
Arakan Army (AA) telh in unau hawikom phu a si mi Myanmar National Democratic Alliance Army (MNDAA), Ta’ang National Liberation Army (TNLA) hna nih SAC ralkap sakhaan pawl an lak khawh i hriam tampi zong an lak khawh tiah The Kokang nih a langhter. Operation 1027 min in Shan ram chaklei ah a um mi SAC ralkap sakhaan tampi cu AA, TNLA, MNDAA le dothlennak phu fonh pawl nih kahdohnak an tuah i an lak khawh. Hriam tampi zong an lak khawh tiah cathanh chung ah an langhter.
October 17 zinglei sml 7:40am ah SAC kuttang Lung-htang Pyithusit sakhaan pakhat an lak khawh i October 17 zaanlei tiang ah SAC ralkap sakhaan tampi cu MNDAA unau hawikom phu nih an kah tiah an langhter.
The Kokang nih a thanh ning ah, Chin-shwe-haw hlei, Ho-pan hmunhma Chun-hup khua, Kuan-lung, Mone-koe le Lashio khua ah a um mi SAC ralkap sakhaan tampi cu an lak khawh i Mone-koe pengkomh Shi-gyi-kya tlang, Kokang pengkomh Shan-wan hmunhma Shauk-tin-pa khua, Kokang pengkomh Shi-shan hmunhma Kan-wan-htan khua le Khu-ma khua, Chin-shwe-haw hmunhma Nan-pha-shan tlang ah a um mi SAC ralkap sakhaan pawl zong ah pehzulh in kahdohnak an tuah khawh.
AA aa telnak unau hawikom phu nih SAC ralkap pawl kahdohnak an thawk in sml 5 hrawng a rauh hnu ah Chin-shwe-haw hlei, Ho-pan hmunhma Chun-hup khua, Kwan-lone, Mone-koe le Lashio khua ah a um mi sakhaan tampi an lak khawh. October 27 zinglei sml 4:00am ah, Shan ram, Lauk-kai peng, Chin-shwe-haw khua sakhaan lak kahdohnak ah SAC lei Battalion Commander a thi tiah Western News nih a langhter fawn.
Tutan Operation 1027 ah Burma People’s Liberation Army (BPLA) zong kahdohnak chung ah aa tel ve tiah theih a si. October 27 zinglei ah AA telh in unau hawikom phu nih SAC ralkap sakhaan pawl an kahnak ah SAC ralkap lei tamlak te an thi tiah theih a si.
Nihin zing thawk in, tlangcung hriamtlia phu fonh AA, TNLA le MNDAA nih Shan ramkulh chaklei ah kahdohnak a rual in an thawk. Zingka kahdohnak an thawk sml. tlawmpal ah, MNDAA nih Chin Shwe Haw khua i Ralhrang umnak cu a lak colh tiah theih a si.
Chaklei Shan Ramkulh pehtlaihnak vialte cu, MNDAA nih nihin zing sml. 6 in an phih, Muse in Ralhrang an rak kai chap sual lai timi khamnak caah an phih caah, mipi tlunkallo ding in an thanh.
Nihin zing thiam ah, TNLA nih Yin Kwe Tuang i Ralhrang umnak cu an lak tiah Myanmar Now nih a thanh.
AA, TNLA le MNDAA nih Ramkomh Kawlram mipi nih duhmi a simi, Ralhrang a hram in bonghnak le Online Game in thil tha lo a tuahtu, a ngeitu company le an riantuan khawhnak ding ah a bawmtu Ralhrang le a pehtlai mi phu (militia) vialte an cihhmih ding ah Operation 1027 tiah min pek in kahdohnak an thawhnak October 27 ah cathanh an chuah. Nihin zing thiamthiam ah, KNU ramchung Kawkareik lei ah kahdohnak a cang i, khuapi in a naihnak hmun li tluk ah, KNLA/PDF le Ralhrang LIB 97 he an i kap cuahmah tiah theih a si.
Kawkareik Khua KNU Hruaimi Mipi Ralkap Nih An Kah Lio A Si. Karen ram, Kawkareik khua cu KNU/KNLA hruaimi le Mipi ralkap hna nih khuachung kahdohnak a tuah lio a si. SAC ralkap nih hmunhma an laknak Phungki sianginn, ralkap thawnghlattu-Sahyaphah zung, SB zung pawl cu October 27, zing 5: 00am in chun tiang ah an kah hna i sakhaan pawl an lak khawh dih cang tiah theih a si. Kawkareik khua kahdohnak ah hriamnam tampi an lak i khuachung cu an la kho rih lo. Mipi a tli/zaam mi le innchung erhkhumh in an tam i SAC lei nih hriamngan hman in hmunkip ah kahnak an tuah.
https://fb.watch/nXKvUDfRZI/