Pauktaw Khua Palik Sakhan Telh In SAC Kuttang Zung Vialte AA Nih An Laak!
==========
Rakhine ramkulh Pauktaw peng palik sakhan telh in zung vialte cu AA nih nihin November 16 zinglei suimilam 7:00 luan ah an laak khawh, tiah theih a si. Pauktaw khuami pakhat nih cun, “Pauktaw palik sakhan cu November 15 zan ah an laak i November 16 zinglei ah zung vialte an laak dih. Palik sakhan uktu telh in palik pawl cu AA nih an kalpi dih hna, zung rianṭuantu hna cu zung chung ah an chiah rih hna. Zeitindah an tuah te hna lai ti cu hngalh a si lo,” tiah a chim.
Pauktaw palik sakhan cu November 15 zan ah AA nih an kah i hriamnam chia dingin an auhnawh hna hnu ah palik pawl nih hriamnam an chiah dih. Nihin zinglei suimilam 10:00 luan ah SAC ralkap Helicopter pahnih nih bomb an thlak pinah seh meithal in voi 10 leng an an kah, tiah tualchung mi hna nih an chim.
Pauktaw khua chung ah SAC ralkap Helicopter nih kahdohnak an tuahnak kong he pehtlai in khuami a thi le hliamtuar an um le um lo hngalh a si rih lo. Nizan November 15 ah Teinnyo le Kyaukni palik sakhan zong AA nih an laak cang. SAC ralkap he November 13 in kahdoh hram kan thawk ṭhan i an sakhan 40 leng an chuahtaak cang, tiah AA nih November 14 ah an rak thanh.
Pauk Peng Kahdohnak Ah SAC Ralkap Telh In Palik Le Pyusawhti 32 Leng An Thi, PDF 21 Nunnak A Liam Ve! Magway ramṭhen, Pauk peng Zipyay khua palik sakhan le Pyusawhti khua cu tualchung hriamtlai phu PDF nih an kah i SAC ralkap telh in palik le Pyusawhti 32 an thi, PDF 21 an nunnak a liam ve, tiah Myaing peng hriamtlai phu Pah-Kah-Phah in ṭuanvo ngei pakhat nih a chim.
November 10-14, ni 5 chung chun zan din lo in tualchung hriamtlai phu nih Drone hmang in Enagar lung 1,000 tluk he an doh hna. Nizan November 15, zinglei 5:00 hrawng ah Zipyay palik sakhan le Pyusawhti khua cu luhhnawh in an kahdoh ṭhan hna i sakhan le an umnak inn zong an khanghpiak hna. Cu kahdohnak ah cun SAC ralkap, palik le Pyusawhti an zate fonh ah 32 leng an thi i hriamnam zong an laak khawh, tiah theih a si.
Zipyay khua kahdohnak ah cun SAC ralkap pawl cu raltuknak vanlawng hmang in seh meithal he kahdoh an bawmh hna caah tualchung hriamtlai phu PDF 21 an nunnak a liam i hriamhme zeimawzat zong an sung, tiah theih a si.
November 15 ni Zipyay khua Pyusawhti sakhan kahdoh lioah Myaing khuachung sakhan, Kanni Pyusawhti sakhan, Kaitawma palik sakhan, Dwinma Pyusawhti sakhan, Tayetkan Pyusawhti sakhan le Pakkoku 101 hna cu tualchung hriamtlai phu nih hriamngan le Drone hmang in an kah hna. Cu kahdohnak ah cun Myaing Pah-Kah-Phah Battalion 1, Battalion 2, Pauk Pah-Kah-Phah, YRF, Earthquake Defense Force, Taungnyunaga phu, Royal 7 hriamtlai phu hna an i fonh, tiah theih a si.
Township Information Community Nih Yangon Ramṭhen Um Mizapi Cu Kahdohnak A Chuak Kho Tiah Thawng An Thanh Hna. Township Information Community – TIC nih atu lio Operation kahdohnak kong he pehtlai in Yangon ramṭhen khuasa mipi cu SAC naihniam le pawngkam ah um lo ding in an theihter hna i kahdohnak a chuak kho peng mi a si caah ralring tein um ding in an theihter hna.
Myanmar ram chung hmunkip ah 1027 Operation le 1111 Operation kalpi cuahmah a si i Shan, Kachin, Karenni, Karen, Chin, Rakhine, Tanintharyi le Mon ramkulh tlangcung hmunram le Sagaing ramṭhen le Magway ramṭhen hna ah khuapi laak kahdohnak fak a chuah caah Yangon ramṭhen chung mipi zong ralring tein um an herhnak kong cu TIC nih an thanh.
TIC nih, Operation kong he pehtlai in zeitik caan paoh ah kahdohnak a chuak khomi a si i SAC ralkap sakhan, palik sakhan, umhmun an khuarnak, Dalan pawl an umnak hmun, penguk zung, sangbawi zung le SAC he pehtlaihnak a ngeimi zung vialte cu hrial in luhchuah hrimhrim lo ding, tiah Yangon ramṭhen mipi sin ah an thanh.
Tualchung mipi lei zong nih hnianghrawm tuah in khualtlawn, zan tlai hnu tiang dawr ṭhut, lam kam zuudin, zan tlai hnu asiloah mei mih lio caan tibantuk ah umkal hrial ding. Cun Pyusawhti nih an zuatmi uihrut an tam caah ralrin ngaingai a herhnak kong zong an thanh chih. Innkip nih i thlopbulnak thilri, laakhruak hman khawhmi thil, sii-ai le eidin zong timhcia tein i chiah cio ding ah TIC nih Yangon ramṭhen mipi hna sin ah ralrin peknak an tuah. Credit: The Chin Post