SAC Ralkap Nih Kalaymyo Ah Laimi Pakhat An Thah.Sagaing ramṭhen, Kalaymyo um mi Laimi pakhat cu SAC ralkap nih an thah, tiah theih a si.February 22 zanlei ah Kalaymyo, Tat oo tida-Myohlah um mi Pu Run Ceu Hmung, kum – 34 cu SAC ralkap nih an tlaih i an thah. SAC ralkap nih Pastor pakhat an chawnh i a ruak cu an vuiter, tiah thah a tong mi chungkhat nih The Chin Post ah a chim.
Pu Run Ceu Hmung cu rian a ṭuan i a ṭin lei ah SAC ralkap nih an tlaih i an thah hnu ah 9 miles um Pastor pakhat an chawnh i an vuiter. Pastor pa nih Pu Run Ceu Hmung a thihnak kong cu a chungkhar a chimh hna hnu ah nihin February 24 zanlei ah a ruak cu a thar in an vui ṭhan, tiah a chim chap.
SAC ralkap nih Pastor pa an chawnh lio ah PDF pakhat kan thah tiin an chawnh i a ruak cu an vuiter. Asinain Pu Run Ceu Hmung hi PDF si loin tualchung mi sawhsawh a si. Chungkhar ca ah pawcawmnak rian a ṭuan mi a si i kut zung thiam a si, tiah theih a si.
“Thah tong mi chungkhat nih, Pu Run Ceu Hmung a ruak kan zoh tikah a hnar a kiah pin ah a paw ah meithal in kahnak kuan hma a um. Rian a ṭin zanlei ah SAC ralkap nih an tlaih i an thah,” tiah The Chin Post ah a chim.Pu Run Ceu Hmung cu fapa pali le fanu pakhat a ngei mi a si i a fanu cu hnuk ding lio a si rih, tiah theih a si.
A Poi Kho TakTak :Lailenpi Hngaktu Chin Ralkap 4 Cu MDF le AA Kut in An Nunnak A Liam.
Lailenpi hngaktu Chin ralkap hna cu MDF le AA nih February 23, 2024 ah an kah hna i, CNA ralkap 4 an nunnak a liam, tiah kan theih. CNA ralkap 4 thihnak kong ah CNA lei phone in pehtlaihnak kan tuah hna nain phone line a lut kho lo, thawngfiang deuh hlat cuahmah lio a si.
A luancia January 24, 2024 zong ah Lailenpi hngaktu CNA le CDF Mara cu MDF nih an rak kah hna i, CNA in Corporal pakhat le CDF Mara in Company Commander pakhat hna cu an nunnak a rak liam. Atutan nunnak a liam mi he Lailenpi hngaktu Chin ralkap 6 nunnak a liam cang.Credit : The Chin Post