Hakha-Gangaw lam ah thil phor motor aa let i a mawngtu nunnak a liam.January 27, zinglei sml. 10:00 fai ah Hakha khua chuah, Gangaw lam ah thil phor motor pakhat aa let i a mawngtu nunnak a liam tiah thawng kan theih.
Gangaw lam meng 3/1 le 3/2 kar ah thil phor motor pakhat cu a brake a rawh caah lam thlang pe 40 hrawng ah a tla i a mawngtu nunnak a liam, tiah Meithat Zung nih a thanh.
Cu thil phor motor cu a mawngtu le motor zultu lawng nih an i cit mi a si i, motor lam thlang cheeng ah a tlak ruang ah motor mawngtu cu a nunnak a liam. Motor mawngtu ruak cu Hakha Sii-inn ah tuanvo ngei hna nih an chiah tiah theih a si.
Ngeichia Kho Tuk EE! Paletwa Peng AA umnak Nghung Khua Vanlawng Kahnak ah Minung 7 Nunnak Liam.Paletwa Peng, Nghung khua cu SAC ralkap nih raltuknak vanlawng le hriampi in nihin ah an kah caah khuachung ah Datsi a rak zuar mi minung pasarih an nunnak a liam i, khuami inn tampi zong a hrawh, tiah thawng kan theih.
Hi kong he pehtlai hin khuami pakhat nih, “Nihin suimilaam 1:00PM hrawng ah vanlawng in bomb voi thum a thlak. Hriam ngan zong an kah pah. Khuachung ah Datsi a rak zuar mi motor khal le a zultu hna pasarih an nunnak a liam,” tiah The Hakha Post ah a chim.
SAC nih vanlawng in a kahnak Nghung khua ah hin Rakhine hriamtlai AA hmun an khuar, tiah an chim. Nghung khua cu Daai hmunram chung ah a um mi a si i, atutan hi SAC ralkap nih SlDai hmunram chung vanlawng bomb thlaknak a voi hnihnak a tuah a si cang.
ThawngPang Tha Tuk Si ! Mindat Hmunram Number (1) Council nih Chinland Council ah Kan i Fonh Cang tiah an Thanh.Mindat peng, Hmunram Number (1) Council nih Chinland Council ah mizapi hnatlaknak in kan i fonh cang, tiah nizan January 28 ah thawngthanhnak an tuah.Mindat Hmunram Number (1) Council cu Mindat peng chung i, Teiknay (4) le Teiknay (11) chung ah a um mi mizapi fonh in an ser mi bu a si.
“Hmunram No. 1 ah a um mi mizapi ruahnak halnak kan tuah hnu ah atu bantuk in biachahnak kan tuah hi a si. Hmunram No. 1 ah a um mi mizapi nih hin ICNCC ah um kan duh ti hna sehlaw ICNCC zong ah kan um ko hnga. Mizapi hnatlaknak in Chinland Council ah i fonh ding ti a si caah Chinland Council ah kan i fonh cang lai,” ṭiah ṭuanvo ngeitu Ko Maung Maung nih Khonumthung ah a chim.
Chinland Council ah um ding in biachahnak an tuah cang caah January 28 thawk in Mindat Hmunram No.1 (Teiknay-4 le Teiknay-11) chung i ramkhel rian, ukhruainak, runvennak, biaceihnak, mizapi ṭhanchonak le pawngkam thingram kilvennak rian pawl cu Federal Democracy phungning in ser mi cozah a um hlanlo, hlan pupa hna upadi ning in tawlrel a si lai, tiah an langhter.
“Chin miphun le Chinram sersiamnak ca ah Chinland Council hi abiapi tuk,” tiah Mindat Hmunram Number (1) Council an langhter chap.
Chinland Council he an i fonh hlan ah Teiknay (4) ah hin CDF-Mindat Battalion (3) a rak um. Cu CDF-Mindat Battalion (3) cu atu ah cun Chinland Council ah aa tel cang.
Teiknay (11) ah a um mi CDF-Mindat Battalion (4) in cheuthum-cheuhnih hrawng zong Chinland Council ah an hun lut ve cang.
Chinland Council ah a lut mi Teiknay (4) le Teiknay (11) hi Kanpetlet peng he ramri ah a um mi an si, tiah theih a si.Credit : The Hakha Post